រដ្ឋមន្ត្រីក្រសួងការបរទេសសហរដ្ឋអាមេរិកលោក Antony Blinken កាលពីថ្ងៃសៅរ៍ បានស្ថិតនៅក្នុងទីក្រុងអាម៉ាន់ ប្រទេសហ្ស៊កដានី បន្ទាប់ពីទស្សនកិច្ចទៅកាន់ប្រទេសអ៊ីស្រាអែលដើម្បីពិភាក្សាអំពីសង្គ្រាមរវាងប្រទេសអ៊ីស្រាអែលនិងហាម៉ាស់។
នៅក្នុងទីក្រុងអាម៉ាន់ លោក Blinken បានជួបជាមួយនឹងក្រុមមន្ត្រីរបស់ប្រទេសហ្ស៊កដានី និងក្រុមរដ្ឋមន្ត្រីមកពីបណ្ដាប្រទេសអារ៉ាប់ ដែលមានដូចជាប្រទេសអារ៉ាប់ប៊ីសាអូឌីត ប្រទេសអេមីរ៉ាតអារ៉ាប់រួម ប្រទេសអេហ្ស៊ីប និងប្រទេសកាតា និងអគ្គលេខាធិការនៃគណៈកម្មាធិការប្រតិបត្តិរបស់អង្គការ Palestine Liberation ផងដែរ។
ពួកគេបានជួបប្រជុំគ្នាដើម្បីរៀបចំផែនការនានាក្នុងការបញ្ចប់វិបត្តិមនុស្សធម៌ក្នុងតំបន់ហ្កាហ្សា និងបញ្ចប់សង្គ្រាមរវាងអ៊ីស្រាអែលនិងក្រុមហាម៉ាស់។
លោក Blinken ក៏ជួបកាលពីថ្ងៃសៅរ៍ជាមួយនឹងនាយករដ្ឋមន្ត្រីនៃប្រទេសលីបង់លោក Najib Mikati ផងដែរ។
នៅមុនទស្សនកិច្ចរបស់លោក Blinken រដ្ឋមន្ត្រីក្រសួងការបរទេសហ្ស៊កដានីលោក Ayman Safadi បាននិយាយនៅក្នុងសេចក្ដីថ្លែងការណ៍មួយថា ប្រទេសអ៊ីស្រាអែលត្រូវតែបញ្ចប់សង្គ្រាមក្នុងតំបន់កាហ្សា (Gaza) ដែលលោកបាននិយាយថា ប្រទេសអ៊ីស្រាអែលបានប្រព្រឹត្តអំពើឧក្រិដ្ឋកម្មសង្គ្រាមនៅទីនោះដោយទម្លាក់គ្រាប់បែកលើជនស៊ីវិលនិងការកាត់ផ្ដាច់ការគាំទ្រនានា។
កាលពីថ្ងៃសុក្រ លោក Blinken បានថ្លែងថា ការណ៍រារាំងការកើនឡើងនិងការរីករាលដាលនូវជម្លោះរវាងប្រទេសអ៊ីស្រាអែលនិងក្រុមហាម៉ាស់ដែលមានរយៈពេលជិតមួយខែមកហើយ គឺជាអាទិភាពចម្បងបន្ទាប់ពីលោកបានជួបជាមួយនឹងនាយករដ្ឋមន្ត្រីអ៊ីស្រាអែលលោក Benjamin Netanyahu និងគណៈរដ្ឋមន្ត្រីទទួលបន្ទុកផ្នែកសង្គ្រាមរបស់អ៊ីស្រាអែលក្នុងទីក្រុង Tel Aviv។
បន្ទាប់ពីជំនួបនោះ លោក Blinken បានបង្ហាញដល់ក្រុមអ្នកសារព័ត៌មាននូវជំហាននានាដែលលោកបានថ្លែងថា ត្រូវតែធ្វើដើម្បីធានាថា ការវាយប្រហារណាមួយដូចដែលត្រូវបានធ្វើឡើងដោយក្រុមហាម៉ាស់កាលពីថ្ងៃទី ៧ ខែតុលា កន្លងទៅនេះ នឹងមិនកើតឡើងម្ដងទៀតនោះទេ និងដើម្បីធានានូវ «ថ្ងៃស្អែកដែលប្រសើរជាងមុន» សម្រាប់ប្រជាជនអ៊ីស្រាអែលនិងជនអំបូរប៉ាឡេស្ទីន។
លោក Blinken បានថ្លែងយ៉ាងដូច្នេះថា៖ «យើងបាននិយាយយ៉ាងច្បាស់ថា ខណៈពេលដែលអ៊ីស្រាអែលធ្វើយុទ្ធនាការរបស់ខ្លួនដើម្បីកម្ចាត់ក្រុមហាម៉ាស់ វិធីដែលអ៊ីស្រាអែលធ្វើរឿងនេះគឺសំខាន់ខ្លាំងណាស់។ វាសំខាន់ដោយសារតែវាគឺជារឿងដែលត្រឹមត្រូវនិងស្របច្បាប់ក្នុងការធ្វើ។ វាសំខាន់ដោយសារតែការបរាជ័យក្នុងការធ្វើដូច្នេះនឹងនាំឱ្យក្រុមហាម៉ាស់និងក្រុមភេរវជនដទៃទៀតឈ្នះ»។
លោក Blinken បានថ្លែងទៀតថា៖ «នឹងមិនមានដៃគូសម្រាប់សន្ដិភាពនោះទេ ប្រសិនបើពួកគេជួបនឹងមហន្ដរាយមនុស្សធម៌និងមិនត្រូវបានអើពើនៅពេលដែលពួកគេជួបនឹងវិបត្តិ»។
លោក Blinken ថ្លែងថា សហរដ្ឋអាមេរិកគាំទ្រសិទ្ធិនិង«កាតព្វកិច្ច»របស់អ៊ីស្រាអែលក្នុងការការពារខ្លួន ប៉ុន្តែលោកក៏បានអំពាវនាវដល់អ៊ីស្រាអែលឱ្យផ្អាកប្រតិបត្តិការយោធារបស់ខ្លួននិងអនុញ្ញាតឱ្យមានការដឹកជញ្ជូនជំនួយមនុស្សធម៌បន្ថែមទៀតចូលទៅកាន់តំបន់កាហ្សា។ លោកថ្លែងថា ការការពារជនស៊ីវិលប៉ាឡេស្ទីនគឺជាអាទិភាពចម្បងទីពីរនៅក្នុងទស្សនកិច្ចរបស់លោក។
ជាការឆ្លើយតប លោក Netanyahu បាននិយាយថា៖ «យើងកំពុងតែបន្ដនូវរាល់ប្រតិបត្តិការរបស់កងកម្លាំងរបស់យើង ហើយអ៊ីស្រាអែលបដិសេធមិនព្រមបញ្ឈប់ការបាញ់គ្នាជាបណ្ដោះអាសន្ននោះទេ តែនេះមិនរាប់បញ្ចូលទាំងការដោះលែងចំណាប់ខ្មាំងនោះឡើយ»៕
ប្រែសម្រួលដោយអ្នកស្រី ហុង ចិន្ដា
