ក្រុមមន្ត្រីជាន់ខ្ពស់អារ៉ាប់ កំពុងថ្កោលទោសអ្វីដែលពួកគេនិយាយថា ជាការជ្រៀតជ្រែករបស់ប្រទេសអ៊ីរ៉ង់នៅក្នុងកិច្ចការរបស់អារ៉ាប់។
រដ្ឋមន្ត្រីការបរទេសសហភាពអារ៉ាប់រួមឬthe United Arab Emirates លោក Abdullah bin Zayed Al Nahyan បានមានប្រសាសន៍នៅក្នុងកិច្ចប្រជុំបន្ទាន់របស់សម្ព័ន្ធអារ៉ាប់កាលពីថ្ងៃអាទិត្យ ដោយចោទប្រកាន់ប្រទេសអ៊ីរ៉ង់ថា មានចេតនាមិនការពារស្ថានទូតអារ៉ាប៊ី សាអូឌីត។
ប្រទេសអារ៉ាប៊ី សាអូឌីត បានស្នើឲ្យមានកិច្ចប្រជុំនេះ ដើម្បីពិភាក្សាពីការវាយប្រហារទៅលើស្ថានទូតរបស់ខ្លួនក្នុងទីក្រុង Tehran ដែលបានកើតឡើងក្រោយពីប្រទេសអារ៉ាប៊ី សាអូឌីត បានកាត់ទោសប្រហារជីវិតបព្វជិតសាសនាឥស្លាមនិកាយShi'ite ដ៏ល្បីល្បាញម្នាក់ឈ្មោះ Nimr al-Nimr កាលពីដើមខែនេះ។
ប្រធានសម្ព័ន្ធអារ៉ាប់ លោក Nabil al-Arabi បានកោះហៅអ្នកការទូតទាំងអស់ឲ្យជួបជុំគ្នា ដើម្បីអនុម័តគោលជំហររួមដ៏រឹមមាំនិងច្បាស់លាស់មួយ ដោយអំពាវនាវឲ្យប្រទេសអ៊ីរ៉ង់បញ្ឈប់រាល់ទម្រង់នៃការជ្រៀតជ្រែកនៅក្នុងកិច្ចការប្រជាជាតិអារ៉ាប់តទៅទៀត។
វិបត្តិនេះបានបណ្តាលឲ្យប្រទេសអារ៉ាប៊ី សាអូឌីត និងប្រទេសអារ៉ាប់ផ្សេងទៀតកាត់ផ្តាច់ចំណងការទូតជាមួយប្រទេសអ៊ីរ៉ង់៕
