ប្រធានាធិបតីអាមេរិកលោក Joe Biden បានឆ្លើយទៅនឹងការអង្វរសុំរបស់អ៊ុយក្រែនកាលពីថ្ងៃពុធ ដោយមានកញ្ចប់ជំនួយទឹកប្រាក់៨០០លានដុល្លារដែលរួមមានអាវុធនិងសម្ភារៈផ្សេងៗទៀត។ បើទោះបីជាយ៉ាងនេះក្តី ការឆ្លើយតបនេះ មិនអាចធ្វើបានសម្រាប់តំបន់គ្មានការហោះហើរដែលប្រធានាធិបតីអ៊ុយក្រែនលោក Volodymyr Zelensky ស្វះស្វែងរកនៅពេលដែលប្រទេសរបស់លោកកំពុងប្រឈមការបន្តការវាយប្រហារពីរុស្ស៊ីនោះ។
ក៏ប៉ុន្តែ លោក Biden ក៏បានបង្កើនពាក្យសម្តីសង្គ្រាមរវាងលោកនិងប្រធានាធិបតីរុស្ស៊ីលោក Vladimir Putin ផងដែរ។
លោកប្រធានាធិបតី Biden បាននិយាយថា៖ «ខ្ញុំគិតថា លោក Putin ជាឧក្រិដ្ឋជនសង្គ្រាម»។ លោកប្រធានាធិបតី បានប្រាប់ពួកអ្នកកាសែតនៅឯពិធីមួយបន្ទាប់មក កាលពីថ្ងៃពុធម្សិលមិញ។ លោកមិនបាននិយាយលម្អិតទេ ហើយបានដើរចេញ។
នៅក្នុងការឆ្លើយតប អ្នកនាំពាក្យរដ្ឋាភិបាលវិមានក្រឹមឡាំងលោក Dmitry Peskov បានប្រាប់ទីភ្នាក់ងារព័ត៌មាន TASS ថា សុន្ទរកថារបស់លោក Biden ជា៖ «វោហាសាស្ត្រមិនអាចទទួលយកបាន និងមិនអាចអត់ឱនឲ្យបាន»។
អ្នកនាំពាក្យសេតវិមានលោកស្រី Jen Psaki បាននិយាយថា៖ «កំណត់សម្គាល់របស់លោកប្រធានាធិបតីជាគំនិតផ្ទាល់ខ្លួនរបស់លោក។ លោកនិយាយចេញពីបេះដូងរបស់លោកហើយនិយាយពីអ្វីដែលលោកបានឃើញនៅតាមកញ្ចក់ទូរទស្សន៍ដែលជាអំពើដ៏ព្រៃផ្សៃរបស់មេដឹកនាំផ្តាច់ការតាមរយៈការឈ្លានពានរបស់លោក Putinទៅលើប្រទេសក្រៅមួយ»។
លោក Putin បានចាប់ផ្តើមឈ្លានពានប្រទេសអ៊ុយក្រែនកាលពី៣សប្តាហ៍មុន។ កងទ័ពរបស់លោក បានវាយប្រហារមន្ទីរពេទ្យ សាលារៀននិងផ្ទះសម្បែង។ ប្រធានាធិបតីអ៊ុយក្រែនលោក Zelensky បាននិយាយថា កុមារប្រហែល១រយនាក់ បានត្រូវសម្លាប់នៅក្នុងការវាយប្រហារដ៏ខ្លាំងនេះ។
លោក Biden មានប្រសាសន៍ថា កញ្ចប់ជំនួយថ្មីរបស់សហរដ្ឋអាមេរិក «បានធ្វើឲ្យជំនួយខាងសន្តិសុខថ្មីរបស់សហរដ្ឋអាមេរិកទាំងអស់ដល់អ៊ុយក្រែនមានចំនួន១ពាន់លានដុល្លារគ្រាន់តែក្នុងពេលសប្តាហ៍នេះតែប៉ុណ្ណោះ»។
បន្ថែមលើប្រព័ន្ធប្រឆាំងនឹងកាំជ្រួច Stinger ចំនួន៨០០ដើមដែលលោក Biden បានប្រកាស កញ្ចប់ជំនួយនោះ រួមមានអាវុធប្រភេទJavelin ចំនួន២.០០០ដើមនិងអាវុធបាញ់រថពាសដែកប្រភេទស្រាល១.០០០ដើម ប្រព័ន្ធប្រឆាំងរថពាសដែកAT-4 ចំនួន៦.០០០ដើម កាំភ្លើង M203 រាប់រយដើម កាំភ្លើងខ្លី កាំភ្លើងវែងរាប់ពាន់ដើម គ្រាប់រំសេវជាង២០លានគ្រាប់ អាវក្រោះនិងមួករាប់ម៉ឺនសម្រាប់។
ក្រសួងការពារជាតិអាមេរិកកាលពីថ្ងៃពុធម្សិលមិញ បាននិយាយថា កិច្ចខំប្រឹងប្រែងដើម្បីដឹកជញ្ជូនឧបករណ៍ទាំងនេះ កំពុងធ្វើឡើង។
មន្ត្រីម្នាក់ដែលបានបដិសេធពុំព្រមផ្តល់សេចក្តីលម្អិតអំពីរបាយការណ៍ថា សម្ព័ន្ធមិត្តខ្លះ រួមទាំងប្រទេសស្លូវ៉ាគី មានបំណងផ្តល់ឲ្យរដ្ឋាភិបាលក្រុងកៀវនូវប្រព័ន្ធការពារដែនអាកាសS-300 ដែលធ្វើនៅប្រទេសរុស្ស៊ី ដែលមានលទ្ធភាពបាញ់ទម្លាក់យន្តហោះរបស់សត្រូវនិងកាំជ្រួចបាល់លីស្ទិកនិងកាំជ្រួច Cruise ដែរ៕
ប្រធានការិយាល័យវីអូអេនៅសេតវិមានអ្នកស្រី Patsy Widakuswara និងអ្នកយកព័ត៌មានវីអូអេខាងសន្តិសុខជាតិលោក Jeff Seldin និងអ្នកយកព័ត៌មានវីអេអូនៅសភាអ្នកស្រី Katherine Gypson បានផ្តល់សេចក្តីរាយការណ៍នេះ ហើយព័ត៌មានខ្លះនៃសេចក្តីរាយការណ៍នេះ ដក ស្រង់ពីទីភ្នាក់ងារព័ត៌មាន AP, AFP និង Reuters។
