ខណៈដែលអាជីកម្មរាប់ពាន់នៅសហរដ្ឋអាមេរិកបានបើកទ្វារឡើងវិញ ក្រោយពីត្រូវបិទដោយសារវិបត្តិជំងឺកូវីដ១៩ នៅអាជីវកម្មផ្សេងទៀតដែលបន្តបញ្ឈប់បុគ្គលិកពីការងារ។
ក្រសួងការងារសហរដ្ឋអាមេរិករាយការណ៍ កាលពីថ្ងៃព្រហស្បតិ៍ថា មានពលរដ្ឋអាមេរិក ១,៥លាននាក់បានដាក់ពាក្យសុំជំនួយរដ្ឋពេលអត់ការងារធ្វើកាលពីសប្តាហ៍មុន ដែលជាចំនួនប្រចាំសប្តាហ៍ទាបបំផុតក្នុងរយៈពេលជាង ៣ខែ មកនេះ។ ប៉ុន្តែ ចំនួននេះនៅតែជាចំនួនដ៏ខ្ពស់សម្រាប់សេដ្ឋកិច្ចដ៏ធំជាងគេរបស់ពិភពលោកនេះ។
ចំនួនអ្នកបាត់បង់ការងារថ្មីនេះធ្វើឲ្យចំនួនសរុបតាំងពីមានវិបត្តិកូវីដ១៩នៅសហរដ្ឋអាមេរិកនៅពាក់កណ្តាលខែមីនាមក បានកើនដល់ចំនួនសរុប ៤៥,៥ លាននាក់ ឬស្មើនឹងជាង ១ភាគ៤ នៃពលរដ្ឋអាមេរិកពេញវ័យធ្វើការសរុប ១៦៤.៦ លាននាក់។ ប៉ុន្តែចំនួនអ្នកទទួលជំនួយរដ្ឋជាក់ស្តែងនៅពេលនេះបានធ្លាក់ចុះដល់ ២០,៥ លាននាក់វិញ ដោយមនុស្សរាប់លាននាក់បានត្រឡប់ទៅធ្វើការវិញ។
មន្ត្រីអាមេរិកបានទស្សន៍ទាយថា ការរើបឡើងវិញនៃសេដ្ឋកិច្ចអាមេរិកពីវិបត្តិកូវីដ១៩ នឹងត្រូវការពេលយូរ គឺរហូតដល់ឆ្នាំ២០២១ ដោយអត្រាអត់ការងារប្រចាំខែឧសភាកន្លងទៅ មានយ៉ាងតិច១៣,៣%។
ទាំងអ្នកតាក់តែងច្បាប់អាមេរិក និងមន្ត្រីសេតវិមានកំពុងពិចារណាថា តើរដ្ឋាភិបាលគួរផ្តល់ជំនួយថែមទៀតដល់ពលរដ្ឋពេញវ័យធ្វើការ និងក្រុមគ្រួសាររបស់ពួកគេដែរឬទេ ដើម្បីពន្លឿនដំណើរការរើបឡើងវិញនៃសេដ្ឋកិច្ច៕
