មេដឹកនាំគណបក្សសាធារណរដ្ឋក្នុងព្រឹទ្ធសភាសហរដ្ឋអាមេរិកគឺ លោក Mitch McConnell កំពុងស្នើសុំលើកពេលសវនការចោទប្រកាន់ដកហូតតំណែងអតីតប្រធានាធិបតី Donald Trump ចំនួនមួយសប្ដាហ៍ ទៅដល់ខែកម្ភៈ ឬយូរជាងនេះ ដើម្បីឲ្យលោក Trump មានពេលវេលាពិនិត្យករណីនេះ។ នេះបើតាមការរាយការណ៍របស់ទីភ្នាក់ងារព័ត៌មាន AP។
សមាជិករដ្ឋសភាគណបក្សប្រជាធិបតេយ្យ ដែលបានបោះឆ្នោតប្តឹងដកហូតប្រធានាធិបតីចេញពីតំណែងកាលពីសប្ដាហ៍មុន ពីបទញុះញង់ឲ្យមានកុប្បកម្មនៅវិមានសភាអាមេរិក កាលពីថ្ងៃទី៦ ខែមករា បានឲ្យសញ្ញាថា ពួកគេចង់ឲ្យមានសវនការឆាប់រហ័ស ខណ:ដែលលោកប្រធានាធិបតី Joe Biden បានចាប់ផ្ដើមអាណត្តិរបស់លោកហើយ។
ពួកគេនិយាយថា ការគិតគូរឲ្យបានគ្រប់ជ្រុងជ្រោយអំពីព្រឹត្តិការណ៍ដែលបានកើតឡើងគឺសំខាន់ណាស់ មុនពេលប្រទេសជាតិនិងសភា អាចត្រឡប់ទៅកិច្ចការប្រក្រតីខ្លួនវិញបាន។
ប៉ុន្តែលោក McConnell បានប្រាប់សមាជិកព្រឹទ្ធសភាខាងគណបក្សសាធារណរដ្ឋរបស់លោក តាមទូរស័ព្ទកាលពីថ្ងៃព្រហស្បតិ៍ថា ការពន្យារពេលខ្លះ អាចផ្ដល់ពេលវេលាឲ្យលោក Trump ត្រួតពិនិត្យលើករណីនេះ និងរៀបចំក្រុមការងារផ្នែកច្បាប់របស់លោក ដើម្បីធានាឲ្យការដំណើរការក្តីមានយុត្តិធម៌។
ដោយលោក Trump នៅពេលនេះលែងមានក្រុមប្រឹក្សាអ្នកច្បាប់របស់សេតវិមានជួយការពារលោក ដូចកាលពីសវនាការប្តឹងដកពីតំណែងកាលពីឆ្នាំមុននោះ សម្ព័ន្ធមិត្តរបស់លោកកំពុងស្វែងរកមេធាវីផ្សេងៗសម្រាប់ការពារក្នុងរឿងក្តីនេះ៕
