រដ្ឋមន្ត្រីក្រសួងការពារប្រទេសស.រ.អា. Ash Carterបានបំពេញទស្សនកិច្ចលើនាវាចម្បាំងស.រ.អា.ដែលកំពុងល្បាតក្នុងតំបន់សមុទ្រចិនខាងត្បូងកាលពីថ្ងៃសុក្រ ដើម្បីបញ្ជាក់ពីការប្តេជ្ញាចិត្តរបស់ស.រ.អា.ក្នុងតំបន់។
ថ្លែងទៅកាន់ក្រុមអ្នកយកព័ត៌មាននៅលើនាវា USS John C. Stennis ដែលមានផ្ទុកយន្តហោះប្រតិកម្ម លោក Carter បានថ្លែងថា ស.រ.អា.«មានបំណងបន្តដើរតួនាទីរក្សាសន្តិភាព ស្ថិរភាព នៅក្នុងតំបន់។
ស.រ.អា.បាននិយាយថា ខ្លួនបង្កើនវត្តមានរបស់ខ្លួនក្នុងតំបន់សមុទ្រចិនខាងត្បូងនិងក្នុងតំបន់អាស៊ីប៉ាស៊ីហ្វិកដ៏ទូលំទូលាយ ដើម្បីបង្ហាញការគាំទ្រដល់សម្ព័ន្ធមិត្តនានា តែមិនបានតម្រង់ទៅលើប្រទេសណាមួយទេ។ បំណងរបស់ស.រ.អា.គឺដើម្បីរក្សាសន្តិភាពនិងស្ថិរភាពចំពោះប្រទេសទាំងអស់។ នេះបើតាមការអះអាងរបស់លោក Carter។
មានទាហានជើងទឹកប្រមាណ ៥០០០ នាក់ដែលបម្រើការងារលើនាវា USS John C. Stennisហើយមានយន្តហោះចំនួនប្រមាណ៧៥គ្រឿង រួមទាំងយន្តហោះប្រតិកម្ម៥០ផងដែរ៕
