ប្រទេសអាស៊ែបៃហ្សង់ បានចោទប្រកាន់ប្រទេសអាមេនីនៅថ្ងៃពុធ ថាបានព្យាយាមវាយប្រហារទៅលើតំបន់បំពង់បង្ហូរប្រេងនិងឧស្ម័នរបស់ខ្លួន ហើយព្រមានឆ្លើយតបវិញខ្លាំងៗ ខណៈមានភាពតានតឹងកាន់តែខ្លាំងជុំវិញបទឈប់បាញ់មួយដែលមិនទាន់ត្រូវភាគីគោរពនៅឡើយ នៅទឹកដីជម្លោះតំបន់ Nagorno-Karabakh នោះ។ នេះបើតាមការរាយការណ៍របស់ទីភ្នាក់ងារ Reuters។
អាមេនីបានបដិសេធការចោទប្រកាន់ដែលថា ខ្លួនបានវាយប្រហារទៅលើតំបន់ដែលមានបំពង់បង្ហូរប្រេងរបស់អាស៊ែបៃហ្សង់ ដែលផ្គត់ផ្គង់ដល់ទីផ្សារប្រេងនិងឧស្ម័នពិភពលោកនោះ។ ការបារម្ភកំពុងកើនឡើង ជុំវិញការបរាជ័យក្នុងការអនុវត្តបទឈប់បាញ់ដែលមានរយៈពេល៤ថ្ងៃមកហើយ ដើម្បីបញ្ចប់ការប្រយុទ្ធគ្នាធ្ងន់ធ្ងរបំផុត ក្នុងរយៈពេលរាប់ទសវត្សកន្លងទៅនេះ ជុំវិញជម្លោះដណ្តើមទឹកដីដ៏តូចក្នុងតំបន់ Caucasus ខាងត្បូងនេះ។
មានមនុស្សជាង៥០០នាក់ហើយ ត្រូវបានសម្លាប់ក្នុងការប្រយុទ្ធគ្នានៃកងទ័ពប្រទេសទាំងពីរ ដែលបានផ្ទុះឡើងចាប់តាំងពីថ្ងៃទី២៧ ខែកញ្ញាមក នៅក្នុងតំបន់ Nagorno-Karabakh ដែលត្រូវបានទទួលស្គាល់ដោយអន្តរជាតិ ថាជាទឹកដីរបស់ប្រទេសអាស៊ែបៃហ្សង់ ប៉ុន្តែត្រូវបានគ្រប់គ្រងនិងរស់នៅដោយជនជាតិអាមេនីនោះ។
អំពើហិង្សា ដែលនៅតែបន្តកាលពីថ្ងៃពុធនេះ បានធ្វើឲ្យគេបារម្ភថា ប្រទេសមានអំណាចក្នុងតំបន់ដែលមានប្រទេសតួកគីនិងរុស្សីនោះ អាចត្រូវបានអូសទាញឲ្យចូលពាក់ព័ន្ធនៅក្នុងជម្លោះនោះផងដែរ៕
