ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រុម​អ្នក​បញ្ចូល​បទ​ភ្លេង​នាំ​មុខ​គេ​ក្នុង​បរិយា​កាស​តន្រ្តីនៅ​ក្រុង​បាម៉ាកូ


អ្នក​បញ្ចូលភ្លេងម្នាក់នៅ​លើ​ផ្លូវ​ក្នុង​ទី​ក្រុង​ Bamako (VOA/K. Höije).
អ្នក​បញ្ចូលភ្លេងម្នាក់នៅ​លើ​ផ្លូវ​ក្នុង​ទី​ក្រុង​ Bamako (VOA/K. Höije).

លើ​ផ្លូវ​ដ៏​មមារញឹក​នៃ​ទីក្រុង ​Bamako ​រដ្ឋធានី​នៃ​ប្រទេស​ម៉ាលី​ក្នុង​ទ្វីប​អាហ្រិ្វក​ ក្រុម​យុវជន​វ័យ​ក្មេង​​នឹង​បញ្ចូល​បទចម្រៀង​ថ្មី​ល្បីៗ​ជាច្រើន​ទៅ​ក្នុង​ទូរស័ព្ទ​ដៃ​របស់​អ្នក​ ឬ​កាត​ផ្ទុក​ឯកសារ​ដោយ​​មិនគិត​ថ្លៃ។ ពួកគេ​ត្រូវ​បាន​គេ​បាន​ហៅ​ថា «​Telechargeurs»​ ឬ​ «​Downloaders»។

នៅ​ពេល​ដែល​ Sidiki Diabaté ​ដែល​ជា​កូន​ប្រុស​របស់​លោក ​Toumani Diabaté សាស្រ្តាចារ្យ​ឧបករណ៍​តន្រ្តី ​Kora​ នៃ​ប្រទេស​ម៉ាលី​ចង់​ផ្សព្វផ្សាយ​ស្នាដៃ​ចម្រៀង​ចុង​ក្រោយ​បំផុត​ គាត់​មិន​បាន​ទាក់ទង​ទៅ​ខាង​វិទ្យុ​ ឬ​ក៏​ខាង​ទូរទស្សន៏​នោះ​ទេ​។​ ផ្ទុយ​ទៅ​វិញ​គាត់​បាន​បញ្ចូន​ទៅ​អ្នកគ្រប់គ្រង​របស់​គាត់​ទៅ​ផ្លូវ​ Fankélé Diarra​ ដើម្បី​ទៅ​ជួប​ក្រុម «​Telechargeurs»​។​

​ក្រុម​យុវជន​ទាំង​នោះ​ឈ្ងោក​លើ​កំព្យូទ័រ​របស់​ពួកគេ​។ ពួកគេ​ផ្ទេរ​បទ​ភ្លេង​ទៅ​ទូរស័ព្ទ​ដៃ​ជាច្រើន​ និង​ USB ដោយ​យក​ត្រឹម​តែ​៤​សេន​ក្នុង​១​បទ។ ​ Sidiki​ គឺ​ជា​អ្នក​ចម្រៀង​ដែល​គេ​សួររក​ច្រើន​បំផុត​។​

ការ​ចាក់​ចម្រៀង​របស់​គាត់​នៅ​ថ្ងៃ​ដែល​ស្ងាត់​មនុស្ស​ អាច​ទាក់ទាញ​បាន​អតិថិជន​ជា​ច្រើន។

អ្នក​បញ្ចូល​ភ្លេង​ម្នាក់​ឈ្មោះ​ Alfouseyni Ballo និយាយ​ថា​ «ផ្លូវ​នេះ​ដូចជា​ផ្សារ​មួយ​អញ្ចឹង​។​ បើសិន​ជា​អ្នក​ចង់​ឲ្យ​ស្នាដៃ​ចម្រៀង​ផ្សព្វផ្សាយ​ដល់​មនុស្ស​ម្នា​ទូទៅ​ នេះ​ជា​កន្លែងដែល​អ្នក​ត្រូវ​ទៅ។​ អ្នកមិន​អាចលក់​កាសែត​និង​ CD ចម្រៀង​ទៀត​នោះ​ទេ​។​ អ្នក​គ្រប់​គ្នា​ប្រើ​កាត​ផ្ទុក​ឯកសារ ​(Memory Card)»។

ការដាច់​អគ្គិសនី​ជា​ញឹកញាប់ ​និង​សេវា​អ៊ិនធឺណិត​មិន​សូវ​ល្អ​និង​ដែល​នៅ​តែ​មាន​តម្លៃ​ថ្លៃ​សម្រាប់​ប្រជាជន​ម៉ាលី​ជាច្រើន​នោះ​ ​បាន​បង្កើត​ឲ្យ​មាន​ទីផ្សារ​ពិសេស​មួយ​សម្រាប់​យុវវ័យ​នៅ​ទីក្រុង​ដែល​មាន​ជំនាញ​ផ្នែក​បច្ចេកវិទ្យា។​

​លោក​ Alfouseyni Balloនិយាយ​ថា​ «​យើង​ស្គាល់​ចម្រៀង​ដែល​ពេញនិយម​ជាច្រើន​ បទ​ភ្លេង​ដែល​ធ្វើ​ឲ្យ​មនុស្សរាំ​។​ មនុស្ស​គ្រប់​គ្នា​តែងតែ​ស្វែង​រក​ចម្រៀង​ណា​ដែល​ចេញ​ថ្មី​បំផុត​។​ បើសិន​ជា​ខ្ញុំ​ចូល​ចិត្ត​ចម្រៀង​មួយ​ណា​ ខ្ញុំ​នឹង​ណែ​នាំ​វា»។

បទ​ចម្រៀង​ដែល​មាន​ការនិយម​សួរ​រក​បំផុត​នោះ​គឺ​ ចម្រៀង​រ៉េប​របស់​ម៉ាលី។

សព្វថ្ងៃ​នេះ​អ្នកចម្រៀង​រ៉េប​ ជា​មនុស្ស​តែ​ម្នាក់​ប៉ុណ្ណោះ​ក្រៅ​ពី​អ្នក​ដឹកនាំ​សាសនា​ ដែល​អាច​ធ្វើ​ឲ្យ​ពហុកីឡាដ្ឋាន​ដ៏​ធំ​របស់​ក្រុង​បាម៉ាកូ​ពោរពេញទៅ​ដោយ​មនុស្ស​កុះករ។​

ហើយ​អ៊ិនធឺណិត​កំពុង​ជំរុញ​ឲ្យ​ឧស្សាហកម្ម​តន្រី្ត​អាហ្វ្រិក​ឆ្ពោះ​ទៅ​រក​គំរូ​អាជីវកម្ម​ថ្មី​យ៉ាងច្រើន​ ដែល​អាច​ធ្វើឲ្យ​ក្រុមហ៊ុន​ទូរស័ព្ទ​ចល័ត​ផ្សេងៗ​ក្លាយ​ជា​ក្រុម​ហ៊ុន​ចែកចាយ​តន្រ្តី​។​

​ថ្មី​ៗ​នេះ​ អ្នក​ចម្រៀង​រ៉េប​របស់​ម៉ាលី​ លោក ​Mylmo ​បាន​ចុះហត្ថាលេខា​លើ​កិច្ចព្រមព្រៀង​ឧបត្ថម្ភ​ដែល​នឹង​ទទួល​បាន​កម្រៃ​យ៉ាង​ច្រើន​មួយ​ជាមួយ​នឹង​អ្នក​ផ្តល់សេវា​ទូរស័ព្ទ​ Orange Mali។ បទ​ចម្រៀង​ដែល​ទើប​តែ​ចេញ​ អាច​រក​បាន​ទិញ​បាន​តែ​ជាមួយ​កម្មវិធី​តន្រ្តី​របស់​ក្រុមហ៊ុន​ Orange ប៉ុណ្ណោះ។​ អ្នកចម្រៀង​ផ្សេង​ទៀត​បាន​ចុះកុងត្រា​ជាមួយ​ក្រុមហ៊ុន​ទូរស័ព្ទ​ចល័ត​ម៉ាលី​ជាច្រើន​ទៀត​ ដូចជា​ Malitel ឬ​ Sotelma។​

ប៉ុន្តែ​មិនមែន​អ្នក​ចម្រៀង​ទាំងអស់​សប្បាយ​ចិត្ត​នៅ​ពេល​ដែល​ចម្រៀង​របស់​ពួក​គេ​ត្រូវ​បាន​ចែកចាយ​នៅ​តាម​ផ្លូវ​នោះ​ទេ។​ អ្នក​បញ្ចូល​ភ្លេង​នៅ​តាម​ផ្លូវ​មិន​បាន​ចែក​រំលែក​ប្រាក់​ចំណេញ​របស់​ពួក​គេ​ឡើយ។​

លោក​ Coulibaly និយាយ​ថា​ «​បើសិន​ជា​ខ្ញុំ​មិន​ទាញ​យក​ចម្រៀង​នោះទេ​ អ្នកផ្សេងទៀត​នឹង​ធ្វើវា។​ អ្នក​ចម្រៀង​មួយ​ចំនួន​នៅ​តែ​ចេញ​អាល់ប៊ុម​ចម្រៀង​របស់​ពួក​គេ​ ប៉ុន្តែ​ជាមួយ​នឹង​បច្ចេកវិទ្យា​ថ្មី​ អ្វី​គ្រប់យ៉ាង​អាច​រក​បាន​តាម​អ៊ិនធឺណិត។ អ្នក​ចម្រៀង​ទាំងនោះ​មិន​លក់​ចម្រៀង​ដើម្បី​រក​កម្រៃ​ទៀត​នោះ​ទេ ពួកគេ​រក​កម្រៃ​តាម​ការ​ប្រគុំ​តន្រ្តី​ផ្សេងៗ»។​

សហព័ន្ធ​តន្រ្តីករ​ម៉ាលី​ បាន​ព្យាយាម​ប្រយុទ្ធ​នឹង​ការលួចបទ​ចម្រៀង​ខុសច្បាប់​។​ កាលពីឆ្នាំ​២០១៤​ រដ្ឋាភិបាល​បាន​ផ្តល់​ថវិកា​ឲ្យ​សមាគមនោះនូវ​ទឹកប្រាក់​ចំនួន​១​ដុល្លារ​កាត់​ចេញ​ពី​រាល់​ការ​លក់​ស៊ីម​កាត​របស់​ក្រុមហ៊ុន​ទូរស័ព្ទ​ចល័ត​។​ ប៉ុន្តែ​ការ​យក​កម្រៃ​ពន្ធ​ដូចនេះ​ត្រូវ​បាន​ច្រាន​ចោល​វិញ​តុលាការ។​

ស្រប​ពេល​ដែរ​នោះ ក្រុម​ហ៊ុន​ថត​ចម្រៀង​ដែល​ឈរជើង​យូរ​មក​ហើយ​ដូច​ជា Mali K7 កំពុងតែ​ព្យាយាម​ប្រកួត​ជាមួយ​បច្ចេកវិទ្យា​ថ្មី​ និង​វិធី​សាស្រ្ត​ក្នុង​ការចែក​ចាយ។​ ហើយ​តន្ត្រី​ករ​ទាំងនោះ​ពឹង​ទៅ​លើ​អាពាហ៍ពិពាហ៍​ ការប្រគុំ​តន្រ្តី​ដែល​មិនងាយ​នឹង​ទទួល​បាន​កម្រៃ និង​ការប្រគុំ​តន្រ្តី​ទេសចរណ៍​អន្តរជាតិ​សម្រាប់​អ្នក​ដែល​មាន​សំណាងដើម្បី​ចិញ្ចឹម​ជីវិត៕

ប្រែសម្រួល​ដោយ ទុំ ម្លិះ

XS
SM
MD
LG