ក្នុងរយៈពេល ៤ ខែ ចាប់តាំងពីលោក Joe Biden ទទួលបានការតែងតាំងពីគណបក្សប្រជាធិបតេយ្យក្លាយជាបេក្ខជនប្រធានាធិបតីមក លោកបានផ្ដោតទៅលើការផ្សះផ្សាការបែកខ្ញែកនៅគណបក្សរបស់លោក។ ប៉ុន្តែខណៈដែលយុទ្ធនាការឃោសនាបោះឆ្នោតជិតបញ្ចប់ លោក Biden ចាប់ផ្ដើមផ្ដោតលើអ្នកគាំទ្រខាងគណបក្សសាធារណរដ្ឋ ដែលមិនពេញចិត្តលោកប្រធានាធិបតី Donald Trump។
អតីតអភិបាលរដ្ឋ Ohio លោក John Kasich ដែលសមាជិកគណបក្សសាធារណរដ្ឋដែលរិះគន់លោក Trump ជារឿយៗ ត្រូវបានគេទាក់ទង ហើយរំពឹងថា លោកនឹងឡើងថ្លែងសុន្ទរកថានៅឯមហាសន្និបាតជាតិគណបក្សប្រជាធិបតេយ្យតំណាងឱ្យលោក Biden នៅខែក្រោយនេះ។ នេះបើយោងតាមប្រភពព័ត៌មានម្នាក់ដែលដឹងអំពីផែនការនេះដោយផ្ទាល់ ប៉ុន្តែសុំមិនបញ្ចេញអត្តសញ្ញាណ។ លោក Kasich គឺជាបុគ្គលល្បីឈ្មោះម្នាក់ខាងគណបក្សសាធារណរដ្ឋ ដែលទំនងជានឹងគាំទ្រលោក Biden យ៉ាងសកម្មនៅពេលខាងមុខនេះ។
ស្របពេលជាមួយគ្នានេះដែរ លោក Trump ហាក់ដូចជាមិនបានធ្វើអ្វីទេដើម្បីពង្រីកការគាំទ្ររបស់លោក ក្រៅតែពីពង្រឹងការគាំទ្ររបស់លោកចំពោះអ្នកគាំទ្រដែលស្មោះស្ម័គ្រនឹងលោកស្រាប់ទៅហើយ។
នៅសល់ពេលប្រមាណ ១០០ ថ្ងៃទៀតទម្រាំដល់ថ្ងៃបោះឆ្នោត ដែលអាចមានការផ្លាស់ប្ដូរភ្លាមៗនៅក្នុងយុទ្ធនាការឃោសនាបោះឆ្នោតបាន៕
