អ្នកកាន់សាសនាឥស្លាមរាប់ពាន់នាក់នៅក្នុងប្រទេសប៉ាគីស្ថាន បានចាកចេញពីកន្លែងថ្វាយបង្គំព្រះ ដើម្បីចូលរួមបាតុកម្មប្រឆាំងប្រទេសបារាំង កាលពីថ្ងៃសុក្រ ខណ:ពេលដែលការប្ដេជ្ញារបស់ ប្រធានាធិបតីបារាំង ក្នុងការការពារសិទ្ធិគូររូបត្លុកព្យាការី ព្រះមហាម៉ាត់ (Muhammad) បន្តធ្វើឲ្យកក្រើកពិភពឥស្លាម។
អ្នកកាន់សាសនាឥស្លាមប្រមាណ ២ ពាន់នាក់ ដែលប្រារព្ធថ្ងៃខួបកំណើតរបស់ព្រះ Muhammad បានចេញមកតវ៉ានៅភាគខាងកើតនៃទីក្រុង Lahore។ ក្រុមបាតុករដែលដឹកនាំដោយគណបក្សឥស្លាមជាច្រើន បានស្រែកពាក្យស្លោកប្រឆាំងបារំាង លើកបដា និងមនុស្សមួយក្រុមជាន់ទន្ទ្រាំលើទង់ជាតិបារាំង និងស្រែកទាមទារឲ្យឈប់ប្រើផលិតផលបារាំង។
បាតុកម្មជាច្រើនទៀត ត្រូវរំពឹងថានឹងធ្វើឡើងនៅជុំវិញពិភពឥស្លាម ដែលរួមទាំងនៅប្រទេសលីបង់និងតំបន់ Gaza ផងដែរ។ នៅក្នុងប្រទេសអាហ្វហ្គានីស្ថាន សមាជិកម្នាក់នៃគណបក្សឥស្លាមបានព្រមានប្រធានាធិបតីបារាំងថា ការប្រមាថព្យាការីរបស់សាសនាឥស្លាម អាចបង្កឲ្យមានសង្គ្រាមលោកលើកទី ៣។
បាតុកម្មនេះកើតឡើងចំពេលនៃការកើនភាពតានតឹងរវាងប្រទេសបារាំង និងបណ្ដាប្រទេសកាន់សាសនាឥស្លាម ដែលផ្ទុះឡើង កាលពីដើមខែតុលា នៅពេលដែលសិស្សកាន់សាសនាឥស្លាមម្នាក់បានកាត់ក្បាលគ្រូបង្រៀនបារាំងម្នាក់ ដែលបានបង្ហាញរូបត្លុករបស់ព្យាការី Muhammad នៅក្នុងថ្នាក់រៀន។
កាលពីថ្ងៃព្រហស្បតិ៍ បុរសទុយនីស៊ីម្នាក់ដែលកាន់កាំបិតនិងគម្ពីរគួរអាន (Quran) ម្នាក់ បានសម្លាប់មនុស្សបីនាក់ នៅវិហារគ្រិស្តសាសនាមួយកន្លែង ក្នុងទីក្រុង Nice (នីស) ភាគអាគ្នេយ៍ប្រទេសបារាំង និងបង្ខំឲ្យអាជ្ញាធរទទូចឲ្យពលរដ្ឋបារាំងមានការប្រុងប្រយ័ត្នខ្ពស់៕
