បុគ្គលិកជួយសង្គ្រោះនៅក្នុងទីក្រុង Mexico City ដែលរងការបំផ្លាញដោយការរញ្ជួយផែនដីកាលពីថ្ងៃសុក្របានបន្តការរុករកមនុស្សដែលកប់នៅក្នុងកម្ទេចបាក់បែករបស់អាគារដែលបានដួលរលំបន្ទាប់ពីកិច្ចប្រតិបត្តិការនោះបានត្រូវផ្អាកអស់រយៈពេលមួយយប់។
កាលពីដំបូង ពួកមន្រ្តីបានដំឡើងចំនួនមនុស្សស្លាប់ពីការរញ្ជួផែនដីដែលមានកម្លាំង ៧.១ រិចទ័រកាលពីថ្ងៃអង្គារទៅដល់២៨៦នាក់ ក៏ប៉ុន្តែការរាប់ចំនួនមនុស្សស្លាប់ត្រូវគេរំពឹងថានឹងកើនឡើងនៅពេលដែលពួកអ្នកជួយសង្គ្រោះបន្តស្វែងរកមនុស្សដែលជាប់នៅក្នុងកម្ទេចបាក់បែកនោះ។
លោក Luis Felipe Puente ប្រធានការពារជនស៊ីវិលបាននិយាយថា មនុស្សយ៉ាងហោចណាស់ក៏១៤៨នាក់ដែរបានត្រូវបញ្ជាក់ថាស្លាប់នៅក្នុងទីក្រុង Mexico City នេះ។ នៅក្នុងសារតាមប្រព័ន្ធ Twitter កាលពីថ្ងៃសុក្រ លោកបាននិយាយថា មនុស្ស៧៣នាក់ផ្សេងទៀតបានស្លាប់នៅក្នុងរដ្ឋ Morelos រួមជាមួយមនុស្ស៤៥នាក់ផ្សេងទៀតនៅក្នុងរដ្ឋ Peubla ១៣នាក់នៅក្នុងទីក្រុង Mexico ៦នាក់ទៀតនៅរដ្ឋ Guerrero និងម្នាក់នៅក្នុងរដ្ឋ Oaxaca។
ពួកក្រុមជួយសង្គ្រោះនៅតំបន់ភាគកណ្តាលប្រទេសម៉ិចស៊ិចបានធ្វើការ២៤ម៉ោងនៅអាគារដួលរលំចាប់តាំងពីថ្ងៃអង្គារមកដើម្បីរុករកមនុស្សនៅរស់រានមានជីវិត។
លោកប្រធានាធិបតីម៉ិចស៊ិច Enrique Pena Nieto បានប្រកាសការកាន់ទុកជាតិរយៈពេល៣ថ្ងៃ។
លោកបានសរសើរការឆ្លើយតបភ្លាមៗរបស់ជនជាតិម៉ិចស៊ិចដល់គ្រោះមហន្តរាយនេះ ខណៈដែលលោកសង្កត់ពីអទិភាពជួយសង្គ្រោះជីវិតមនុស្សហើយនិងការយកចិត្តទុកដាក់ខាងវេជ្ជសាស្រ្តសម្រាប់អ្នកត្រូវការជំនួយ៕
