ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋមន្ត្រី​ប្រទេស​​អង់គ្លេស​និង​​បារាំង​ជួប​ប្រជុំ​​គ្នា​ដើម្បី​ពិភាក្សា​ពីការ​​​ទប់​ស្កាត់​វិបត្តិ​ជន​​ភៀស​ខ្លួន​​តាម​ទូក​


កងល្បាតនាំមនុស្សមួយក្រុមពីទូកតូចមួយ ដែលត្រូវបានគិតថា ជា​ជនភៀសខ្លួន នៅក្រុង Dover ប្រទេសអង់គ្លេស កាលពីថ្ងៃទី០៨ ខែសីហា ឆ្នាំ២០២០។

រដ្ឋមន្ត្រីប្រទេស​អង់គ្លេស​ និង​បារាំង​បានជួប​ប្រជុំ​គ្នា​ជា​បន្ទាន់​មួយ​កាល​ថ្ងៃអង្គារ​ក្នុង​ទី​ក្រុង​ប៉ារីស​ ដើម្បី​ពិភាក្សាពី​វិបត្តិនៃ​ជន​ភៀស​ខ្លួន​តាម​ទូក​ដែល​មាន​ចំនួន​កាន់​តែ​ច្រើន​ឡើង​ក្នុង​ច្រក​សមុទ្រ​អង់គ្លេស។

ក្នុង​ឆ្នាំ​នេះ​ មាន​ជន​ភៀសខ្លួនជាង​៤​ពាន់​នាក់​ហើយ​ ដែល​ភាគ​ច្រើន​មក​ពី​តំបន់​អាហ្រ្វិក​និង​មជ្ឈិម​បូព៌ា បាន​ព្យាយាម​ឆ្លងកាត់​ពី​ប្រទេស​បារាំង​មក​ប្រទេស​អង់គ្លេស​ តាមរយៈ​ទូក​តូច​ៗ​និង​ទូក​មាន​ដំបូល​ ដោយក្នុង​សប្តាហ៍​មុន មានជន​ភៀសខ្លួន​ចំនួន​៧០០​នាក់។

ជន​ភៀស​ខ្លួន​ព្យាយាមឆ្លង​កាត់ច្រក​សមុទ្រ​ចម្ងាយ​ប្រមាណ​៣៥​គីឡូម៉ែត្រ​ ​ក្នុង​តំបន់​ដឹក​ជញ្ជូន​ដែល​មាន​ភាព​មមាញឹក​បំផុត​ក្នុង​ពិភពលោក ដោយ​មាន​កុមារ​គ្មាន​អាណាព្យាបាល​ស្ថិត​ក្នុង​ចំណោម​នោះ​ដែរ។ ​

ការ​កើន​ចំនួន​អ្នក​មក​ដល់នៃ​ជន​ភៀស​ខ្លួន​នេះ​បាន​ជំរុញ​ឲ្យ​មាន​ការ​ឆ្លើយ​តប​ខាង​នយោបាយ។ នាយករដ្ឋមន្ត្រី​ប្រទេស​អង់គ្លេស​លោក Boris Johnson ប្រាប់​អ្នក​កាសែត​នៅ​ថ្ងៃ​ចន្ទ​ថា លោក​សន្យា​នឹង​ចាត់​វិធានការ​ក្នុង​រឿង​ហ្នឹង​ តែ​គេ​នៅ​ពុំ​ទាន់​ដឹង​នូវ​សេចក្តីលម្អិត​របស់​លោក​នោះ​ឡើយ។ លោក​ថា​ នឹង​ព្យាយាម​បញ្ឈប់​ការ​ឆ្លងកាត់​ខុស​ច្បាប់​ ប៉ុន្តែ​ក៏​ពិនិត្យ​មើល​សិទ្ធិ​របស់​ពួក​គេ​ដែល​អាច​រស់​នៅ​អង់គ្លេស​ដែរ។

រដ្ឋ​មន្ត្រី​អន្តោប្រវេសន៍​អង់គ្លេស​លោក Chris Philp ​បាន​ធ្វើ​ដំណើរ​ទៅ​កាន់​ទី​ក្រុង​ប៉ារីស​នៅ​ថ្ងៃ​អង្គារ ដើម្បីពិភាក្សា​ជាមួយ​សមភាគី​បារាំង ក្នុង​ការ​កាត់​បន្ថយ​ចំនួន​ជន​ភៀស​ខ្លួនដែល​ធ្វើ​ការ​ឆ្លង​កាត់​ដៃ​សមុទ្រ​។​ ផែន​ការ​មួយ​ក្នុង​ការ​ពិភាក្សា​គឺ​ការ​ប្រទេស​អង់គ្លេស​ចេញ​សោហុយ​ថែម​ទៀត​ក្នុង​ការ​យាម​ល្បាត​នៅ​តាម​ឆ្នេរ​ភាគ​ខាង​ជើង​របស់​ប្រទេស​បារាំង​។​

ក្នុង​រយៈពេល​ប៉ុន្មាន​ថ្ងៃ​នេះ ប្រទេស​អង់គ្លេស​ បាន​ពង្រាយ​នាវា​កងទ័ព​ជើង​ទឹក និង​យន្ត​ហោះ​ឃ្លាំមើល​នៅ​តំបន់​ច្រក​សមុទ្រ​អង់គ្លេស។​ អតីត​មន្ត្រី​កងទ័ព​ជើង​ទឹក​អង់គ្លេស​លោក Chris Parry និយាយ​ថា​ វា​ជារឿង​ត្រឹម​ត្រូវ​ដែលឲ្យ​កង​ទ័ព​អង់គ្លេស​ចូល​ពាក់​ព័ន្ធ​ក្នុង​រឿង​នេះ ដោយ​លោក​ថា​ មក​ទល់​ពេល​នេះ​អង់គ្លេស​មិន​ទាន់អាច​គ្រប់គ្រង​ព្រំដែន​សមុទ្រ​ខ្លួនបាន៕

តួលេខនៃករណីឆ្លងជំងឺកូវីដ១៩

XS
SM
MD
LG