រដ្ឋសភាអូស្ត្រាលីនឹងធ្វើការបោះឆ្នោតនាសប្ដាហ៍ក្រោយនេះលើគម្រោងរារាំងជនភៀសខ្លួនណាដែលធ្វើដំណើរមកកាន់ប្រទេសអូស្ត្រាលីតាមទូកមិនឲ្យទទួលបានទិដ្ឋាការរស់នៅ ទិដ្ឋាការទេសចរណ៍ ឬក៏មានសិទ្ធបង្កើតអាជីវកម្មនៅក្នុងប្រទេសអូស្ត្រាលីនោះទេ។
លោកនាយករដ្ឋមន្ត្រី Malcolm Turnbull បាននិយាយថា បម្រាមមួយជីវិតនេះកំពុងត្រូវបានធ្វើឲ្យក្លាយជាច្បាប់ ដើម្បីរារាំងអ្នករត់ពន្ធមនុស្សកុំឲ្យរត់ពន្ធចូលមកក្នុងទឹកដីអូស្ត្រាលី។
លោក Turnbull បាននិយាយថា៖ «នេះជាការប្រយុទ្ធតស៊ូនៃឆន្ទៈរវាងប្រជាពលរដ្ឋអូស្ត្រាលី ដែលមានរដ្ឋាភិបាលអូស្ត្រាលីជាតំណាង និងឧក្រិដ្ឋជនដែលជាអ្នករត់ពន្ធមនុស្ស»។
ប៉ុន្តែ ទោះបីជាច្បាប់ដែលបានស្នើឡើងនេះ មានគោលបំណងក្នុងការបញ្ឈប់សកម្មភាពរបស់អ្នករត់ពន្ធមនុស្សក៏ដោយ ក៏អ្នកដែលត្រូវរងការប៉ះពាល់ពីច្បាប់នេះ គឺជាជនភៀសខ្លួនរាប់ពាន់នាក់ ដែលមកពីទ្វីបអាហ្វ្រិក អាស៊ី និងមជ្ឈិមបូព៌ា។
ច្បាប់ថ្មីនេះនឹងប៉ះពាល់ដល់អ្នកធ្វើដំណើរតាមទូក ដែលត្រូវបានបញ្ជូនទៅកាន់មណ្ឌលដំណើរការផ្លូវច្បាប់មួយរបស់ប្រទេសអូស្ត្រាលីនៅលើកោះ Nauru ឬក៏កោះ Manus នៃប្រទេសប៉ាពូអាស៊ីនូវែលហ្គីណេនៅត្រឹមថ្ងៃទី ១៩ ខែកក្កដា ឆ្នាំ ២០១៣។ រដ្ឋាភិបាលក្រុងកង់បេរ៉ាបានរារាំងជនភៀសខ្លួនទាំងនោះមិនឲ្យតាំងទីនៅក្នុងប្រទេសអូស្ត្រាលី ទោះបីជាពួកគេត្រូវបានគេរកឃើញថាជាជនភៀសខ្លួនពិតប្រាកដក៏ដោយ។ ជំនួសមកវិញ រដ្ឋាភិបាលអូស្ត្រាលីបានផ្ដល់ឲ្យអ្នកស្វែងរកសិទ្ធជ្រកកោនទាំងនោះនូវជម្រើសមួយចំនួនដូចជាធ្វើដំណើរត្រឡប់ទៅកាន់ប្រទេសកំណើតរបស់ខ្លួនវិញ បន្តជីវភាពរស់នៅនៅលើកោះដែលអូស្ត្រាលីបញ្ជូនទៅ ឬក៏ធ្វើដំណើរទៅកាន់ប្រទេសទីបី។
កុមារអាចត្រូវបានគេលើកលែងពីការរារាំងនេះ ដោយហេតុថា រដ្ឋមន្ត្រីអន្តោប្រវេសន៍អូស្ត្រាលីអាចមានលទ្ធភាពក្នុងការធ្វើការលើកលែងនេះបាននៅក្នុងច្បាប់ដែលកំពុងតែស្នើឡើងនេះ៕
