ក្រសួងការងារសហរដ្ឋអាមេរិករាយការណ៍កាលពីថ្ងៃព្រហស្បតិ៍ថា មានពលរដ្ឋអាមេរិក ១,៥ លាននាក់បានដាក់ពាក្យសុំជំនួយរដ្ឋពេលអត់ការងារធ្វើកាលពីសប្តាហ៍មុន ដែលជាចំនួនទាបបំផុតក្នុងរយៈពេល៣ខែមក ខណៈដែលអាជីវកម្មកាន់តែច្រើនបានចាប់បើកទ្វារឡើងវិញ ក្រោយពីបិទដោយសារវិបត្តិកូវីដ១៩។
ចំនួនអ្នកបាត់បង់ការងារថ្មីនេះធ្វើឲ្យចំនួនសរុប តាំងពីវិបត្តិកូវីដ១៩ នៅសហរដ្ឋអាមេរិក តាំងពីពាក់កណ្តាលខែមីនាមក បានកើនដល់ចំនួនសរុប ៤៤ លាននាក់ ឬស្មើនឹងជាង ១ភាគ៤ នៃពលរដ្ឋអាមេរិកពេញវ័យធ្វើការសរុប ១៦៤.៦ លាននាក់។ ប៉ុន្តែចំនួនអ្នកទទួលជំនួយរដ្ឋជាក់ស្តែងនៅពេលនេះបានធ្លាក់ចុះដល់ ២០,៩ លាននាក់វិញ ដោយមនុស្សរាប់លាននាក់បានត្រឡប់ទៅធ្វើការវិញ។
ទោះបីចំនួនអ្នកអត់ការងារថ្មីប្រចាំសប្តាហ៍បានធ្លាក់ចុះអស់ ១២ សប្តាហ៍ក្តី ក៏មន្ត្រីខាងសេដ្ឋកិច្ចសំខាន់ៗបានទស្សន៍ទាយថា ការរើបឡើងវិញនៃសេដ្ឋកិច្ចសហរដ្ឋអាមេរិកក្រោយវិបត្តិកូវីដ១៩ នឹងត្រូវការរយៈយូររហូតដល់ឆ្នាំ ២០២១។
មន្ត្រីអាមេរិកបានប្រកាសថា អត្រាអត់ការងារកាលពីខែឧសភា មានយ៉ាងហោចណាស់ ១៣,៣%។កាលពីថ្ងៃពុធ ធនាគារកណ្តាលសហរដ្ឋអាមេរិក បានទស្សន៍ថា ចំនួននេះអាចធ្លាក់ចុះវិញមកត្រឹម ៩,៣% នៅដំណាច់ឆ្នាំ ២០២០ និងចុះដល់ ៦,៥% នៅដំណាច់ឆ្នាំ ២០២១។
ប្រធានធនាគារកណ្តាលលោក Jerome Powell បានទទួលស្គាល់ថា ចំនួនអត់ការងារមានកម្រិតខ្ពស់ខ្លាំងជាប្រវត្តិសាស្ត្រ ហើយបានប៉ះពាល់ខ្លាំងបំផុតដល់អ្នកធ្វើការបើកប្រាក់ម៉ោង ស្ត្រី ពលរដ្ឋអាមេរិកដើមកំណើតអាហ្វ្រិក និងពលរដ្ឋដើមកំណើត Hispanics (អាមេរិកឡាទីន)៕
