លោក Scott Morrison រដ្ឋមន្ត្រីក្រសួងហិរញ្ញវត្ថុនៃប្រទេសអូស្ត្រាលីបានជាប់ឆ្នោតជានាយករដ្ឋមន្ត្រីថ្មីរបស់ប្រទេសអូស្ត្រាលីនៅថ្ងៃសុក្រនេះ នៅក្នុងការបោះឆ្នោតមួយដោយគណបក្សសេរីនិយមដែលគ្រប់គ្រងប្រទេស។
លោក Morrison បានទទួលជ័យជម្នះនៅក្នុងការប្រកួតប្រជែងរវាងបេក្ខជនបីនាក់ ដោយលោកបានឈ្នះលោក Peter Dutton អតីតរដ្ឋមន្ត្រីក្រសូងមហាផ្ទៃដោយមានសំឡេងឆ្នោតគាំទ្រ ៤៥ ទល់នឹង ៤០។ លោកស្រី Julie Bishop រដ្ឋមន្ត្រីក្រសួងការបរទេសបានចាញ់នៅក្នុងការបោះឆ្នោតជុំទីមួយ។
ពួកអ្នកគាំទ្រលោក Dutton បានបង្ខំលោកនាយករដ្ឋមន្ត្រី Malcolm Turnbull ឱ្យបើកការប្រជុំពួកមេដឹកនាំគណបក្សនៅក្រោយលោកបានបាត់បង់ការគាំទ្រពីសមាជិកភាគច្រើននៃគណបក្សសេរីនិយម។ លោក Turnbull មិនបានជំទាស់នឹងលទ្ធផលនៃការបោះឆ្នោតនេះទេ ហើយលោកបាននិយាយថា លោកនឹងចុះចេញពីតំណែងនិងឈប់ធ្វើនយោបាយថែមទៀតផង។
ការជាប់ឆ្នោតរបស់លោក Morrison បាននាំឱ្យមានការបញ្ចប់ការប្រយុទ្ធគ្នាខាងនយោបាយនៅខាងក្នុងរដ្ឋាភិបាលអភិរក្សនិយមនៃប្រទេសអូស្ត្រាលី នៅមុនការបោះឆ្នោតសភាដែលមានកំណត់នឹងប្រព្រឹត្តទៅនៅខែឧសភា ឆ្នាំ២០១៩។លោកនឹងក្លាយទៅជានាយករដ្ឋមន្ត្រីទី៦របស់ប្រទេសអូស្ត្រាលីក្នុងរយៈពេល ១១ឆ្នាំ។
ចលាចលដោយចំហបស់គណបក្សសេរីនិយមគ្រាន់តែជាចំពូកថ្មីបំផុតនៅក្នុងរយៈពេលមួយនៃអស្ថិរភាពនយោបាយមិនធម្មតានៅក្នុងប្រទេសអូស្ត្រាលី ចាប់តាំងពីលោកអតីតនាយករដ្ឋមន្ត្រី John Howard បានចាកចេញពីតំណែងកាលពីឆ្នាំ ២០០៧ នៅក្រោយលោកបានកាន់តំណែងនេះចំនួន១១ឆ្នាំ ដោយគ្មានការបង្អាក់៕
