ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អូស្ត្រាលី​ និង​ថៃ​ដាក់​សម្ពាធ​លើ​ប្រទេស​ភូមា​ឲ្យ​កែលំអ​ប្រវត្តិ​សិទ្ធិមនុស្ស


សកម្មជនភូមាមកពីក្រុម Free Burma Coalition កាន់របាំងមុខ​រូប​លោកស្រី​អោង​សាន ស៊ូជី​មេដឹកនាំ​ប្រជាធិតេយ្យ​ប្រទេស​ភូមា នៅមុខ​ស្ថានទូតភូមា​ក្នុង​ទីក្រុង​ម៉ានីល នៅខែវិច្ឆិកា ឆ្នាំ​២០១០។
សកម្មជនភូមាមកពីក្រុម Free Burma Coalition កាន់របាំងមុខ​រូប​លោកស្រី​អោង​សាន ស៊ូជី​មេដឹកនាំ​ប្រជាធិតេយ្យ​ប្រទេស​ភូមា នៅមុខ​ស្ថានទូតភូមា​ក្នុង​ទីក្រុង​ម៉ានីល នៅខែវិច្ឆិកា ឆ្នាំ​២០១០។

ប្រទេស​អូស្ត្រាលី​និង​ថៃ​ កំពុង​ដាក់សម្ពាធ​ប្រទេស​ភូមា​ឲ្យធ្វើ​ប្រសើរឡើង​ដល់ប្រវត្តិ​សិទ្ធិមនុស្ស​របស់​ខ្លួន​មុន​នឹង​ធ្វើ​ជា​ប្រធាន​នៃ​សមាគម​អាស៊ាន​នៅ​ក្នុង​ឆ្នាំ​២០១៤។​ ការអំពាវនាវ​បាន​ទទួល​ការគាំទ្រ​ពី​ក្រុម​ការពារ​សិទ្ធិមនុស្ស​ដែល​ខ្លាចថា​អាច​មាន​ពហិកា​ ពី​ក្រុម​ប្រទេស​ដៃគូ​សំវាទ​នានា​នៃ​សមាគម​អាស៊ាន​ ប្រសិនបើ​ប្រទេស​ភូមា​បរាជ័យ​ក្នុង​ការអនុវត្តិ​កំណែទម្រង់។

ប្រទេស​អូស្ត្រាលី​និងថៃ​បាន​អំពាវនាវ​ដល់​ប្រទេស​ភូមា​ឲ្យ​កែលំអ​ប្រវត្តិ​សិទ្ធិ​មនុស្ស​ រួមមាន​ទាំង​ការដោះលែង​ពួក​អ្នកទោស​នយោបាយ​ទាំងអស់​មុន​នឹង​ឡើង​កាន់​កៅអី​ប្រធាន​សមាគម​អាស៊ាន១០ប្រទេស​នៅ​ក្នុង​ឆ្នាំ​២០១៤។

នៅ​ដើមខែ​នេះ​ ប្រទេស​លាវ​ត្រូវ​បាន​រាយការណ៍​ថា​បាន​យល់ព្រម​ប្តូរ​ជាមួយ​ប្រទេស​ភូមា​នូវ​តំណែង​នាយក​សមាគម​អាស៊ាន​ក្នុង​ឆ្នាំ​២០១៤។​ ប្រទេស​លាវ​នឹងធ្វើ​ប្រធាន​នៅ​ក្នុង​ឆ្នាំ​២០១២។

ការអំពាវនាវ​កើតមាន​នៅ​ក្នុង​អំឡុងពេល​ចរចាគ្នា​នៅ​ចុងសប្តាហ៍​រវាង​រដ្ឋមន្ត្រី​ ក្រសួង​ការបរទេស​ប្រទេស​អូស្ត្រាលី​ លោក​ ខេវិន រ៉ឺដ (Kevin Rudd) និង​រដ្ឋមន្ត្រី​ក្រសួង​ការបរទេស​ថៃ​ លោក​ កាស៊ីត​ភីរ៉ុមយ៉ា (Kasit Piromya)​ នៅ​ក្នុង​ទីក្រុង​បាងកក​ រាជធានី​នៃ​ប្រទេស​ថៃ។

ប្រទេស​ភូមា​បាន​បោះបង់​ចោល​សិទ្ធិ​របស់​ខ្លួន​ក្នុងការ​ធ្វើ​ជា​ប្រធាន​អាស៊ាន​នៅ​ ក្នុង​ឆ្នាំ​២០០៥​ ដោយសារ​សម្ពាធ​ពី​អន្តរជាតិ​លើ​ប្រវត្តិ​សិទ្ធិ​មនុស្ស​របស់​ខ្លួន។​ ប្រទេស​ភូមា​ឥឡូវនេះ​ បង្ហាញ​កំណែទម្រង់​នយោបាយ​ចាប់តាំង​ពីពេល​ នោះមក​ រួមមាន​ទាំង​ការ​បោះឆ្នោត​សាកល​កាលពី​ឆ្នាំ​មុន​និង​ការបង្កើត​សភា​តំណាងរាស្ត្រ​ថ្មី​មួយ​ ព្រមទាំង​ការដោះលែង​មេដឹកនាំ​គណៈបក្ស​ប្រឆាំង​ លោកស្រី​ អោង​សាន​ ស៊ូជី​ ពី​ការឃុំខ្លួន​ក្នុងផ្ទះ​ផងដែរ​ កាលពី​ឆ្នាំ​មុន។

ប៉ុន្តែ​ក្រុម​អ្នកការពារ​សិទ្ធិមនុស្ស​ឲ្យ​ហេតុផល​ថា​សភា​ត្រូវបាន​កាន់កាប់​ភាគច្រើន​ដោយ​ពួក​យោធា​និង​បណ្តា​គណបក្ស​នយោបាយ​ដែល​ពួក​យោធា​គាំទ្រ​ នៅ​ពេល​មាន​អ្នកទោស​នយោបាយច្រើនជាង​ពីរពាន់នាក់​នៅ​ជាប់​ក្នុង​ពន្ធនាគារ​នៅឡើយ​ នៅ​ពាសពេញ​ប្រទេស​ ក៏​ដូចគ្នា​នឹង​ការវាយ​ប្រហារ​ទៅលើ​សហគមន៍​នៃ​ក្រុម​ជន​ភាគតិច​ដែល​កំពុង​នៅ​មាន​បន្ត។

វិធានការណ៍​ដែល​ប្រទេស​ភូមា​ទទួល​ធ្វើ​ជា​ប្រធាន​អាស៊ាន​នៅ​ឆ្នាំ​២០១៤​នោះ​ កំពុង​ធ្វើ​ឲ្យមាន​ការ​មិនចុះ​សំរុងគ្នា​នៅ​ក្នុង​សមាគម​អាស៊ាន។

លោក​ រ៉ឺដ​ នៃ​ប្រទេស​អូស្ត្រាលី​និយាយ​ថា​ ប្រទេស​ភូមា​ចាំបាច់​ត្រូវ​ធ្វើ​ឲ្យ​មាន​ភាពជឿនលឿន​ថែមទៀត​មុននឹង​ពិចារណា​ធ្វើជា​ប្រធាន​អាស៊ាន។ លោក​ រ៉ឺដ​មាន​ប្រសាសន៍​ថា៖

«ទស្សនៈ​របស់​យើង​ដែលជា​ប្រទេស​អូស្ត្រាលី​ គឺថា​យើង​ចង់​ឃើញ​បញ្ហា​សិទ្ធិ​មនុស្ស​និង​ប្រជាធិបតេយ្យ​នៅក្នុង​ប្រទេស​ភូមា​ បាន​ប្រសើរ​ជាង​មុន​ និង​បន្ត​អនុវត្ត​តាម​ដោយ​គ្មាន​អាក់ខាន។​ នៅ​ក្នុង​អតីតកាល​ យើង​បាន​ស្វាគមន៍​ការដោះលែង​ លោកស្រី​ អោង​សាន​ ស៊ូជី​ យើង​មាន​ការ​ព្រួយបារម្ភ​យ៉ាង​ខ្លាំង​អំពី​ការបន្ត​ការឃុំឃាំង​អ្នកទោស​នយោបាយ​ពីរពាន់​នាក់»។

លោក​ រ៉ឺដ​ ក៏បាន​ចង្អុល​អំពី​បញ្ហា​ដូចជា​ជនជាតិ​ភូមា​១១ម៉ឺន​នាក់​ផងដែរ​ដែល​រស់នៅ​ នៅក្នុង​ជំរុំ​ភៀសខ្លួន​ក្នុង​ប្រទេស​ថៃ​ភាគ​ខាង​លិច​ ហើយ​និង​មនុស្ស​ច្រើន​ពាន់​នាក់​ទៀត​ដែល​ផ្លាស់​ទីលំនៅ​ នៅ​ក្នុង​ប្រទេស​ភូមា​ដោយ​មក​ពី​ការប្រយុទ្ធ​គ្នា​រវាង​ក្រុម​ជនជាតិ​ភាគតិច​និង​កងយោធា​ភូមា។​ លោក​ ម៉ាកទី​ ណាតេឡាហ្គាវ៉ា​ (Marty Natelagawa) រដ្ឋមន្ត្រី​ក្រសួង​ការបរទេស​ប្រទេស​ឥណ្ឌូនេស៊ី​ ដែល​បច្ចុប្បន្ន​ជា​ប្រធាន​សមាគម​អាស៊ាន​ គ្រោង​ធ្វើ​ទស្សនកិច្ច​នៅ​ប្រទេស​ភូមា​ ដើម្បី​ប៉ាន់តម្លៃ​នៃ​ការត្រៀម​ខ្លួន​របស់​ប្រទេស​ភូមា​ ក្នុងការ​ទទួល​កិច្ចប្រជុំ​អាស៊ាន​នៅ​ក្នុង​ឆ្នាំ​២០១៤។

លោក​ កាស៊ីត​ រដ្ឋមន្ត្រី​ក្រសួង​ការបរទេស​ថៃ​ និយាយថា​ ការ​វាយតម្លៃ​ត្រូវ​រួម​មាន​ទាំង​ភាពជឿនលឿន​របស់​ប្រទេស​ភូមា​ដែល​ស្គាល់​ជា​ម៉ៃយ៉ាន់ម៉ា​ រាប់តាំងពី​ការបោះឆ្នោត​និង​កាតព្វកិច្ច​របស់​ភូមា​នៅ​ក្រោម​ធម្មនុញ្ញ​អាស៊ាន​ ដែល​រួមមាន​ទាំង​ការទទួលស្គាល់​បញ្ហា​សិទ្ធិ​មនុស្ស​ផងដែរ។​ លោក​ កាស៊ីត​និយាយ​ថា​ នៅ​តែមាន​បញ្ហា​ធំៗ​នៅឡើយ។

«ជាពិសេស​ គឺ​ការដោះលែង​អ្នកទោស​នយោបាយ​ទាំងអស់​ដែល​នៅ​សេសសល់​ សេរីភាព​ទូទៅ​ទាំងស្រុង​ឬ​សេរីភាវូបនីយកម្ម​នៃ​ការអនុវត្តន៍​នយោបាយ​ទាំងស្រុង​ ក៏​ដូចគ្នា​នឹង​ការសន្ទនា​គ្នា​ដែល​គេ​ទន្ទឹង​រង់ចាំ​ជាយូរ​រវាង​ លោកស្រី​ អោង​សាន​ ស៊ូជី​ ក្នុង​នាម​គណៈបក្ខ​ប្រឆាំង​និង​រដ្ឋាភិបាល​ដែល​តែងតាំង​ថ្មីៗ​ដោយ​ម៉ៃយ៉ាន់ម៉ា​ ដែលជា​ផ្នែកមួយ​នៃ​ដំណើរ​ផ្សះផ្សាជាតិ​និង​ការស្ថាបនា​ជាតិ»។

ក្រុម​ការពារ​សិទ្ធិ​មនុស្ស​បាន​ស្វាគមន៍​ជំហរ​របស់​ប្រទេស​អូស្ត្រាលី​និង​ថៃ​ នៅ​ក្នុង​ការទាមទារ​ឲ្យមាន​កំណែទម្រង់​នយោបាយ​នៅក្នុង​ប្រទេស​ភូមា។​ លោកស្រី​ Debbie​ Stothard​ ជា​ស្ត្រី​អ្នកនាំពាក្យ​នៃ​ក្រុមសិទ្ធិ​មនុស្ស​ឈ្មោះ​ the Alternative​ ASEAN​ Network។​ លោកស្រី​មាន​ប្រសាសន៍​ថា៖

«ប្រទេស​ភូមា​មិនគួរ​អនុញ្ញាត​ឲ្យធ្វើ​ជា​ប្រធាន​អាស៊ាន​ទេ​ លុះណាតែ​ប្រទេស​នេះ​បាន​ចាប់ផ្តើម​ធ្វើ​កំណែទម្រង់​ពិតប្រាកដ​ គឺ​មានន័យ​ថា​ ដោះលែង​អ្នកទោស​នយោបាយ​ និង​បញ្ឈប់​សង្គ្រាម​ប្រឆាំង​នឹង​សហគមន៍​ជនជាតិ​ភាគតិច»។

លោកស្រី​ Stothard​ និយាយថា​ ប្រសិនបើ​ប្រទេស​ភូមា​ទទួល​យក​កៅអី​ប្រធាន​អាស៊ាន​នៅ​ក្នុង​ឆ្នាំ​២០១៤​ដោយ​គ្មាន​កំណែរទម្រង់​ជាបន្ថែម​ទេនោះ​ ក្រុម​ប្រទេស​ដៃគូ​ពិភាក្សា​សំខាន់ៗ​ ដែល​រួមមាន​ទាំង​ប្រទេស​អូស្ត្រាលី​ កាណាដា​ សហគមន៍​អឺរ៉ុប​និង​ប្រទេស​ជប៉ុន​ ព្រមទាំង​ សរអា​ ផងនោះ​អាច​ធ្វើ​ពហិកា​មិន​ចូលរួម​ក្នុង​កិច្ចប្រជុំ។

ប្រែសម្រួល​ដោយ នុច សារីតា

XS
SM
MD
LG