ភ្ជាប់​ទៅ​គេហទំព័រ​ទាក់ទង

ប្រទេស​​អូស្រ្តាលី ​​កាត់​បន្ថយ​​ជំនួយ​បរទេស

  • Phil Mercer

លោក ​​Joe Hockey ​​ប្រធាន​រតនា​គារ​សហព័ន្ធ ​បាន​និយាយ​កាល​ពី​ថ្ងៃ​អង្គារ​ថា ផែនការ​ហិរញ្ញវត្ថុ​របស់​លោក ​នឹង​ធ្វើ​ឲ្យ​ប្រទេស​កាន់​តែ​ខ្លាំង ​មាន​សុវត្ថិភាព​ និង​មាន​ភាព​រុងរឿង​កាន់​តែ​ខ្លាំង​ឡើង។

ប្រទេស​អូស្រ្តាលី ​កំពុង​កាត់​ជំនួយ​បរទេស​របស់​ខ្លួន​ ​ក៏ប៉ុន្តែ​នឹង​បង្កើន​ការ​ចំណាយ​ប្រឆាំង​ភេរវកម្ម​របស់​ខ្លួន​នៅ​ក្នុង​វិធានការ​ដែល​ចែង​ក្នុង​ថវិកា ប្រចាំ​ឆ្នាំ​របស់​ខ្លួន។ លោក Joe Hockey ប្រធាន​រតនា​គារ​សហព័ន្ធ ​បាន​និយាយ​កាល​ពី​ថ្ងៃ​អង្គារ​ថា ផែនការ​ហិរញ្ញវត្ថុ​របស់​លោក ​នឹង​ធ្វើ​ឲ្យ​ប្រទេស​កាន់​តែ​ខ្លាំង ​មាន​សុវត្ថិភាព​ និង​មាន​ភាព​រុងរឿង​កាន់​តែ​ខ្លាំង​ឡើង។ ឱនភាព​ថវិកា​របស់​អូស្រ្តាលី​បាន​កើន​ឡើងដល់២៨​ពាន់​លាន​ដុល្លារ ​នៅពេល​ដែលចំណូល​ពី​ពន្ធដារ​ និង​ប្រាក់​កម្រៃ​អណ្តូង​រ៉ែបាន​ធ្លាក់​ចុះ។

រដ្ឋាភិបាល​អូស្រ្តាលី​កំពុង​កាត់​បន្ថយថវិកា​ជំនួយ​បរទេស​របស់​ខ្លួន​ចំនួន​៤០​ភាគរយ​ នៅ​ពេល​ដែល​ខ្លួន​ព្យាយាម​ធ្វើ​ឲ្យ​មាន​តុល្យភាព​ក្នុង​ការ​ចាយវាយរបស់​ខ្លួន​នៅ​ក្នុង​ប្រទេស។ ឥណ្ឌូនេស៊ី ​ដែល​ជា​ប្រទេស​ទទួល​បានជំនួយ​អូស្រ្តាលី​ដ៏​ច្រើន​បំផុត ​នឹង​ឃើញ​ការកាត់​បន្ថយ​ប្រាក់ជំនួយចំនួន​១៧៥​លាន​ដុល្លារ។

លោក Matt Tinkler ​អ្នកនាំ​ពាក្យ​អង្គការ​ជួយ​សង្គ្រោះកុមារ​អូស្រ្តាលី ​និយាយ​ថា ​មនុស្ស​ក្រីក្រ​បំផុត ​នឹង​ទទួល​រងគ្រោះ​ខ្លាំង​ជាង​គេ។

អ្នកដែល​ទទួល​ផល​ប៉ះពាល់​ គឺ​ជន​ដែល​ត្រូវការ​ការជួយ​ឧបត្ថម្ភ​នៅ​ប្រទេស​ឥណ្ឌូនេស៊ី។ ការណ៍​នេះ​មាន​ន័យ​ថា កូនក្មេង​កាន់​តែ​តិច​ទៅ​នឹង​បាន​ទទួល​ការ​ចាក់​ថ្នាំ​បង្ការរោគ ក្មេង​ស្រី​កាន់​តែ​តិច​ទៅ​នឹង​ទៅ​សាលា​រៀន ស្រ្តី​កាន់​តែ​តិច​ទៅ ​នឹង​បាន​ទទួល​អំណាច​តាម​រយៈ​ការងារ ​ដូច្នេះ​មាន​ការ​ប៉ះពាល់​ពិតប្រាកដដល់​ជនក្រីក្រ​ឥណ្ឌូនេស៊ី ហើយ​តំបន់​របស់​យើង ​ដែល​នឹង​មាន​ផល​ប៉ះ​ពាល់ដ៏​ធ្ងន់​ធ្ងរ​ពី​ការកាត់​បន្ថយ​ថវិកា​នេះ‍»។

អង្គការ​សប្បុរស​ធម៌ ​ក៏​បាន​ថ្កោល​ទោស​ដែរ​ចំពោះ​ការសម្រេច​របស់​អូស្រ្តាលី​ក្នុង​ការ​កាត់​បន្ថយ​ជំនួយ​ទៅ​កាន់​ទ្វីប​អាហ្វ្រិក​ចំនួន​៧០​ភាគរយ។ អង្គការ Oxfamបាន​និយាយ​ថា ​នៅ​តំបន់​វាលខ្សាច់​សាហារ៉ាខាងត្បូង​នៃ​ទ្វីប​អាហ្វ្រិក​ ​ដែល​ជា​តំបន់​ក្រីក្រ​បំផុត​នៅ​នៅ​ក្នុង​ពិភពលោក ​ជំនួយ​អូស្រ្តាលី​ថ្មី​ឥឡូវ​នេះ​មាន​ចំនួន​តិចតួច​ជាទីបំផុត។

ក្រុម​អ្នក​រិះគន់​និយាយ​ថា ​ការ​កាត់​បន្ថយ​ជំនួយ​នេះ​ធ្វើ​ឲ្យ​ខូច​កិត្យានុភាព​របស់​អូស្រ្តាលី​នៅ​ឆាក​អន្តរជាតិ។

ក្រុម​មន្រ្តី​ក្នុង​ទីក្រុងCanberra បាន​និយាយ​ថា ការសម្រេចកាត់​បន្ថយ​ជំនួយ​បរទេស ​បាន​ធ្វើ​ឡើង​បន្ទាប់​ពី​មាន​ការ​ពិចារណា​តើប្រទេស​ទទួលជំនួយរបស់​ខ្លួន​ណា​ខ្លះ ដែល​ក៏​ជាម្ចាស់​ជំនួយទៅ​ប្រទេស​ដ៏ទៃ​ទៀតនោះ។ ការរីកលូតលាស់​សេដ្ឋ​កិច្ច និងសមត្ថភាព​របស់រដ្ឋាភិបាល​បរទេស​ដើម្បី​ដោះស្រាយ​បញ្ហា​ភាព​ក្រីក្រ​ និង​សេចក្តី​ត្រូវ​ការ​ក៏​ត្រូវបាន​ពិចារណា​ដែរ។ ក្រុមរដ្ឋ​មន្រ្តីនិ​យាយ​ទទូច​ថា ​ការ​កាត់​បន្ថយ​ជំនួយទៅ​ឲ្យឥណ្ឌូនេស៊ីមិន​ទាក់​ទិន​នឹង​ការ​ប្រ​ហារ​ជី​វិត​អ្នក​ជួញដូរថ្នាំ​ញៀន​ជាតិ​អូស្រ្តាលី​២​នាក់ថ្មី​ៗ​នេះ ​ដែល​បាន​បណ្តាល​មាន​ការប្រេះ​ឆា​ខាង​ការទូត​នោះទេ៕

ប្រែ​សម្រួល​ដោយ ​ជឹង ​ប៉ូជីន

XS
SM
MD
LG