ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មេដឹកនាំ​យោធា​ប្តេជ្ញា​ប្រឆំាង​​លោក​ ​សម រង្ស៊ី​ ​ដែល​អំពាវនាវ​ឱ្យ​កម្លាំង​ប្រដាប់​អាវុធ​ឈប់​ការពារ​លោក ​ហ៊ុន សែន


លោកនាយករដ្ឋ​មន្ត្រី ហ៊ុន សែន (ឆ្វេង) និង​លោក សម រង្ស៊ី (ស្តាំ) ប្រធាន​គណបក្ស​សង្គ្រោះជាតិ។
លោកនាយករដ្ឋ​មន្ត្រី ហ៊ុន សែន (ឆ្វេង) និង​លោក សម រង្ស៊ី (ស្តាំ) ប្រធាន​គណបក្ស​សង្គ្រោះជាតិ។

បន្ទាប់ពី​លោក​ ​សម រង្ស៊ី​ អំពាវ​នាវ​ឲ្យ​កង​កម្លាំង​ប្រដាប់​អាវុធ​ទាំងអស់​កុំ​ស្តាប់​បញ្ជា​លោក ហ៊ុន សែន​ ​គេ​ឃើញ​​ក្រុម​មេទាហាន​ចេញ​មកតំណាង​កងទ័ពដើម្បីប្រកាស​ការពារ​​រដ្ឋាភិបាល​ដឹកនាំ​ដោយ​លោក​​ ​ហ៊ុន សែន​ ​និង​ប្រកាស​បង្ក្រាប​​ក្រុម​ប្រឆាំង​​ដែល​រដ្ឋាភិបាល​ហៅ​ថា​ជាក្រុម​មាន​បំណង​ផ្តួលរំលំរដ្ឋាភិបាល។

ក្រុម​កង​កម្លាំង​យោធា​កម្ពុជា ​ប្រកាស​ការពាររដ្ឋាភិបាល​ដែលដឹកនាំ​ដោយ​លោក​នាយក​រដ្ឋ​មន្ដ្រី​ ​ហ៊ុន សែន​ ​និង​ប្រឆាំង​ទៅ​នឹង​ការអំពាវ​នាវ​របស់​លោក​ ​សម រង្ស៊ី​ ​មេដឹកនាំ​គណបក្ស​ប្រឆាំង​មួយ​រូប​ដែល​អំពាវ​នាវ​ដល់​កង​កម្លាំង​ប្រដាប់​អាវុធ​ទាំង​អស់​កុំ​ស្តាប់​បញ្ជា​លោក​ ​ហ៊ុន សែន។

​កាល​ពី​ថ្ងៃទី២៥​ មករា​ ឆ្នាំ២០១៩​ លោក សម រង្ស៊ី ​មេដឹកនាំ​គណបក្ស​ប្រឆាំង​មួយរូប​ដែល​កំពុង​ស្ថិត​នៅ​ក្រៅ​ប្រទេស​បាន​ប្រកាស​ពី​គម្រោង​ត្រឡប់​មក​កម្ពុជា​វិញ​ក្នុងឆ្នាំ​២០១៩​នេះ​ ដោយ​បញ្ជាក់​ថា​នឹង​អាច​មាន​អ្នក​ស្នេហា​លទ្ធិ​ប្រជា​ធិបតេយ្យ​និង​អ្នកគាំទ្រ​ជាច្រើន​នាក់​ត្រៀម​ទៅ​ទទួល​លោក។​ ​ក្នុង​សារ​ដែល​បាន​បង្ហោះ​លើ​ទំព័រ​ហ្វេសប៊ុក​នោះ​ ​លោក​ ​សម រង្ស៊ី​ ​បាន​អំពាវនាវ​ដល់​កងកម្លាំង​ប្រដាប់​អាវុធ​ទាំងអស់ ត្រូវ​ការពារ​ប្រជា​ពលរដ្ឋ​ ​កុំស្ដាប់​តាម​បញ្ជា​របស់លោក​ ​ហ៊ុន សែន។

លោក​ ​សម រង្ស៊ី​ ​សរសេរ​ថា៖​

«រាល់​បញ្ជា​ណា​ដែល​បង្ខំ​ឲ្យ​កងកម្លាំង​ប្រដាប់​អាវុធ​បាញ់​ប្រហារ​មក​លើ​ប្រជាពលរដ្ឋ​ស្លូតត្រង់ ដែល​ធ្វើ​បាតុកម្ម​ដោយ​សន្តិវិធី គឺជា​បញ្ជា​ខុស​ច្បាប់​ ​និង​អមនុស្ស​ធម៌​ ​ដែល​កងកម្លាំង​ប្រដាប់​អាវុធ​មិន​ត្រូវ​ធ្វើ​តាម​ដាច់​ខាត។​ ​សូម​កងកម្លាំង​ប្រដាប់​អាវុធ​ ​កុំ​ឈរ​ខាង​របប​ផ្តាច់ការ​ក្បត់ជាតិ​សព្វថ្ងៃ​ ​តែ​សូម​បែរ​មក​ឈរ​ខាង​ប្រជា​រាស្ត្រ​ ​ដែល​ទាមទារ​សេរីភាព​ ​និង​យុត្តិធម៌​ ​ហើយ​ទាមទារ​ឲ្យ​មាន​អ្នក​ដឹកនាំ​ថ្មី ដែល​ជា​អ្នក​ប្រជា​ធិបតេយ្យ​ ​និង​អ្នក​ស្នេហា​ជាតិ​ ​ប្រកប​ដោយ​ទសពិធ​រាជធម៌»។

បន្ទាប់​ពី​លោក​ ​សម រង្ស៊ី​ ​ប្រកាស​ពី​គម្រោង​ធ្វើ​មាតុភូមិ​និវត្តន៍​មក​កម្ពុជា​វិញ​ ​និង​អំពាវនាវ​ឲ្យ​កងកម្លាំង​ប្រដាប់​អាវុធ​កុំ​ស្ដាប់​តាម​បញ្ជា​លោក​ ​ហ៊ុន សែន​ ​គេឃើញ​ក្រសួង​ការពារ​ជាតិ​ ​កងទ័ព​ជើង​ទឹក ជើង​គោក​ ​និង​កងកម្លាំង​យោធា​ជាច្រើន​ស្ថាប័ន​ទាំង​នៅ​រាជធានី​ភ្នំពេញ​ ​និង​នៅ​តាម​បណ្តាខេត្ត រួម​ទាំង​កងទ័ព​មួក​ខៀវ​កម្ពុជា​ផង​ ​បាន​ប្រកាស​ជា​បន្តបន្ទាប់​ ថា​គាំទ្រ​រដ្ឋា​ភិបាល​ដែល​ដឹកនាំ​ដោយ​លោក​នាយក​រដ្ឋមន្រ្តី​ ​ហ៊ុន សែន។​ ​ក្រុម​មេដឹកនាំ​កង​ទ័ព​តាម​រយៈ​សេចក្ដី​ថ្លែង​ការណ៍​ និង​កិច្ច​សម្ភាស​ន៍​នានា​ ​ដែល​ត្រូវ​បាន​ចុះ​ផ្សាយ​ដោយ​អង្គភាព​ព័ត៌មាន​ ​Fresh News​ ​ដោយ​បានប្រកាស​ប្រឆាំង​ ​និង​ថ្កោល​ទោសការអំពាវ​នាវ​របស់​លោក​ ​សម រង្ស៊ី។

​បើ​តាមសេចក្ដី​ប្រកាស​ព័ត៌មាន​ចេញ​នៅ​ថ្ងៃទី​២៦​ ​ខែ​មករា​ ​ឆ្នាំ​២០១៩​ ​ដោយអ្នក​នាំ​ពាក្យ​ក្រសួង​ការ​ពារ​ជាតិ​បញ្ជាក់​ថា​ក្រសួង​ការពារ​ជាតិប្រកាស​ថ្កោលទោស និង​ប្រឆាំង​ដាច់​ខាត​ចំពោះ​ការអំពាវ​នាវ​របស់​លោក​ ​សម រង្ស៊ី។ ​សេចក្តី​ប្រកាស​ព័ត៌មាន​នោះ​បន្ត​ថា កង​យោធពល​ខេមរ​ភូមិន្ទ​ ​គោរព​ ​និង​អនុវត្ត​ម៉ឺងម៉ាត់​ដាច់ខាត​នូវ​បទបញ្ជា និង​អនុសាសន៍​ដ៏​ខ្ពង់ខ្ពស់​របស់​លោកនាយករដ្ឋមន្រ្តី​ ​ហ៊ុន សែន​ ​ដើម្បី​វាយ​កម្ទេច​ជន​ក្បត់​ជាតិ​ដែល​មាន​ប៉ុនប៉ង​បង្កើត​បដិវត្តន៍​ពណ៌​បំផ្លាញ​សុខ​សន្តិភាព​ប្រជា​ជន។

សេចក្តី​ប្រកាស​ព័ត៌មាន​នោះ​និយាយ​ថា៖​

«កង​យោធ​ពល​ខេម​រភូមិន្ទ​ ​សូម​អំពាវ​នាវដល់​ជន​រួមជាតិ​ទាំងអស់​កុំ​ជឿ​តាមការ​អំពាវនាវ​របស់​ទណ្ឌិត​ ​សម រង្ស៊ី។​ ​យើង​ចាត់​ទុក​ថា​រាល់​សកម្ម​ភាព​ណា​ដែល​គាំទ្រ​ទៅនឹង​ការ​អំពាវនាវ​របស់​ទណ្ឌិត​ ​សម រង្ស៊ី​ ​គឺ​ជា​អំពើ​ខុសច្បាប់។​ ​យើង​ទាំងអស់​គ្នា​ប្តេជ្ញា​ចិត្ត​បង្ក្រាប​ដាច់​ខាត​ ​ដើម្បី​ថែររក្សា​សន្តិសុខ​ ​សណ្តាប់​ធ្នាប់​សង្គម​ ​និង​សន្តិភាព​ជូន​ជាតិ​មាតុភូមិ»។

ក្នុង​ពិធី​ប្រា​រព្ធខួប​ ​២០​ឆ្នាំ​នៃ​ថ្ងៃ​បង្កើត​ប​ញ្ជា​កា​រដ្ឋាន​កងទ័ព​ជើងគោក​ ​កាល​ពី​សប្តាហ៍​មុន​ ​លោក​នាយក​រដ្ឋមន្រ្តី​ ​ហ៊ុន សែន​ ​ដែល​កាន់​អំណាច​ជាង​៣៤​ឆ្នាំ​មក​ហើយ​នោះ​ ​បាន​ថ្លែង​ទៅ​កាន់​កង​កម្លាំង​យោធា​ ​ឲ្យ​ការពារ​រដ្ឋាភិបាល​ការពារ​អធិបតេយ្យភាព​ ​បូរណ​ភាព​ ​និង​ប្រឆាំង​ការជ្រៀត​ជ្រែក​ពីប្រ​ទេស។​ ​លោក​ ​ហ៊ុន សែន​ ​ក៏​បាន​បញ្ជា​ឲ្យ​កង​កម្លាំង​ប្រដាប់​អាវុធ​ទាំងអស់​បង្ក្រាប​រាល់​សកម្មភាព​ទាំង​ឡាយ​ណា​ដែល​រដ្ឋាភិបាល​ហៅថា​ជា​សកម្មភាពចង់​ផ្តួល​រំលំ​រដ្ឋាភិបាល​ ​ដោយ​មិន​ចាំបាច់​មាន​បញ្ជា​ផង​ដែរ។

តាមរយៈ​បណ្តាញ​សង្គម​តេលេក្រាម​នៅ​ថ្ងៃចន្ទ​នេះ​ ​លោក​ ​សុខ ឥសាន​ ​អ្នកនាំពាក្យ​គណ​បក្សប្រជា​ជន​កម្ពុជា​របស់​លោក​នាយក​រដ្ឋមន្រ្តី​ ​ហ៊ុន សែន​ ​បាន​ប្រាប់​អ្នកសារ​ព័ត៌មាន​ពាក់ព័ន្ធ​នឹង​ការ​ផ្ទុះ​អាវុធ​ក្នុង​ជម្លោះ​ដីធ្លី​មួយ​នៅ​ខេត្ត​ព្រះ​សីហនុ ​កាល​ពី​សប្តាហ៍​មុន​ថា ជន​បាត​ដៃ​ទី​បី​ជា​អ្នក​បាញ់​ជនរងគ្រោះ​ដើម្បី​ដាក់​កំហុស​ទៅ​លើ​សមត្ថកិច្ច​ថា​ជា​អ្នកបាញ់។​ ​លោក​បាន​បន្ថែម​ក្នុង​សារ​នោះ​ថា ​ជន​បាតដៃ​ទី​បី​អាច​នឹង​ធ្វើ​បែប​នេះ​ ​ពេល​លោក​ ​សម រង្ស៊ី ​វិល​មក​កម្ពុជា​វិញ​ដើម្បី​ឲ្យ​គេ​យល់​ច្រឡំ​ថា​ជា​ទង្វើ​របស់​រដ្ឋា​ភិបាល។

លោក​ ​សុខ ឥសាន​ ​សរសេរ​ថា៖

«បើ​សិន​ទណ្ឌិត​ ​សម រង្ស៊ី​ ​ហ៊ាន​ចូល​មក​ក្នុង​ប្រទេស​កម្ពុជា​មែន​ អាច​នឹង​មាន​ជន​បាត​ដៃ​ទី៣​ លួច​បន្លំ​បាញ់​សម្លាប់​ទណ្ឌិត​ ​សម​ រង្ស៊ី​ ​ចោល​ ​ដើម្បី​ដាក់​កំហុស​មក​លើ​រាជ​រដ្ឋាភិបាល​កម្ពុជា។​ ​ការ​ពិត​ទណ្ឌិត​ ​សម រង្សី​ ​គ្រាន់តែ​ត្រូវ​ចាប់​ដាក់​គុក​តាម​សាលក្រម​តុលាការ​ប៉ុណ្ណោះ»។

​លោក​បណ្ឌិត មាស នី អ្នកសិក្សា​ពី​ការ​វិវត្ត​សង្គម និង​ជា​អ្នកវិភាគ​នយោបាយ​ឯករាជ្យ ប្រាប់​VOA ថា ការ​ប្រកាស​របស​ក្រុមកង​កម្លាំង​ប្រដាប់​អាវុធ ដែល​ធ្វើ​ឡើង​តាម​រយៈ​មេបញ្ជា​ការ ឬ​មេទ័ព​ ហាក់​បង្ហាញ​ពី​ការ​បារម្ភ​ខ្លាំង​ជ្រុល​អំពី​វត្តមាន​របស់​លោក សម រង្ស៊ី ខណៈ​លោក សម រង្ស៊ី មាន​តែ​ម្នាក់​ឯង។ លោក​បន្ថែម​ថា ការ​បង្ហាញ​ពី​ប្រតិកម្ម​របស់មេទ័ព​ធំៗ​ទាំង​នោះខ្លាំង​ពេក អាច​នឹង​ធ្វើ​ឲ្យ​ប្រជា​ពលរដ្ឋ​មាន​ការ​បារម្ភ និង​អាច​ធ្វើ​ឲ្យ​ប៉ះពាល់​ដល់​អ្នកវិនិយោគ។

លោក​បញ្ជាក់​ថា៖ «ពលរដ្ឋ​ខ្មែរ​គាត់​ស៊ាំ​នឹង​សង្គ្រាម ​អញ្ចឹង​កាលណា​គាត់​ឮ​សូរ​ស្អី​ដែល​ជារឿង​សង្គ្រាម​ហ្នឹង គាត់​ថា​វា​ចេះ​តែ​មាន​អារម្មណ៍​មិន​សុខ​ស្រួល​ទេ។ ហើយ​រឿង​ដែល​សំខាន់​បំផុត​នោះ​វា​ប៉ះ​ពាល់​ដល់​អ្នក​រកស៊ី ប៉ះពាល់​ដល់​អ្នក​វិនិយោគទុន​អី ព្រោះ​ការ​ប្រកាស​ជម្លោះ​ផ្ទៃ​ក្នុង ការ​ប្រកាស​លទ្ធភាព​ប្រឈម​គ្នា កម្លាំងប្រដាប់​អាវុធ​អី​ហ្នឹង ​សុទ្ធ​តែ​ធ្វើ​ឲ្យ​អ្នក​រក​ស៊ី​គេ​ពិបាក​ណាស់។​ អញ្ចឹង​ការ​ដែល​យើង​បង្ហាញ​ពី​ប្រតិកម្ម​ហួស​ហេតុ​ពេល ជួន​កាល​ធ្វើ​ឲ្យ​ខាត​ហ្នឹង​ច្រើន​ជាង​ចំណេញ»។​

នៅ​ថ្ងៃចន្ទ​នេះ​ ​លោក សម រង្ស៊ី​ ​ក៏​បាន​បង្ហោះ​សារ​មួយ​ទៀត​លើ​ទំព័រ​ហ្វេសប៊ុក​របស់​លោក​ ​ដោយ​បញ្ជាក់​ថា​ លោក​ថ្កោល​ទោស​លោក​នាយក​រដ្ឋមន្រ្តី​ ​ហ៊ុន សែន​ ដែល​ចាប់​ប្រជា​រាស្រ្ត​ខ្មែរ​ធ្វើ​ជា​ចំណាប់​ខ្មាំង​ដើម្បី​គំរាម​កំហែង​សហភាព​អឺរ៉ុប។​ ​លោក​បន្ថែម​ដោយ​បញ្ជាក់​ទៅ​សហភាព​អឺរ៉ុប​ថា​ ប្រជា​រាស្ត្រ​ខ្មែរ​សុខ​ចិត្ត​អត់​ទ្រាំ​មួយ​រយៈពេល​ខ្លី​ពី​ការលំបាក​ខ្លះ​ ​ដែល​អាច​បណ្តាល​មក​ពី​ការព្យួរ​កម្ម​វិធី​អនុគ្រោះ​ពន្ធដារ​ ​EBA​ ​ដើម្បី​បាន​ស្គាល់​លទ្ធិ​ប្រជាធិបតេយ្យ​ពិត​ប្រាកដ។​

​លោក​សរសេរ​បញ្ជាក់​ថា៖​

«ក្នុង​នាម​ប្រជា​ពលរដ្ឋ​ខ្មែរ​គ្រប់​មជ្ឈដ្ឋាន​ដែល​គណបក្ស​សង្គ្រោះ​ជាតិ​ធ្វើ​ជា​តំណាង​ ​ខ្ញុំ​សូម​បញ្ជាក់​ទៅ​សហភាព​អឺរ៉ុប​ថា​ ​ប្រតិកម្ម​របស់​សហភាព​អឺរ៉ុប​ឆ្លើយ​តប​ទៅ​នឹង​ការ​រំកិល​ទៅ​រក​អំណាច​ផ្តាច់​ការ​នៅ​ប្រ​ទេស​កម្ពុជា​ ​(គឺ​ការព្យួរ​កម្មវិធី​អនុគ្រោះ​ពន្ធដារ​ ​EBA)​ ​គឺជា​វិធានការ​ត្រឹមត្រូវ​និង​សមស្រប​ដែល​យើង​អាច​ទទួល​យក​បាន»។

ក្រោយ​ការ​បោះឆ្នោត​ដែល​មិន​មាន​គណបក្ស​ប្រឆាំង​ចូល​រួម​និង​កំពុង​មាន​ការ​ដឹកនាំ​ប្រទេស​ដោយ​ឯក​បក្ស​ ​រដ្ឋាភិបាល​កម្ពុជា​បាន​រង​ការ​រិះគន់​យ៉ាង​ខ្លាំង​ពី​សហគមន៍​អន្តរជាតិ​ជាពិសេស​ពី​បណ្តា​ប្រទេស​កាន់​លទ្ធិ​ប្រជា​ធិបតេយ្យ​ធំៗ​មួយ​ចំនួន​ថា​ ​កំពុង​ធ្វើ​ឲ្យ​លទ្ធិ​ប្រជា​ធិបតេយ្យ​នៅ​កម្ពុជា​រង​នូវ​ភាព​ខ្ទេចខ្ទី​ ​និង​ផ្ទុយ​ពី​ច្បាប់​អន្តរជាតិ​ ​រហូត​មាន​ការ​ព្រមាន​ដាក់​ទណ្ឌកម្ម​ផ្សេងៗ។

សហ​រដ្ឋ​អាមេរិក​បាន​ព្រមាន​ដាក់​ទណ្ឌកម្ម​ដល់​ក្រុម​មន្រ្តី​រដ្ឋាភិបាល​ជាន់​ខ្ពស់របស់​កម្ពុជា​ ​ដែល​ពាក់​ព័ន្ធ​នឹង​ការ​រំលោភ​សិទ្ធិ​មនុស្ស​តាម​រយៈ​ការ​មិន​ផ្តល់​ទិដ្ឋាការ​ចូល​សហ​រដ្ឋ​អាមេរិក ​និង​ការ​បង្កក​ទ្រព្យ​សម្បត្តិ​ជា​ដើម។

សហភាព​អឺរ៉ុប​ដែល​ជាទីផ្សារ​នាំចេញ​ធំ​បំផុត​របស់​កម្ពុជា​ ​បានព្រមាន​ដក​ប្រព័ន្ធ​អនុគ្រោះ​ពន្ធ​ ​អ្វី​គ្រប់​យ៉ាង​លើកលែង​តែ​អាវុធ​ ​ដែល​ហៅ​កាត់​ថា​ ​EBA​ ​ដែល​ផ្តល់​ផល​ចំណេញ​ដល់​កម្ពុជា​ដោយ​ការ​មិន​បង់​ពន្ធ​ប្រមាណ​ជា​៧០០​លាន​ដុលា្លរ​ក្នុង​មួយ​ឆ្នាំៗ។​ ​ការ​ព្រមាន​នេះ​កើត​ឡើង​បន្ទាប់​ពី​រដ្ឋា​ភិបាលរំលាយ​គណ​បក្ស​សង្គ្រោះ​ជាតិ​ ការ​ចាប់​ប្រធាន​គណ​បក្ស​នេះ​គឺ​លោក​ ​កឹម សុខា​ ​ដាក់​ពន្ធ​នាគារ​ ​និង​ការ​ព្យួរ​សិទ្ធិ​នយោបាយ​របស់​មន្រ្តី​ជាន់ខ្ពស់​គណ​បក្ស​នេះ​ចំនួន​១១៨​រូប​រយៈពេល​៥​ឆ្នាំ​ ​ព្រម​ទាំង​ការ​បង្ក្រាប​លើ​សង្គម​ស៊ីវិល​ ​និង​ប្រព័ន្ធ​ផ្សព្វផ្សាយ​ឯករាជ្យ​មួយ​ចំនួន​ផង។

យ៉ាង​ណា​ក្តី​ ​ទាំង​លោក​នាយក​រដ្ឋមន្រ្តី​ ​ហ៊ុន សែន​ ​និង​មន្រ្តី​ជាន់ខ្ពស់​រដ្ឋាភិបាល​ ​សុទ្ធតែ​បាន​អះអាង​ថា​ ​រាល់​ការ​បង្រ្កាប​ ​ទាំង​ទៅ​លើ​សំឡេង​ប្រឆាំង​ ​សង្គម​ស៊ីវិល​ ​និង​បណ្តាញ​សារ​ព័ត៌មាន​នា​នា​គឺ​ធ្វើ​ឡើង​ទៅ​តាម​ច្បាប់​ ​ស្រប​តាម​ប្រទេស​នីតិរដ្ឋ​ប៉ុណ្ណោះ៕

XS
SM
MD
LG