លោក Lloyd J. Austin ដែលបានបញ្ចប់ការសិក្សានៅសាលាបណ្ឌិតសភាយោធា West Point សហរដ្ឋអាមេរិក និងបានកាន់តំណែងខ្ពង់ខ្ពស់ក្នុងជួរយោធា បានទទួលការតែងតាំងពីព្រឹទ្ធសភាកាលពីថ្ងៃសុក្រក្លាយជារដ្ឋមន្ត្រីការពារប្រទេសស្បែកខ្មៅទីមួយរបស់សហរដ្ឋអាមេរិក។
បេក្ខភាពរបស់លោក Austin ទទួលបានការគាំទ្រ ៩៣ សំឡេងទល់នឹងការជំទាស់ ២ សំឡេងនៅក្នុងការបោះឆ្នោតនៅព្រឹទ្ធសភាដើម្បីសម្រេចចុងក្រោយលើបេក្ខភាពរបស់លោក។
លោក Austinគឺជាសមាជិកទីពីរនៃគណៈរដ្ឋមន្ត្រីរបស់លោកប្រធានាធិបតី Biden ដែលទទួលបានការតែងតាំងពីព្រឹទ្ធសភា បន្ទាប់ពីលោកស្រី Avril Haines ដែលបានទទួលការតែងតាំងកាលពីថ្ងៃពុធ ក្លាយជាស្ត្រីទីមួយ ដែលបម្រើការជានាយិកាទីភ្នាក់ងារស៊ើបការណ៍សម្ងាត់ជាតិ។
លោក Biden ត្រូវគេរំពឹងថា នឹងបានទទួលការអនុម័តលើបេក្ខជនផ្សេងទៀតសម្រាប់តំណែងក្នុងក្រុមប្រឹក្សាសន្តិសុខជាតិរបស់លោកក្នុងប៉ុន្មានថ្ងៃខាងមុខ រួមទាំងលោក Antony Blinken ជារដ្ឋមន្ត្រីការបរទេសផងដែរ៕
