ក្រុមប្រឹក្សាសន្តិសុខអង្គការសហប្រជាជាតិបានសម្តែងនូវសមានចិត្តដល់ពលរដ្ឋអាហ្វហ្គានីស្ថានកាលពីថ្ងៃព្រហស្បតិ៍ បន្ទាប់ពីការរញ្ជួយដីដ៏ប្រល័យ ខណៈដែលក្រុមប្រឹក្សានេះបានបន្តដាក់ការគាបសង្កត់លើពួកអាជ្ញាធរតាលីបង់ឱ្យប្រែក្រឡាស់ការរឹតត្បិតលើស្ត្រីនិងធ្វើឱ្យប្រទេសមានស្ថិរភាព។
ឯកអគ្គរដ្ឋទូតអាល់បានីលោក Ferit Hoxha ដែលតំណាងឱ្យសមាជិក៩ប្រទេសនៃសមាជិកទាំងអស់ចំនួន១៥ប្រទេសនៅក្នុងក្រុមប្រឹក្សានោះបានប្រាប់ពួកអ្នកយកព័ត៌មានថា៖ «យើងជំរុញឱ្យក្រុមតាលីបង់ប្រែក្រឡាស់ជាបន្ទាន់នូវនយោបាយនិងការអនុវត្តដែលនៅពេលបច្ចុប្បន្ននេះកំពុងរឹតត្បិតសិទ្ធិមនុស្សនិងសេរីភាពដ៏សំខាន់របស់ស្ត្រីនិងក្មេងស្រីអាហ្វហ្គានីស្ថាន ហើយដែលបន្តធ្វើឱ្យកាន់តែអាក្រក់ឡើងដល់មនុស្សជាតិ សេដ្ឋកិច្ច សិទ្ធិមនុស្សនិងវិបត្តិសង្គម និងធ្វើឱ្យអន្តរាយដល់គោលដៅនៃសន្តិភាពប្រកបដោយចីរភាពនិងស្ថិរភាពនៅក្នុងប្រទេសអាហ្វហ្គានីស្ថាន»។
កាលពីថ្ងៃទី២៣ ខែមិនា ពួកអាជ្ញាធរតាលីបង់បានប្រកាសពីការបន្តបិទសាលាមធ្យមសិក្សាសម្រាប់ក្មេងស្រី។ អង្គការសហប្រជាជាតិនិយាយថា ក្មេងស្រី១,១លាននាក់បានរងផលប៉ះពាល់ពីការបិទសាលារៀននេះ។ ប្រធានផ្នែកមនុស្សធម៌របស់អង្គការសហប្រជាជាតិលោក Martin Griffiths បានប្រាប់សមាជិកក្រុមប្រឹក្សាសន្តិសុខអង្គការសហប្រជាជាតិថា៖ «គ្មានប្រទេសណានៅក្នុងពិភពលោកដែលរដ្ឋាភិបាលបានហាមឃាត់ក្មេងស្រីមិនឱ្យទៅរៀននៅសាលាមធ្យមសិក្សានោះទេ»។ ក្រឹត្យនោះក៏បានរឹតត្បិតការដើរហើររបស់ស្ត្រីដោយមិនមានសាច់ញាតិប្រុសហើយបានស្វះស្វែងកំណត់មុខជំនាញដែលពួកស្ត្រីអាចធ្វើការបាន។ កាលពីថ្ងៃទី៧ ខែឧសភា ពួកតាលីបង់បានបញ្ជាឱ្យស្ត្រីទាំងអស់គ្របក្បាលនិងមុខរបស់ពួកគេនៅកន្លែងសាធារណៈហើយបានជំរុញឱ្យពួកគេស្ថិតនៅក្នុងផ្ទះ។
ទីប្រឹក្សាខាងនយោបាយស្តីទីរបស់សហរដ្ឋអាមេរិកលោកស្រី Trina Saha បាននិយាយថា «ប្រសិនបើ ក្រុមតាលីបង់ចង់ឱ្យមានទំនាក់ទំនងជាប្រក្រតីភាពឡើងវិញជាមួយសហគមន៍អន្តរជាតិ ខ្លួនត្រូវតែប្រែក្រឡាស់ជាបន្ទាន់នូវវិធានការនានាដែលខ្លួនបានអនុវត្តដែលបានផាត់ចោលស្ត្រីពីសកម្មភាពសង្គម នយោបាយនិងសេដ្ឋកិច្ច»។
មិនមានប្រទេសណាបានទទួលស្គាល់ពួកអាជ្ញាធរតាលីបង់ដែលបានរឹបអូសយកអំណាចកាលពីខែសីហានៅពេលដែលកងទ័ពសហរដ្ឋអាមេរិកនិងអង្គការអូតង់បានដកចេញពីប្រទេសនោះ។ ខណៈដែលស្ថានភាពសិទ្ធិមនុស្សកាន់តែយ៉ាប់យ៉ឺនឡើងៗ ស្ថានភាពសន្តិសុខកំពុងក្លាយជាការមិនអាចទស្សន៍ទាយបាន។ កាលពីដំបូង ការបញ្ចប់ជម្លោះបន្ទាប់ពីការកាន់កាប់អំណាចរបស់ពួកតាលីបង់បាននាំឱ្យមានការធ្លាក់ចុះការស្លាប់ជនស៊ីវិល ក៏ប៉ុន្តែ អំពើហិង្សាបានកើនឡើងជាថ្មីម្តងទៀត៕
នៅឯអង្គការសហប្រជាជាតិ មានការអំពាវនាវឱ្យក្រុមតាលីបង់ប្រែក្រឡាស់ការរឹតត្បិតសិទ្ធិសេរីភាព
អង្គការសហប្រជាជាតិ —
