ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ដំរី​នៅ​វត្តភ្នំ​ឈ្មោះ​សំបូរ​ចូល​និវត្តន៍​ក្រោម​ជំនួយ ​USAID


សំបូរ ដែល​ជា​ដំរី​អាយុ​៥៤​ឆ្នាំ​មួយ​ក្បាល នឹង​ត្រូវ​យក​ទៅ​ថែរក្សា​ទុក​ក្នុង​តំបន់​ព្រៃ​ការពារ​ក្នុង​ស្រុក​កែវសីមា ក្នុ​ងជ្រលង​ភ្នំ​មួយ​នៃ​ខេត្ត​មណ្ឌល​គីរី នៅ​ថ្ងៃ​ទី​២៩​ខែ​វិច្ឆិកា​នេះ។
សំបូរ ដែល​ជា​ដំរី​អាយុ​៥៤​ឆ្នាំ​មួយ​ក្បាល នឹង​ត្រូវ​យក​ទៅ​ថែរក្សា​ទុក​ក្នុង​តំបន់​ព្រៃ​ការពារ​ក្នុង​ស្រុក​កែវសីមា ក្នុ​ងជ្រលង​ភ្នំ​មួយ​នៃ​ខេត្ត​មណ្ឌល​គីរី នៅ​ថ្ងៃ​ទី​២៩​ខែ​វិច្ឆិកា​នេះ។

ក្រោយ​ពីស្ថិត​ក្នុ​ងសេវា​កម្ម​បម្រើ​ទេសចរណ៍​អស់​រយៈ​ពេល​ជាង​៣០​ឆ្នាំ ​នៅ​ថ្ងៃ​នេះសំបូរ ​ដែល​ជា​ដំរី​មេ​មួយ​ក្បាលនឹង​ត្រូវ​វិល​ទៅ​រក​ជីវ​ភាព​ក្នុងព្រៃ​ដូច​ធម្មជាតិវិញ។

​ដំរីអាយុ​៥៤​ឆ្នាំ​នេះ​នឹង​ត្រូវ​យក​ទៅថែរក្សា​ទុក​ក្នុង​តំបន់​ព្រៃ​ការពារ​ក្នុង​ស្រុក​កែវសីមា ​ក្នុ​ងជ្រលង​ភ្នំ​មួយ​នៃ​ខេត្ត​មណ្ឌល​គីរី ​នៅ​ថ្ងៃ​ទី​២៩​ខែ​វិច្ឆិកា​នេះ។​នៅ​ទី​នោះ​វា​នឹង​ត្រូវ​ស្ថិត​ក្រោម​ការថែទាំ​របស់​អង្គការ​ការពារ​សត្វ​ដំរី​និង​រដ្ឋ​បាល​ព្រៃ​ឈើ។

ពិធី​សូត្រមន្តមួយ​ត្រូវ​ធ្វើ​ឡើង​នៅ​ផ្ទះ​របស់​ហ្ម​ដំរី​លោក​ស៊ិន ស៊ន ​ក្នុង​សង្កាត់​ភ្នំពេញ​ថ្មីនៅ​រសៀល​ថ្ងៃអង្គារ​នេះ​ដើម្បី​បួង​សួងនិង​ប្រោះ​ព្រំ​សុំ​សេចក្តីសុខ​សម្រាប់​ជីវិតចូល​និវិត្តន៍របស់​សំបូរ។

​លោក​ស៊ិន ស៊ន ​រំលឹក​ទាំង​សោក​ស្តាយចំពោះ​ការ​ឃ្លាត​ឆ្ងាយ​ពី​ដំរីដែល​គាត់​បាន​រស់​នៅ​ជាមួយ​ចាប់​តាំង​ពី​លោក​មាន​អាយុ​៨​ឆ្នាំ​មក​ម្ល៉េះ។

«ឪ​ពុក​ខ្ញុំ​ទាក់​បាននៅ​ភ្នំឪរ៉ាល់​ ខេត្ត​កំពង់​ស្ពឺ។​ កាល​ពី​ខ្ញុំ​នៅ​កុមារ​ភាព។ ​បាន​ថា​វា​ហ្នឹងខ្ញុំ​ដូច​បង​ប្អូន​ចឹង»។

​ដំរីឈ្មោះ​សំបូរ​នេះ​ត្រូវ​គេ​ស្គាល់ទាំង​លក្ខណៈ​ជាតិ​និង​អន្តរជាតិ​។ ​វាតែងតែ​បង្ហាញ​វត្តមាន​នៅ​រម​ណី​យ​ដ្ឋាន​វត្តភ្នំ​រៀង​រាល់​ថ្ងៃ​ដើម្បី​រង់​ចាំ​ដឹក​ភ្ញៀវ​ទេសចរណ៍​ដែល​ទៅកំសាន្ត​នៅ​ទីនោះ។ វា​បាន​រស់​នៅ​ជាមួយ​លោក​ស៊ិន ស៊ន ​ក្នុង​អំឡុង​សម័យ​សង្គម​រាស្ដ្រ​និយម​រហូត​ដល់​សម័យ​កម្ពុជា​ប្រជាធិបតេយ្យ​របស់​ពួក​ខ្មែរ​ក្រហម។នៅ​សម័យ​នោះ​ពួក​ខ្មែរ​ក្រហម​បាន​ដក​ហូតសត្វ​ចតុ​បាត​នេះ​ទុក។លុះ​ដល់​របប​ខ្មែរ​ក្រហម​បាន​ដួល​រលំ ​លោក​ស៊ន ​ដែល​អាយុ​បង​សត្វ​ដំរី​នេះ​ត្រឹម​បី​ឆ្នាំ ​បាន​ស្វែង​រក​ដំរី​នេះ​ឡើង​វិញ​ហើយ​បាន​យក​មក​ចិញ្ចឹម​និង​បាន​ប្រើ​វា​ក្នុ​ងការ​ដឹក​ជញ្ជូន​ភ្ញៀវ​ទេសចរណ៍​កំសាន្ត​នៅ​ជុំវិញ​វត្ត​ភ្នំ ចាប់​តាំង​ពី​ទសវត្សរ៍​១៩៨០​មក​ម្ល៉េះ។

​ជា​រៀង​រាល់​ថ្ងៃ​ដំរី​នេះ​បាន​រក​ចំណូលជាមធ្យម​ចំនួន​២០​ដុល្លារ​អាមេរិក​សម្រាប់​លោក ស៊ិន ស៊ន។

​ប៉ុន្តែ​មុន​ចូល​និវត្តន៍​សំបូរ​ បាន​សម្រាក​នៅ​ផ្ទះ​របស់​លោក​អស់​រយៈ​ពេល​ជិត​ពីរឆ្នាំ​មក​ហើយ​ដោយសារ​សំបូរ​ឈឺជើងមុខ​ខាង​ស្តាំ។

​ការ​វិល​ទៅរក​ជីវិត​ក្នុង​ធម្មជាតិ​វិញ​របស់​សំបូរ​ ​កើ​ត​ឡើង​ក្រោម​ការ​ជួយ​គាំពារ​របស់​ទី​ភ្នាក់​ងារសហរដ្ឋ​អាមេរិក​ដើម្បី​កិច្ចអភិវឌ្ឍន៍​អន្តរជាតិ (USAID)។

​លោក​សន ​ខលឡាហេម​ (Sean Callaham)​ នាយករង​បេសកម្ម​របស់​ USAID ​ប្រចាំ​កម្ពុជា​មាន​ប្រសាសន៍​ក្រោយ​ពី​ពិធី​សូត្រមន្ត​សម្រាប់ជូន​ដំណើរ​ដំរី​សំបូរ​ថា​ការ​វិល​ទៅ​រស់​នៅក្នុង​តំបន់​ព្រៃ​វិញ​គឺជា​ផ្នែក​មួយ​ចូលរួម​ចំណែក​ថែរក្សា​សត្វ​ព្រៃ​របស់​កម្ពុជា។

«​សំបូរកាន់​តែ​ចាស់​ហើយ។​ខ្ញុំ​គិត​ថា​ដល់​ពេលវេលា​ដែល​វា​ត្រូវ​ចូល​និវត្តន៍​ហើយ។នេះ​គឺ​ជា​ការ​បង្ហាញ​នូវ​ការ​គាំទ្រ​ដល់​ប្រជា​ពល​រដ្ឋ​កម្ពុជានិង​ការ​អភិរក្សធនធាន​ធម្មជាតិ​របស់​កម្ពុជានិង​តម្រូវ​ការ​ការពារ​ជីវចម្រុះ​និង​ព្រៃ​ឈើ។​យើង​សង្ឃឹម​ថា​នេះ​គឺ​ជា​ដំណាក់​កាល​មួយ​ក្នុ​ង​ចំណោម​ដំណាក់​កាល​ជា​ច្រើន​ទៀត​ដែល​កម្ពុជា​នឹង​ត្រូវប្រកាន់​យកដើម្បី​យក​មក​វិញ​នូវ​សត្វ​ព្រៃ​ អភិរក្ស​ព្រៃ​ឈើ​និង​ជីវ​ចម្រុះ»។​

លោក​កែវ ​អូម៉ាលីស​ ប្រធាន​នាយកដ្ឋាន​សត្វ​ព្រៃ​និង​ជីវ​ចម្រុះ​នៃរដ្ឋ​បាល​ព្រៃ​ឈើ​របស់​ក្រសួង​កសិកម្ម​មាន​ប្រសាន៍​ថា​សំបូរ​នឹង​ស្ថិត​នៅ​ក្រោម​ការ​ការពារ​និង​អភិរក្ស។

«គឺ​ជា​ការ​ល្អ​ដែល​បញ្ជូន​សំបូរ​ទៅវិញ​ព្រោះ​ដំរី​នៅ​ទីនេះ​មាន​ទី​ធ្លា​មិន​សម​ប្រកប​សម្រាប់​សំបូរ​រស់​នៅ​ទេ។​ ព្រោះ​ដំរី​ត្រូវ​ការ​ទី​ជម្រក​ដែល​ធំ ​ជា​តំបន់​ព្រៃ​និង​មាន​ដំរី​ផ្សេងៗ​ផង​ដែរ»។

​ប្រទេស​កម្ពុជា​មាន​ដំរី​ព្រៃ​ប្រមាណ​ពី​៤០០​ទៅ​៥០០​ក្បាល​និង​ដំរី​ស្រុក​៧៨​ក្បាល​នេះ​បើ​យោង​តាម​របាយការណ៍​ផ្សេង​របស់​អង្គការ​ការពារ​សត្វ​ដំរី​និង​របាយការណ៍​របស់​នាយក​ដ្ឋាន​សត្វ​ព្រៃ​និង​ជីវ​ចម្រុះ។

​លោក​Jack Highwood​ ប្រធាន​កម្មវិធីនៃ​អង្គការ​ការ​ពារ​សត្វ​ដំរី​ELIE​រំលឹក​ថា​សត្វ​ដំរីនៅ​ប្រទេស​កម្ពុជាបាន​ថយ​ចុះ​ពី​ចំនួន​រាប់​ពាន់​ក្បាល​នៅ​សល់​ត្រឹម​តែ​ប្រមាណ​ជាង​៤០០​ក្បាល​នា​ពេល​បច្ចុ​ប្បន្ន​ដោយសារ​តែ​ការ​បាត់​បង់​ជម្រក​បណ្តាល​មក​ពី​ការ​កាប់​បំផ្លាញ​ព្រៃ​ឈើ​ជា​ពិសេស។​ហើយ​ពេល​នេះ​កម្ពុជា​ត្រូវ​តែធ្វើ​ការ​អភិរក្ស​សត្វ​ដំរី។​ដោយឡែក​សត្វ​ដំរី​សំបូរ ​នឹង​ត្រូវ​ដាក់​ឲ្យ​រស់​នៅ​ជាមួយ​សត្វ​ដំរី​មេ​ចំនួនប្រាំបួន​ក្បាល​ផ្សេង​ទៀត​លើ​ផ្ទៃ​ដី​១១​ហិកតា​ដែល​សំបូរ​ដោយ​ព្រៃ​និង​ព្រៃ​ឬស្សី​ដែល​ដំរី​ចូល​ចិត្ត។​ដំរី​ទាំង​នោះ​គឺជា​ដំរី​ចាស់ៗ​និង​មាន​ជំងឺ៕

XS
SM
MD
LG