ភ្ជាប់​ទៅ​គេហទំព័រ​ទាក់ទង

នៅ​អង្គការ​សហប្រជាជាតិ សម្តេច​ប៉ាប​ជំរុញ​ឲ្យ​មេដឹកនាំ​ពិភពលោក​ការពារ​បរិស្ថាន​និង​អ្នក​ក្រ


សម្តេច​ប៉ាប Francis ថ្លែង​នៅ​ក្នុង​មហាសន្និបាត​របស់​អង្គការ​សហប្រជាជាតិ​ កាលពី​ថ្ងៃទី២៥ ខែកញ្ញា ឆ្នាំ២០១៥។

នៅ​ក្នុង​សុន្ទរកថា​មួយ​ដែល​ព្រះអង្គ​បាន​ថ្លែង​ទៅ​កាន់​មហាសន្និបាត​អ.ស.ប. សម្តេច​ប៉ាប​ Francis ​បាន​ជំរុញ​ឲ្យ​ប្រធានាធិបតី​ និង​នាយក​រដ្ឋ​មន្ត្រី​ឱ្យ​បង្ហាញ ភាព​ជា​មេដឹកនាំ​ក្នុង​ការ​ប្រយុទ្ធ​ប្រឆាំង​នឹង​ការ​ប្រែប្រួល​អាកាសធាតុ ​និង​ភាពទីទាល់​ក្រ​ ព្រម​ទាំង​ក្នុង​ការ​ការពារ​ក្រុម​ជន​ភៀស​ខ្លួន​មក​ពី​កន្លែង​មាន​សង្គ្រាម​ផង​ដែរ។ ​ព្រះអង្គ​ក៏​បាន​យាង​ទៅ​កាន់​កន្លែង​រំលឹក​វិញ្ញាណក្ខន្ធ​មួយ​នៅ​ក្នុង​បុរី​ញូវយ៉ក​ដើម្បី​សូត្រធម៌​ដើម្បី​សន្តិភាព​ និង​ផ្តល់​កិត្តិយស​ដល់​ជន​រងគ្រោះ​ដោយសារ​ការ​វាយ​ប្រហារ​ភេរវកម្ម​នៅ​ក្នុង​ស.រ.អា.​កាលពី​ឆ្នាំ២០០១។​

នៅ​ពេល​មាន​ព្រះ​បន្ទូល​កាល​ពី​ព្រឹក​ថ្ងៃ​សុក្រ​នៅ​ឯទីស្នាក់​កណ្តាល​របស់​អ.ស.ប.​នៅ​ក្នុង​បុរី​ញូវយ៉ក​ សម្តេច​ប៉ាប​ដែល​មាន​ព្រះជន្ម​៧៨​ព្រះ​វស្សា​បាន​ភ្ជាប់​ «ការ​ប្រើប្រាស់​ដោយ​មិន​ត្រឹមត្រូវ ​និង​ការ​បំផ្លាញ​បរិស្ថាន» ​ទៅ​នឹង​អ្វី​ដែល​ព្រះអង្គ​ហៅ​ថា «ដំណើរការ​គ្មាន​ឈប់ឈរ» នៃ​ការ​ផាត់​ចោល​ខាង​សេដ្ឋកិច្ច ​និង​ខាង​សង្គមកិច្ច​នៃ​ក្រុម​សមាជិក​ដែល​មាន​ការ​ចាញ់​ប្រៀប​នៅ​ក្នុង​សង្គម។

សម្តេច​ប៉ាប Francis បាន​មាន​ព្រះ​បន្ទូល​ជា​ភាសា​អេស្ប៉ាញ​ថា «ជា​ការ​ពិត​ ការ​ស្រេក​ឃ្លាន​ដោយ​គិត​តែ​ប្រយោជន៍​ផ្ទាល់​ខ្លួន​ និង​គ្មាន​ព្រំដែន​ដើម្បី​អំណាច​ និង​ភាព​សម្បូរ​រុងរឿង​ខាង​សម្ភារៈ​នាំ​ឱ្យ​មាន​ការ​ប្រើប្រាស់​ខុស​នូវ​ប្រភព​ធនធាន​ធម្មជាតិ​ដែល​មាន និង​ការ​ផាត់ចោល​ក្រុម​មនុស្ស​ដែល​ខ្សោយ​និង​គ្មាន​ប្រៀប»។

ព្រះ​អង្គ​បាន​មាន​ព្រះ​បន្ទូល​ដូច្នេះ​ទៅ​កាន់​ប្រធានាធិបតី​ និង​នាយក​រដ្ឋ​មន្ត្រី​ព្រម​ទាំង​ឥស្សរជន​ឯទៀតៗ​ដែល​អង្គុយ​នៅ​ចំពោះ​ព្រះភ័ក្ត្រ​ព្រះអង្គ​នៅ​ក្នុង​មហាសាល​នៃ​មហាសន្និបាត​អ.ស.ប.៕

XS
SM
MD
LG