ទីក្រុង Melbourne ក្នុងប្រទេសអូស្ត្រាលីដែលត្រូវបានបិទសកម្មភាពសង្គម កំពុងប្រឈមមុខនឹងការរឹតត្បិតកាន់តែខ្លាំងឡើង នៅពេលដែលចំនួនអ្នកឆ្លងជំងឺកូវីដ១៩ នៅតែបន្តកើនឡើង។ ប្រជាពលរដ្ឋបានត្រឡប់ទៅស្ថានភាពដែលសកម្មភាពសង្គមត្រូវបានបិទ កាលពីដើមខែនេះ ហើយអាជ្ញាធរបានព្រមានថា ការរាតត្បាតនេះ នឹងនៅតែបន្តកើតឡើង ក្នុងរយៈពេលយូរទៀត។ ប្រទេសអូស្ត្រាលី មានកំណត់ត្រានៃករណីឆ្លងជំងឺកូវីដ១៩ ជាង១១.០០០នាក់ ហើយមនុស្ស១១៦នាក់ បានស្លាប់។
ការផ្ទុះឡើងថ្មីមួយទៀតនៃជំងឺកូវីដ១៩ នៅក្នុងក្រុង Melbourne ដែលមានមនុស្ស៥លាននាក់រស់នៅនោះ បានប៉ះពាល់ដល់ជោគជ័យកាលពីដំបូងរបស់អូស្ត្រាលី ក្នុងការដោះស្រាយបញ្ហាកូវីដ១៩នេះ។ ការឆ្លងរាប់រយករណី ត្រូវបានគេរាយការណ៍ជារៀងរាល់ថ្ងៃ។ មានករណីឆ្លងថ្មីចំនួន៤២៨នៅថ្ងៃទី១៧ ខែកក្កដា ដែលនេះជាចំនួនប្រចាំថ្ងៃខ្ពស់ជាងគេ ចាប់តាំងពីការរាតត្បាតបានចាប់ផ្តើមឡើង ហើយករណីថ្មីចំនួន២១៧ ត្រូវបានប្រកាសនៅថ្ងៃទី១៨ ខែកក្កដា។ ករណីភាគច្រើន គឺជាការឆ្លងនៅក្នុងតំបន់ដែលស្ថិតក្នុងការបិទសកម្មភាពសង្គម ដូចជាទីកន្លែងដែលបណ្តុំដោយមនុស្សច្រើន ដូចជានៅសាលារៀន និងផ្ទះថៃទាំជនចាស់ជរាជាដើមនោះ។
លោកសាស្ត្រាចារ្យ Brett Sutton គឺជាប្រធានមន្ត្រីសុខាភិបាលក្នុងរដ្ឋVictoria។ លោក Brett Sutton បាននិយាយក្នុងសម្តីដើមថា៖
«វាជារឿងដ៏សោកសង្រេង ព្រោះថា នឹងមានមនុស្ស ដែលត្រូវការការថែទាំយ៉ាងដិតដល់ ហើយនឹងមានមនុស្សជាច្រើននាក់ នឹងស្លាប់។ វាបានឆ្លុះបញ្ចាំងពីឥរិយាបថ និងការប្រែប្រួលយ៉ាងខ្លាំង បើប្រៀបធៀបទៅនឹងពេលមុននេះ។ តែថ្វីបើវាដូច្នេះក៏ដោយ ក៏យើងមានសង្ឃឹមថា ចំនួននេះ នឹងនៅថេរនៅក្នុងពេលប៉ុន្មានថ្ងៃខាងមុខនេះ»។
អភិបាលរដ្ឋ Victoria លោកDaniel Andrews និយាយថា ប្រសិនបើចំនួនឆ្លងមិននៅថេរទេនោះ រដ្ឋនឹងមានវិធានការបិទសកម្មភាពសង្គមកាន់តែតឹងរ៉ឹងជាងនេះទៀត។
លោក Daniel Andrews បាននិយាយក្នុងសម្តីដើមថា៖
«ប្រសិនបើទិន្ន័យបង្ហាញថា យុទ្ធសាស្ត្រនេះមិនមានប្រសិទ្ធភាពលឿនដូចអ្វីដែលយើងចង់បានទេនោះ នោះយើងប្រហែលត្រូវប្រើប្រាស់វិធានការ ថ្មីហើយ។ វិធានការ ថ្មី គឺដើម្បីការពារលោកអ្នក។ វិធានការ នេះ នឹងបម្រើផលប្រយោជន៍យើងទាំងអស់គ្នា»។
រលកនៃការឆ្លងថ្មី គឺបង្កឡើងដោយការបំពានផ្នែកសន្តិសុខនៅក្នុងប្រព័ន្ធដាក់មនុស្សឱ្យនៅដាច់ដោយឡែកក្នុងសណ្ឋាគារសម្រាប់អ្នកដំណើរដែលត្រឡប់មកប្រទេសអូស្ត្រាលីវិញ និងការប្រមូលផ្តុំគ្រួសារក្នុងទ្រង់ទ្រាយធំ ដែលវិធានអនាម័យ និងការរក្សាគម្លាតមិនត្រូវបានគេគោរពតាម។
ករណីឆ្លងរាប់រយត្រូវបានរកឃើញនៅបណ្តុំអគារស្នាក់នៅរួម នៅក្នុងតំបន់ក្រីក្រខ្លាំងក្នុងក្រុង Melbourne ដែលនៅទីនោះ អ្នកស្រុកបានត្អូញត្អែរថា ពួកគេត្រូវបានគេ ចាត់ទុកដូចជាសត្វធាតុ។
ខណៈដែលវិបត្តិនេះនៅតែបន្ត ការធ្វើដំណើររវាងរដ្ឋ Victoria និងផ្នែកផ្សេងទៀតនៅក្នុងប្រទេសអូស្រ្តាលី កំពុងត្រូវបានរឹតត្បិតខ្លាំង ហើយការគ្រប់គ្រងព្រំដែនដ៏តឹងរ៉ឹងត្រូវបានគេអនុវត្ត។
ការប្រជុំសភាសហព័ន្ធបន្ទាប់ ទំនងនឹងត្រូវបានលុបចោល ដោយសារតែការរាតត្បាតនៃជំងឺកូវីដ១៩នេះ។ អ្នកតាក់តែងច្បាប់ ត្រូវបានកំណត់ឱ្យចូលរួមប្រជុំនៅក្នុងទីក្រុង Canberra នៅក្នុងខែសីហាខាងមុខនេះ៕
