សាកលវិទ្យាល័យ New South Wales ក្នុងទីក្រុង Sydney (ស៊ីដនី) ប្រទេសអូស្ត្រាលីបានព្រមានថា «ការជ្រៀតជ្រែកពីបរទេសអាចមានក្នុងទម្រង់ជាការយាយីធ្វើបាប ការបំភិតបំភ័យ ឬការគំរាមកំហែង ដោយសំដៅលើនិស្សិតនិងបុគ្គលិកសាកលវិទ្យាល័យ ក្នុងនាមរដ្ឋាភិបាលបរទេសមួយ»។
សាកលវិទ្យាល័យបាននិយាយថា៖ «សកម្មភាពបែបនេះគំរាមកំហែងសេរីភាពការសិក្សា និងសេរីភាពក្នុងការបញ្ចេញមតិ»។
បុគ្គលិកនិងនិស្សិតសាកលវិទ្យាល័យនេះ បានទទួលសារអ៊ីមែលកាលពីខែមិថុនានិងកក្កដាកន្លងទៅ ដោយជូនដំណឹងដល់ពួកគេពីហានិភ័យនៃការជ្រៀតជ្រែក ពីសំណាក់បរទេសនៅក្នុងសាកលវិទ្យាល័យ។
កាលពីខែមិថុនា ឆ្នាំ២០២១កន្លងទៅ របាយការណ៍របស់អង្គការឃ្លាំមើលសិទ្ធិមនុស្ស Human Rights Watch ក្នុងប្រទេសអូស្រ្តាលីបានអះអាងថា «រដ្ឋាភិបាលចិនតាមឃ្លាំមើលនិស្សិតមកពីចិនដីគោកនិងកោះហុងកុង នៅតាមសាកលវិទ្យាល័យនានានៅក្នុងប្រទេសអូស្រ្តាលី ដោយនិស្សិតទាំងនោះជួបប្រទះការយាយីធ្វើបាប និងការបំភិតបំភ័យដោយផ្ទាល់ពីមិត្តរួមថ្នាក់ជាជនជាតិចិនដូចគ្នា»។
ជាការឆ្លើយតបទៅនឹងរបាយការណ៍ឆ្នាំ ២០២១នោះ ស្ថានទូតចិននៅក្នុងក្រុងកង់បេរ៉ា ប្រទេសអូស្ត្រាលី បានច្រានចោលការអះអាងរបស់អង្គការឃ្លាំមើលសិទ្ធិមនុស្ស Human Rights Watch ដោយហៅរបាយការណ៍នោះថា «មានភាពលម្អៀង»។
អ្នកស្រី Daniela Gavshon ប្រធានអង្គការឃ្លាំមើលសិទ្ធិមនុស្សអូស្រ្តាលី បានប្រាប់បណ្តាញផ្សព្វផ្សាយ Australian Broadcasting Corp. ថា ឥរិយាបថគំរាមកំហែងកំពុងតែបន្តកើតមាន។
អ្នកស្រីថ្លែងថា៖ «សាស្រ្តាចារ្យ គ្រូនិងនិស្សិតនិយាយថា ក្រុមនិស្សិតគាំទ្រចិនមិនចាំបាច់តែត្រូវបានដឹកនាំដោយកម្លាំងពីក្រៅប្រទេសនោះទេ គឺពួកគេបង្ហាញភាពស្មោះស្ម័គ្រទៅនឹងរដ្ឋរបស់គេស្រាប់ទៅហើយ។ នៅពេលពួកគេជឿថា មានការប្រមាថរិះគន់ទៅលើចិនឬប្រព័ន្ធដឹកនាំក្នុងប្រទេសចិននោះ ពួកគេបង្ខំចិត្តក្នុងការការពារជាតិរបស់គេ។ ដូច្នេះពួកគេនឹងប្រព្រឹត្តទង្វើផ្សេងៗដូចជាការ បំភិតបំភ័យ ការគំរាមកំហែង ក៏ដូចជាការបង្ហាញព័ត៌មានផ្ទាល់ខ្លួនរបស់និស្សិតផ្សេងទៀត តាមប្រព័ន្ធអ៊ីនធឺណិតជាដើម។ ដូចនេះ ដូចអ្នកដឹងហើយ ការបង្ហាញព័ត៌មានផ្ទាល់ខ្លួនរបស់និស្សិតដទៃ គឺជាការចូលរួមក្នុងឥរិយាបថគំរាមកំហែងពិតប្រាកដ»។
ស្ថានទូតចិនក្នុងក្រុងកង់បេរ៉ា ប្រទេសអូស្ត្រាលី មិនបានឆ្លើយតបនឹងសំណើសុំអធិប្បាយរបស់វីអូអេ ពាក់ព័ន្ធនឹងការព្រួយបារម្ភរបស់សាកលវិទ្យាល័យនោះទេ។
ក្រៅពីការចោទប្រកាន់ដល់ប្រទេសចិន ជុំវិញការគំរាមកំហែងនៅសាកលវិទ្យាល័យនោះ ក្រុមសកម្មជនក៏បានចោទប្រកាន់ប្រទេសដអ៊ីរ៉ង់ និងប្រទេសរវ៉ាន់ដា ពី «ការបង្ខិតបង្ខំឆ្លងដែន» នៅក្នុងអូស្រ្តាលីផងដែរ។
មកទល់ពេលនេះ គេនៅមិនទាន់មានឃើញការឆ្លើយតបជាសាធារណៈណាមួយ ពីសំណាក់រដ្ឋាភិបាលប្រទេសខាងលើ ជុំវិញការចោទប្រកាន់ទាំងនោះទេ។
កាលពីខែមេសាកន្លងទៅ ក្រសួងការពារជាតិអូស្រ្តាលីបានព្រមានដល់និស្សិតបរទេសពីហានិភ័យផ្នែកសន្តិសុខដែលអាចកើតមានឡើង ខណៈសាកលវិទ្យាល័យត្រូវប្រឈមនឹងការជ្រៀតជ្រែកពីបរទេស។
កាលពីឆ្នាំ ២០១៩ អតីតរដ្ឋាភិបាលអភិរក្សនិយមក្រុងកង់បេរ៉ាបានព្រមានថា ចិនអាចដាក់ឥទ្ធិពលខ្លាំងនៅតាមបណ្តាសាកលវិទ្យាល័យនានាក្នុងប្រទេសអូស្ត្រាលី។
ក្រុមនិស្សិតដែលបង្ហាញការគាំទ្រដល់សកម្មជនលទ្ធិប្រជាធិបតេយ្យក្រុងហុងកុងបាននិយាយថា ពួកគេត្រូវបានដាក់នៅក្រោមការឃ្លាំមើលដោយក្រុមបុគ្គល ដែលស្មោះស្ម័គ្រនឹងរដ្ឋាភិបាលក្រុងប៉េកាំង។
ក្រុមការងារប្រឆាំងនឹងការជ្រៀតជ្រែកពីបរទេសក្នុងសាកលវិទ្យាល័យ ត្រូវបានបង្កើតឡើង ក្នុងប្រទេសអូស្រ្តាលី កាលពីខែវិច្ឆិកា ឆ្នាំ២០១៩។ បន្ទាប់មក ក្រុមការងារនេះបានចេញសេចក្តីណែនាំដើម្បីជួយបញ្ឈប់ការជ្រែតជ្រែកនៅតាមថ្នាក់រៀននានា។
កាលពីគ្រានោះ គ្រូនិងនិស្សិតខ្លះបានលើកឡើងពីការពិភាក្សា ជុំវិញឥទ្ធិពលរបស់រដ្ឋាភិបាលក្រុងប៉េកាំងលើសាកលវិទ្យាល័យនានារបស់អូស្ត្រាលីថា «អារម្មណ៍ប្រឆាំងចិន» គឺមានសភាពខ្លាំងក្លា៕
ប្រែសម្រួលដោយលោក ណឹម សុភ័ក្រ្តបញ្ញា
