ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

លោក Biden អួត​ពី​ជោគជ័យ​នៃ​ការ​តម្រូវ​ឲ្យ​ចាក់​វ៉ាក់សាំង​បង្ការ​​ជំងឺ​កូវីដ


លោក​ប្រធានាធិបតី ​Joe Biden ថ្លែង​អំពី​វ៉ាក់សាំង​ការពារ​ជំងឺ​កូវីដ១៩​បន្ទាប់​ពី​ធ្វើ​ទស្សនកិច្ច​នៅ​ទីតាំង​សាងសង់​មជ្ឈមណ្ឌល​ទិន្នន័យ​ Microsoft Claycoនៅ​ភូមិ Elk Grove ក្នុង​រដ្ឋ Illinois នៅ​ថ្ងៃទី៧ ខែតុលា ឆ្នាំ២០២១។ (AP)

ជិត​មួយ​ខែ​បន្ទាប់ពី​ប្រកាស​ផែនការ​ដ៏​ធំ​មួយ​ដែល​តម្រូវ​ឲ្យ​ពលរដ្ឋ​អាមេរិកាំង​រាប់​លាន​នាក់​ចាក់​វ៉ាក់សាំង​កូវីដ១៩​មក​ លោក​ប្រធានាធិបតី ​Joe Biden ​បាន​ធ្វើ​ដំណើរ​ទៅ​ទីក្រុង Chicago​ រដ្ឋ​ Illinois​ កាលពី​ថ្ងៃ​ព្រហស្បតិ៍​ដើម្បី​ពិភាក្សា​អំពី​ការ​ជឿន​លឿន​នៃ​តម្រូវ​ការ​ចាក់​វ៉ាក់សាំង។​

នៅ​ក្នុង​ការ​អត្ថាធិប្បាយ​នៅ​ឯ​ក្រុមហ៊ុន​ Clayco ​ដែល​ជា​ក្រុមហ៊ុន​សំណង់​ជាតិ ​លោក​ Biden ​បាន​មាន​ប្រសាសន៍​ថា ​ បទ​បញ្ជា​របស់​លោក​ដំណើរការ​ ហើយ​ពលរដ្ឋ​អាមេរិកាំង​រាប់​លាន​នាក់​បាន​ចាក់​វ៉ាក់សាំង​ ចាប់តាំង​ពី​ការ​ប្រកាស​បទ​បញ្ជា​នេះ​មក។

លោក​មាន​ប្រសាសន៍​ថា​ «យើង​ដឹង​ថា ​ មិន​មាន​វិធី​ផ្សេង​កំចាត់​ជំងឺ​រាតត្បាត​ល្អ​ជាង​ឲ្យ​ពលរដ្ឋ​អាមេរិកាំង​ភាគ​ច្រើន​ចាក់​វ៉ាក់សាំង​នោះ​ទេ។ ​យើង​មិន​ទាន់​បាន​ទៅ​ដល់​គោល​ដៅ​ទេ។ ​យើង​ត្រូវតែ​ឈ្នះ​ជំងឺ​នេះ»។​

លោក​ប្រធានាធិបតី​ក៏​បាន​មាន​ប្រសាសន៍​ដែរ​ថា តម្រូវការ​ឱ្យ​ចាក់​វ៉ាក់សាំង​នេះ​គឺ​ល្អ​សម្រាប់​សេដ្ឋកិច្ច​ ហើយទទួល​បាន​ការ​គាំទ្រ​យ៉ាង​ខ្លាំង​ពី​សាធារណ​ជន។​

នៅពេល​បញ្ចប់​សុន្ទរកថា​របស់​លោក លោក​ Biden​ បាន​អំពាវនាវ​ឱ្យ​ក្រុមហ៊ុន​កាន់តែ​ច្រើន​ទៀត​អនុវត្ត​បទបញ្ជា​នេះ។

ការ​ស្ទង់​មតិ​ចុង​ក្រោយ​ដោយ​សាកល​វិទ្យាល័យ​ Quinnipiac ​ដែល​បាន​ចេញ​ផ្សាយ​នៅ​ដើម​សប្តាហ៍​នេះ​ បាន​បង្ហាញ​ថា ​ចំណាត់​ការ​របស់​លោក ​Biden ​ចំពោះ​ជំងឺ​កូវីដ១៩​ មាន​ការ​គាំទ្រ​ពី​សាធារណ​ជន​៤៨%​ និង​ការ​មិន​គាំទ្រ​៥០%។​

កាលពី​ខែ​មុន ​លោក​ Biden ​បាន​ប្រកាស​ផែន​ការ​ដែល​តម្រូវ​ឲ្យ​ចាក់​វ៉ាក់សាំង​នៅ​ក្រុមហ៊ុន​ដែល​មាន​បុគ្គលិក​ចាប់​ពី​១០០​នាក់​ឡើង។ អ្នក​ដែល​មិន​បាន​ចាក់​វ៉ាក់សាំង​នឹង​ត្រូវ​បង្ហាញ​លទ្ធផល​ធ្វើ​តេស្ត​ជា​រៀងរាល់​សប្តាហ៍។ លក្ខខណ្ឌ​នេះ​អាច​ប៉ះពាល់អ្នក​ធ្វើការ​ជាង​១​រយ​លាន​នាក់។​

ថ្វីបើ​មាន​ការ​ចាក់​វ៉ាក់សាំង​យ៉ាង​ទូលំទូលាយ​ក្នុង​ចំណោម​ប្រជាជន​អាមេរិក​ក៏ដោយ​ ​ចំនួន​អ្នក​ស្លាប់​ដោយសារ​ជំងឺ​កូវីដ ១៩​នៅ​ឆ្នាំ ​២០២១ ​លើសឆ្នាំ​២០២០។​ រហូតមក​ដល់ពេល​នេះ​ជនជាតិ​អាមេរិក​ជាង ​៧០០.០០០ ​នាក់​បាន​ស្លាប់​ដោយ​សារ​វីរុស​នេះ៕

(ព័ត៌មានខ្លះ​ក្នុង​សេចក្តី​រាយ​ការណ៍​នេះ​ដក​ស្រង់​ពី​ទីភ្នាក់ងារ​សារ​ព័ត៌មាន​ The Associated Press និង​ Reuters)

XS
SM
MD
LG