នៅក្នុងចរន្តនៃពិភពលោកបច្ចុប្បន្ននេះ ទំនាក់ទំនងរវាងអ៊ីរ៉ង់និងអារ៉ាប៊ីសាអូឌីតត្រូវបានគេមើលឃើញថាជាល្បែងបំបាក់គូភាគី មានន័យថា បើសិនជាភាគីមួយត្រូវគេគិតថាកំពុងមានប្រៀបនោះ គេសន្មត់ថា គាគីមួយទៀតនឹងត្រូវចាញ់។ តើវាជាការពិតឬយ៉ាងណានោះ នៅពេលដែលសម្ព័ន្ធមិត្តថ្នាក់តំបន់និងនៅក្នុងសាកលលោកកំពុងតែប្រែប្រួលនោះ គេមើលឃើញថា ប្រទេសអារ៉ាប៊ីសាអូឌីតកំពុងតែរៀបចំឡើងវិញនូវថ្នាក់ដឹកនាំរបស់ខ្លួនដែលធានាថានឹងមានគោលការណ៍ច្បាស់លាស់មួយក្នុងការស្នងតំណែងដោយមនុស្សវ័យក្មេងប្រកបដោយការប្តេជ្ញាចិត្តដោយសង្ឃឹមថានឹងពង្រីកអំណាចរបស់អារ៉ាប៊ីសាអូឌីតនៅក្នុងតំបន់ នៅខណៈពេលដែលព្រះមហាក្សត្រប្រទេសនេះខិតចូលជិតដល់ថ្ងៃខួបព្រះជន្ម៨០ឆ្នាំ។
ថ្នាក់ដឹកនាំនៃប្រទេសនៅឈូងសមុទ្រ Gulf មួយនេះ បានមកដល់ទីក្រុង Riyadh រាជធានីនៃប្រទេសអារ៉ាប៊ីសាអូឌីតដើម្បីត្រៀមខ្លួនចូលរួមក្នុងកិច្ចប្រជុំកំពូលមួយនៅសហរដ្ឋអាមេរិក។ គេមានការចាប់អារម្មណ៍យ៉ាងខ្លាំងលើរាជវង្សានុវង្សនៃប្រទេសមួយនេះ។ ព្រះមហាក្សត្រដែលមានវ័យចំណាស់ទៅហើយបានតែងតាំងអ្នកដែលស្នងតំណែងវ័យក្មេង និងដាក់ជំនួសរដ្ឋមន្រ្តីក្រសួងការបរទេសដែលបានកាន់អំណាចជាយូរមកហើយគឺលោក Saud al-Faisal ដែលមានអាយុ៧៥ឆ្នាំ។
លោក Theodore Karasik អ្នកវិភាគភូមិសាស្ត្រនយោបាយមានមូលដ្ឋាននៅតំបន់ឈូងសមុទ្រ Gulf និងជាទីប្រឹក្សាជាន់ខ្ពស់របស់អង្គការ Gult State Analytics និយាយថា នេះជាសញ្ញានៃយុគសម័យថ្មីសម្រាប់ការបង្កើតគោលនយោបាយរបស់ប្រទេសអារ៉ាប៊ីសាអូឌីតទាំងនៅលើឆាកអន្តរជាតិនិងនៅក្នុងស្រុក។
«ចំពោះថ្នាក់ដឹកនាំថ្មីរបស់អារ៉ាប៊ីសាអូឌីត ពេលនេះពួកគេកំពុងចាប់ផ្តើមកាន់តំណែងនិងបង្កើតគោលនយោបាយ។ ការណ៍នេះនឹងមានភាពរឹងប៉ឹងជាងមុន មានសំឡេងខ្លាំងជាងមុន និងពោរពេញទៅដោយសកម្មភាព។ អារ៉ាប៊ីសាអូឌីតបានអនុវត្តគោលនយោបាយការបរទេសនិងសន្តិសុខរបស់ពួកគេតាមរបៀបមួយដ៏ស្ងប់ស្ងាត់មួយដោយធ្វើតាមផ្លូវក្រោយ ឬដោយវិធីផ្សេងៗទៀត។ ខ្ញុំគិតថាយើងនឹងឃើញមានថ្នាក់ដឹកនាំវ័យក្មេងថ្មីក្នុងពេលឆាប់ៗនេះ»។
ការតែងតាំងនេះរួមមានព្រះអង្គម្ចាស់ថ្មីដែលឈរលំដាប់ទីមួយក្នុងការសោយរាជបល្ល័ង្កនិងមានអាយុ៥៥ឆ្នាំគឺព្រះអង្គម្ចាស់ Mohammed bin Nayef រដ្ឋមន្ត្រីក្រសួងមហាផ្ទៃដែលមានភាពល្បីល្បាញដោយសារការប្រកាន់ជំហររឹងប៉ឹងរបស់ព្រះអង្គប្រឆាំងពួកអាល់កៃដា។ អ្នកដែលឈរលំដាប់ទីពីរក្នុងការឈានទៅកាន់រាជបល្ល័ង្កគឺជាបុត្ររបស់ព្រះមហាក្សត្របច្ចុប្បន្នដែលជារដ្ឋមន្ត្រីក្រសួងការពារជាតិគឺព្រះអង្គម្ចាស់ Mohammed bin Salman ដែលគេជឿថាស្ថិតនៅក្នុងវ័យ៣០ឆ្នាំផ្លាយ គាត់បានដឹកនាំអារ៉ាប៊ីសាអូឌីតនៅក្នុងការវាយប្រហាទៅលើប្រទេសយេម៉ែន។
អ្នកដែលជាប់ឈ្មោះថាជាអ្នកតាក់តែងគោលនយោបាយជាន់ខ្ពស់ម្នាក់ដែរនោះគឺ Adel al-Jubeir ជារដ្ឋមន្ត្រីក្រសួងការបរទេសថ្មីដែលបានបម្រើការជាឯកអគ្គរាជទូតរបស់អារ៉ាប៊ីសាអូឌីតប្រចាំសហរដ្ឋអាមេរិក។
លោក Karasik និយាយថា ការតែងតាំងរដ្ឋមន្ត្រីក្រសួងការពារជាតិវ័យក្មេងហាក់ដូចជារង្វាន់សម្រាប់ដោះស្រាយការឈ្លានពានទៅលើប្រទេសយេម៉ែន និងជាភស្តុតាងដ៏ច្បាស់មួយបញ្ជាក់ថាគោលនយោបាយការបរទេសរបស់អារ៉ាប៊ីសាអូឌីតកំពុងតែវិវត្តទៅមុខ។
«អ្វីដែលយើងបានឃើញមាននៅក្នុងប្រទេសយេម៉ែនដែលមានក្រុមចម្រុះដឹកនាំដោយអារ៉ាប៊ីសាអូឌីតនោះ គឺហួសពីការគិតរបស់យើង ឬហួសពីការគិតរបស់យើងរហូតដល់រឿងទាំងនោះបានកើតឡើងពិតប្រាកដ។ គ្មានអ្នកណាម្នាក់ជឿថា អារ៉ាប៊ីសាអូឌីតនឹងដឹកនាំក្រុមចម្រុះដើម្បីវាយប្រហារប្រទេសផ្សេងមួយទៀតនោះទេ»។
លោកបានបន្ថែមថា ការកើនឡើងភាពតានតឹងជាមួយប្រទេសអ៊ីរ៉ង់ក៏បានជំរុញឲ្យមានការផ្លាស់ប្តូរគោលនយោបាយ នៅខណៈដែលទំនាក់ទំនង់របស់ប្រទេសអ៊ីរ៉ង់ជាមួយប្រទេសលោកខាងលិច មានភាពធូរស្រាលដោយសារកិច្ចព្រមព្រៀងដ៏មានសក្តានុពលអំពីបញ្ហានុយក្លេអ៊ែរ ហើយប្រទេសអារ៉ាប៊ីសាអូឌីតហាក់កំពុងចាប់ផ្តើមទទួលបានឥទ្ធិពលផ្នែកយោធានិងសេដ្ឋកិច្ច។ នៅខណៈដែលគ្មានអ្នកណាម្នាក់បានគិតថានឹងមានសង្គ្រាមដែលប្រើគ្រប់មធ្យោបាយរវាងពួកសុន្នីដឹកនាំដោយ អារ៉ាប៊ីសាអូឌីតជាមួយនឹងអ៊ីរ៉ង់ដែលត្រួតត្រាដោយពួក Shi'ite នោះ ប្រទេសទាំងពីរនេះត្រូវគេជឿថាកំពុងតែវាយប្រយុទ្ធគ្នានៅក្នុងសមរភូមិមួយដែលពួកគេមិនប្រឈមមុខដាក់គ្នាដោយផ្ទាល់។
ប្រទេសអ៊ីរ៉ង់តែងតែបដិសេធជាផ្លូវការថាមិនមានភាពតានតឹងកើតឡើងទេ។ រដ្ឋមន្ត្រីការបរទេសអ៊ីរ៉ង់ Mohammad Javad Zarif បានថ្លែងនៅក្នុងទីក្រុងញ៉ូវយ៉កក្នុងសប្តាហ៍នេះថា ប្រទេសរបស់លោកមានទំនាក់ទំនងទ្វេភាគីល្អជាមួយមួយប្រទេសអារ៉ាប៊ីសាអូឌីត។ លោកបន្ថែមថា បើសិនជាមានបញ្ហាណាមួយនោះវាកើតឡើងដោយភាគីអារ៉ាប៊ីសាអូឌីត។
«យើងមិនយល់ឃើញថា ការគំរាមកំហែងរបស់យើង និងផលប្រយោជន៍របស់យើងក្នុងតំបន់មានភាពដាច់មុខតែពីរភាគីនេះទេ។ នេះជាការយល់ឃើញរបស់យើង។ ខ្ញុំសង្ឃឹមយ៉ាងមុតមាំថា ពួកគេនឹងមានការគិតដូចយើង ពីព្រោះដូចលោកបាននិយាយរួចហើយ ខ្ញុំមិនមែនជាអ្នករាំតែម្នាក់ឯងទេ ប៉ុន្តែវាចាំបាច់ត្រូវមានភាគីទាំងពីរដើម្បីរាំរបាំ Tango ជាមួយគ្នា»។
លោក al-Ashaal និយាយថា ការត្រៀមស្នងតំណែងថ្មីក៏អាចផ្លាស់ប្តូរម្តងទៀតដែរ ប្រសិនបើសមាជិកទាំងអស់នៃរាជវង្សានុវង្សបដិសេធមេដឹកនាំថ្មី។ ជាពិសេសទៅទៀតនោះ អារ៉ាប៊ីសាអូឌីតនៅពេលនេះកំពុងតែពង្រាយយោធាតិចតួចរបស់ខ្លួនដើម្បីវាយប្រហារយោធា Shi'ite ក្នុងប្រទេសអារ៉ាប៊ីសាអូឌីត និងក្រុមរដ្ឋអ៊ីស្លាមក្នុងប្រទេសអ៊ីរ៉ាក់។ ប្រសិនបើសង្គ្រាមនេះនៅតែបន្ត ឬក៏កងកម្លាំងរបស់អារ៉ាប៊ីសាអូឌីតត្រូវបង្ខំឲ្យដកថយនោះ ទស្សនៈវិស័យថ្មីដ៏មោះមុតរបស់ប្រទេសនេះ អាចនឹងមានលទ្ធផលផ្ទុយពីគម្រោងការរបស់ខ្លួន៕
ប្រែសម្រួលដោយ នៀម ឆេង
