ប្រធានាធិបតីសហរដ្ឋអាមេរិកលោក Joe Bidenបន្ធូរបន្ថយទោសមនុស្សប្រហែល១.៥០០នាក់ដែលត្រូវបានដោះលែងពីគុកហើយបានដាក់ឱ្យឃុំឃាំងក្នុងផ្ទះក្នុងអំឡុងនៃការរាលដាល់នៃជំងឺកូវីដ១៩ ហើយនឹងលើកលែងទោសជនជាតិអាមេរិកាំង ៣៩នាក់ដែលត្រូវបានចោទប្រកាន់ពីឧក្រិដ្ឋកម្មដែលមិនប្រើអំពើហិង្សា។ វាជាសកម្មភាពនៃការបន្ធូរបន្ថយទោសច្រើនបំផុតក្នុងរយៈពេលមួយថ្ងៃក្នុងប្រវត្តិសាស្ត្រទំនើប។
ការបន្ធូរបន្ថយទោសដែលត្រូវបានប្រកាសកាលពីថ្ងៃព្រហស្បតិ៍ម្សិលមិញសម្រាប់មនុស្សដែលបានជាប់ឃុំឃាំងក្នុងផ្ទះយ៉ាងហោចណាស់រយៈពេល១ឆ្នាំបន្ទាប់ពីពួកគេត្រូវបានដោះលែងពីគុក។ គុកមានស្ថានភាពអាក្រក់សម្រាប់ការរាលដាលនៃមេរោគហើយអ្នកទោសខ្លះត្រូវបានដោះលែងនៅក្នុងផ្នែកមួយដើម្បីបញ្ឈប់ការរាលដាលនៃមេរោគ។ ចំណុចមួយទៀត អ្នកទោសម្នាក់ក្នុងចំណោមអ្នកទោស៥នាក់មានជំងឺកូវីដ១៩។ នេះបើតាមការកត់ត្រារបស់ទីភ្នាក់ងារសារព័ត៌មាន AP។
លោក Biden បាននិយាយថាលោកនឹងចាត់វិធានការបន្ថែមទៀតនៅក្នុងសប្តាហ៍ខាងមុខនេះហើយនឹងបន្តសើរើពិនិត្យមើលឡើងវិញនូវញត្តិបន្ធូរបន្ថយទោសនេះ។ ការលើកលែងទោសច្រើនបំផុតទី២ក្នុងរយៈពេលមួយថ្ងៃគឺធ្វើឡើងដោយលោក Barack Obamaដោយមានការលើកលែងទោសមនុស្ស៣៣០នាក់ មុនពេលលោកចាកចេញពីតំណែងនៅឆ្នាំ២០១៧។
លោក Biden បានបញ្ជាក់នៅក្នុងសេចក្តីថ្លែងការណ៍ថា«ប្រទេសអាមេរិកត្រូវបានកសាងឡើងទៅតាមការសន្យានៃការផ្តល់លទ្ធភាពនិងផ្តល់ឱកាសលើកទី២។ ក្នុងឋានៈជាប្រធានាធិបតី ខ្ញុំមានអភ័យឯកសិទ្ធយ៉ាងធំធេងនៃការបន្តលើកលែងទោសដល់មនុស្សដែលបានបង្ហាញការស្តាយក្រោយនិងបានកសាងខ្លួនឡើងវិញ ផ្តល់ឱកាសឡើងវិញសម្រាប់ប្រជាពលរដ្ឋអាមេរិកាំងឱ្យអាចចូលរួមជីវភាពប្រចាំថ្ងៃនិងជ្រោមជ្រែកដល់សហគមន៍របស់ពួកគេ៕
