អាជីវកម្មនានា និងស្ថានីយរថភ្លើងបានបើកដំណើរការជាធម្មតាហើយក្នុងទីក្រុងហុងកុង កាលពីថ្ងៃចន្ទកន្លងទៅ គឺនៅមួយថ្ងៃបន្ទាប់ពីទីក្រុងនេះមានភាពវឹកវរឡើងវិញ បន្ទាប់ពីមានការប៉ះទង្គិចហិង្សាដាក់គ្នារវាងបាតុករគាំទ្រលទ្ធិប្រជាធិបតេយ្យ និងក្រុមអ្នកគាំទ្ររដ្ឋាភិបាលក្រុងប៉េកាំង។
នៅជិតសង្កាត់ North Point និងសង្កាត់ Fortress Hill មនុស្សមកពីភាគីប្រឆាំង និងពីភាគីគាំទ្ររដ្ឋាភិបាលចិនបានប៉ះទង្គិចគ្នាបង្កជាអំពើហិង្សា និងបានបណ្តាលឲ្យមនុស្សមួយចំនួនរងរបួសកាលពីថ្ងៃអាទិត្យ។
ខណៈក្រុមអ្នកគាំទ្ររដ្ឋាភិបាលចិនដីគោក បានហែកចោលក្រដាសដែលបានបិទនៅលើជញ្ជាំង John Lennon ក្រុមចិនដីគោកមួយផ្សេងទៀតដែលស្លៀកពាក់ពណ៌សបានវាយប្រហារទៅលើក្រុមបាតុករគាំទ្រលទ្ធិប្រជាធិបតេយ្យដែលស្លៀកពាក់ពណ៌ខ្មៅ និងថែមទាំងបានប្រើភាសាជេរប្រមាថមើលងាយទៅលើពួកគេថែមទៀតផង ដោយស្រែកបន្លឺថា «ពលរដ្ឋ Fujian វាយបង្រ្កាបពួកសត្វកន្លាត»។ Fujian គឺជាឈ្មោះខេត្តមួយស្ថិតនៅភាគអាគ្នេយ៍ចិនដីគោក។
ចំណែកឯនៅកន្លែងផ្សេងទៀតវិញ បាតុករស្លៀកពាក់ពណ៌ខ្មៅ៦នាក់បានយកឆ័ត្រវាយខ្នងបុរសអាយុ៤៩ឆ្នាំម្នាក់។ បុរសនោះត្រូវបានរាយការណ៍ថាបានសន្លប់បាត់បង់ស្មារតី។
ការប្រឆាំងនឹងការប្រមូលផ្តុំ
ក្រុមអ្នកវិភាគបាននិយាយថា ព្រឹត្តិការណ៍ដែលបានកើតឡើងជាបន្តបន្ទាប់បែបនេះ ប្រហែលមានន័យថាទីក្រុងប៉េកាំងអាចបង្កើតយុទ្ធសាស្រ្តប្រឆាំងនឹងការប្រមូលផ្តុំ និងហាក់ដូចជាអំពាវនាវឲ្យជនចំណាកស្រុកចិនដីគោកដែលប្រឈមមុខជាមួយនឹងបាតុករប្រឆាំងនឹងចិន ឲ្យមានការអត់ធ្មត់។
បាតុកម្មបានចាប់ផ្តើមកាលពីខែមិថុនា បន្ទាប់ពីរដ្ឋាភិបាលក្រុងហុងកុងក្រោមការគ្រប់គ្រងរបស់នាយកប្រតិបត្តិលោកស្រី Lam បានបង្កើតសំណើច្បាប់បត្យាប័នដ៏ចម្រូងចម្រាសមួយ ដែលពលរដ្ឋហុងកុងភាគច្រើនមើលឃើញថា ជាការព្យាយាមលុបបំបាត់ស្វ័យភាពរបស់ដែនអធិបតេយ្យក្រុងហុងកុង នៅក្រោមច្បាប់របស់ចិន។ បន្ទាប់មកលោកស្រី Lam បានសម្រេចដកសំណើច្បាប់នេះចេញវិញ។ រដ្ឋាភិបាលក្រុងហុងកុងបានបញ្ជាក់ថា អំពើហិង្សាមិនមែនជាចម្លើយនោះទេ។
អ្នកវិភាគបានឲ្យដឹងបន្ថែមទៀតថា ចំណាត់ការនេះនឹងមិនជួយបញ្ចប់ភាពតានតឹងនយោបាយនៅក្នុងទីក្រុងហុងកុងទេ ផ្ទុយទៅវិញក្រុមយុវជនដែលប្រយុទ្ធដើម្បីសេរីភាពនឹងមានកំហឹងកាន់តែខ្លាំងឡើង។
លោក Dixon Sing សាស្រ្តាចារ្យជំនួយផ្នែកវិទ្យាសាស្រ្តសង្គមនៃសាកលវិទ្យាល័យវិទ្យាសាស្ត្រនិងបច្ចេកវិទ្យានៅក្រុងហុងកុងបានថ្លែងថា៖ «នៅក្នុងក្រសែភ្នែកសាធារណៈជនជាច្រើន បាតុករទាំងនោះពិតជាអ្នកស្រឡាញ់ក្រុងហុងកុង ហើយយល់ថាពួកគេលះបង់ដើម្បីការពារសេរីភាពរបស់ទីក្រុងហុងកុង។ ដូច្នេះមនុស្សភាគច្រើននឹងមានកំហឹងកាន់តែខ្លាំងដូចជាអណ្តាតភ្លើងកំពុងតែឆាបឆេះអ៊ីចឹង»។
លោក Sing បានលើកឡើងអំពីការស្ទង់មតិនៅក្នុងសារព័ត៌មាន Ming Pao ដែលជាសារព័ត៌មានក្នុងស្រុកជាភាសាចិនបានបង្ហាញថា ការឆ្លើយតបជាង៧០ភាគរយពីសាធារណៈជននៅតែមិនពេញចិត្តជាមួយនឹងការធ្វើសម្បទាននានា រួមទាំងការសម្រេចរបស់លោកស្រី Lam ក្នុងការដកចេញសំណើច្បាប់បត្យាប័នដ៏ចម្រូងចម្រាសនេះ។
ការប្តេជ្ញាចិត្តរបស់អ្នកស្រុកហុងកុង
លោកសាស្រ្តាចារ្យបាននិយាយបន្ថែមទៀតថាការស្ទង់មតិជាច្រើនបានឲ្យដឹងថា ការទាមទារទាំង៥ចំណុចរបស់ក្រុមបាតុករ ជាពិសេសគឺការបង្កើតគណៈកម្មការឯករាជ្យដើម្បីស៊ើបអង្កេតលើកំហុសឆ្គងរបស់ក្រុមប៉ូលិស គួរតែត្រូវបានរៀបចំឡើង»។
ក្រុមអ្នកវិភាគបាននិយាយថា បើទោះបីជាមានភស្តុតាងតិចតួចដែលថា ការិយាល័យទំនាក់ទំនងកិច្ចការរបស់ចិននៅក្រុងហុងកុង គឺជាអ្នកនៅពីក្រោយការប្រឹងប្រែងប្រឆាំងនឹងការកេណ្ឌប្រមូលផ្តុំក្នុងទីក្រុងហុងកុងក៏ដោយ ក៏ហាក់ដូចជាបង្ហាញថាមានភាពអត់ធ្មត់ចំពោះអ្នកដែលប្រកាន់ទស្សនៈគាំទ្រក្រុងប៉េកាំង។
លោក David Zweig ប្រធានក្រុមសាស្រ្តាចារ្យផ្នែកវិទ្យាសាស្រ្តសង្គមនៃសាកលវិទ្យាល័យវិទ្យាសាស្រ្តនិងបច្ចេកវិទ្យាក្រុងហុងកុងបានថ្លែងថា «ច្បាស់ណាស់ថា ពួកគេខិតខំធ្វើការយ៉ាងខ្លាំង ដើម្បីបង្រួបបង្រួមរណៈសិរ្សនេះឡើង ដើម្បីគាំទ្រគោលនយោបាយរបស់ចិនដីគោក និងរដ្ឋាភិបាលក្រុងហុងកុង។ ដូច្នេះចំណាត់ការប្រឆាំងនឹងការប្រមូលផ្តុំដូច្នេះ បើសិនជាវាកើតឡើងដោយសន្តិវិធីនោះ ខ្ញុំគិតថាវាគឺជាការអត់ធ្មត់ដ៏ខ្លាំងមួយ»។
ខណៈភាពតានតឹងរវាងក្រុងហុងកុងនិងចិនកាន់តែកើនឡើង ប្រទេសចិននៅបន្តរកលេសដើម្បីរិះគន់ក្រុមសកម្មជនគាំទ្រលទ្ធិប្រជាធិបតេយ្យក្រុងហុងកុង និងបន្តចោទប្រកាន់រដ្ឋាភិបាលបស្ចឹមប្រទេស ថាជាអ្នកនៅពីក្រោយមហាបាតុកម្មក្នុងក្រុងហុងកុង។
ការជ្រៀតជ្រែករបស់បរទេស
នៅក្នុងអត្ថាធិប្បាយមួយដែលបានផ្សព្វផ្សាយនៅលើកម្មវិធីផ្ញើសារ WeChat របស់ចិនកាលពីថ្ងៃសុក្រកន្លងទៅ គណៈកម្មការកិច្ចការច្បាប់ និងនយោបាយកណ្តាលរបស់គណបក្សបានជំរុញដល់យុវជនក្មេងៗនៅក្រុងហុងកុង កុំឲ្យមានក្តីសង្ឃឹមច្រើនទៅលើការជួយពីសំណាក់បស្ចឹមប្រទេសដើម្បីដោះស្រាយវិបត្តិនយោបាយនៅក្នុងក្រុងហរិញ្ញវត្ថុមួយនេះ។
អត្ថាធិប្បាយនោះបានសរសេររៀបរាប់ថា «ពួកបស្ចឹមប្រទេសមិនអាចដោះស្រាយបញ្ហារបស់អ្នកបានទេ។ អ្នកដែលអំពាវនាវឲ្យមនុស្សចេញធ្វើបាតុកម្មនៅតាមផ្លូវ គ្មានដំណោះស្រាយឲ្យអ្នកទេ។ ពួកគេគ្មានអ្វីទាំងអស់ ក្រៅតែពីនិយាយអំពីលទ្ធិប្រជាធិបតេយ្យនិងសេរីភាពតែប៉ុណ្ណោះ»។
អត្ថាធិប្បាយនោះបានជំរុញឲ្យអ្នកស្រុកហុងកុងក្រឡេកមើលទៅភាគខាងជើងសម្រាប់ឱកាសសេដ្ឋកិច្ចនានានៅក្នុងប្រទេសចិន។ អតា្ថធិប្បាយនោះបានសរសេរទៀតថា «នៅតាមទីកន្លែងនានាដែលក្រុមបស្ចឹមប្រទេសទាំងនេះបានជួយដើម្បីឲ្យមានលទ្ធិប្រជាធិតេយ្យនិងសេរីភាពនោះ គឺសុទ្ធតែមានបញ្ហាទាំងអស់។ ពួកបស្ចឹមប្រទេសទាំងនេះមិនទាំងអាចដោះសា្រយបញ្ហានៅក្នុងប្រទេសរបស់ពួកគេបានផង»។
អតា្ថធិប្បាយនេះត្រូវបានគេជឿថា ចង់សំដៅទៅលើក្រុមមេដឹកនាំចលនាគាំទ្រលទ្ធិប្រជាធិបតេយ្យ ដូចជាលោក Joshua Wong អ្នកដែលបានធ្វើដំណើរទៅកោះតៃវ៉ាន់ សហរដ្ឋអាមេរិក និងប្រទេសអាល្លឺម៉ង់ដើម្បីស្វែងរកការគាំទ្រពីអន្តរជាតិនិងអន្តរាគមន៍ពីបរទេស។
លោកសាស្រ្តចារ្យ Zweig បានថ្លែងទៀតថា ប្រទេសចិនជាយូរមកហើយយល់ថា អំណាចរបស់បរទេសគឺជាប្រភពនៃបញ្ហា ដែលអនុញ្ញាតឲ្យខ្លួនព្រងើយកន្តើយចំពោះជម្លោះផ្ទៃក្នុង។
លោកសាស្រ្តាចារ្យបានថ្លែងថា «អ្វីដែលកំពុងប្រឈមនឹងទីក្រុងហុងកុងពិតប្រាកដនោះ គឺបញ្ហាសេដ្ឋកិច្ចសង្គម និងជម្លោះនយោបាយផ្ទៃក្នុង មិនមែនការជ្រៀតជ្រែករបស់បរទេសទេ។
លោកសាស្រ្តាចារ្យបានថ្លែងបន្ថែមទៀតថា «ចំណុចតែមួយគត់ដែលរដ្ឋាភិបាលបរទេសអាចមានឥទ្ធិពលខ្លាំងនោះ គឺប្រសិនបើសហរដ្ឋអាមេរិកលុបចោលច្បាប់គោលនយោបាយក្រុងហុងកុង ពីព្រោះថា ពេលនោះចិននឹងមិនអាចចូលទៅក្នុងទីផ្សារបច្ចេកវិទ្យារបស់អាមេរិកតាមរយៈក្រុងហុងកុងបានទេ»។ នៅក្រោមច្បាប់គោលនយោបាយឆ្នាំ១៩៩២របស់សហរដ្ឋអាមេរិកសម្រាប់ក្រុងហុងកុងបានចែងថា សហរដ្ឋអាមេរិកចាត់ទុកក្រុងហុងកុងដែលជាអតីតអាណានិគមចក្រភពអង់គ្លេស នៅដាច់ដោយឡែកពីចិនគោក ចំពោះទំនាក់ទំនងពាណិជ្ជកម្ម និងការគ្រប់គ្រងសេដ្ឋកិច្ចបន្ទាប់ពីការប្រគល់ក្រុងហុងកុងឲ្យទៅចិនដីគោកវិញកាលពីឆ្នាំ១៩៩៧។
ការខាតបង់សេដ្ឋកិច្ច
មានក្តីបារម្ភនានាអំពីអនាគតសេដ្ឋកិច្ចរបស់ក្រុងហុងកុង។ ផ្សារភាគហ៊ុននៅទីក្រុងឡុងដ៍នាពេលថ្មីៗនេះបានទាត់ចោលការដេញថ្លៃកាន់កាប់ហ៊ុនតម្លៃ៣៩ពាន់លានដុល្លារសហរដ្ឋអាមេរិកដោយផ្សារហ៊ុនរបស់ក្រុងហុងកុង។
ចំណែកឯការស្ទង់មតិមួយរបស់សភាពាណិជ្ជកម្មអាមេរិកនៅក្រុងហុងកុងបានបង្ហាញថាអ្នកវិនិយោគខ្វះសេចក្តីទុកចិត្តក្នុងការវិនិយោគនៅក្នុងទីក្រុងនេះ។
ការស្ទង់មតិរបស់សភាពាណិជ្ជកម្មបានរកឃើញថា អ្នកដែលត្រូវបានស្ទង់មតិ៦៧ភាគរយជឿថា កេរ្តិ៍ឈ្មោះរបស់ទីក្រុងដែលធ្លាប់ជាមូលដ្ឋានប្រតិបត្តិការក្នុងតំបន់ ត្រូវបានធ្លាក់ចុះ ខណៈ៨០ភាគរយទៀតយល់ថា ភាពវឹកវរដែលបានអូសបន្លាយជាច្រើនខែមកនេះ បានប៉ះពាល់ដល់ការសម្រេចបោះទុនវិនិយោគក្នុងក្រុងហុងកុង។
ឆ្លើយតបទៅនឹងក្តីបារម្ភពាក់ព័ន្ធនឹងបញ្ហាសេដ្ឋកិច្ចនិងនយោបាយនៅក្នុងទីក្រុងហុងកុង ពួកមេដឹកនាំកំពូលរបស់ចិនកំពុងដើរដល់ចំណុចដែលខ្លួនត្រូវចាត់វិធានការ។ នេះបើយោងតាមលោកសាស្រ្តាចារ្យ Sing។
លោកសាស្រ្តាចារ្យ Sing បានបញ្ជាក់ថា ចិនចង់ដាក់ទីក្រុងហុងកុងឲ្យស្ថិតក្រោមការគ្រប់គ្រងរបស់ខ្លួនឲ្យបានក្នុងរយៈពេល២០ឆ្នាំខាងមុខ ប៉ុន្តែទន្ទឹមនឹងនេះ ចិនមិនអាចឲ្យទីក្រុងនេះបាត់បង់កេរ្តិ៍ឈ្មោះរបស់ខ្លួនជាមជ្ឈមណ្ឌលហិរញ្ញវត្ថុធំជាងគេទីបីនៅក្នុងពិភពលោកបានទេ ដែលកេរ្តិ៍ឈ្មោះសេដ្ឋកិច្ចនេះបានផ្តល់ផលប្រយោជន៍យ៉ាងខ្លាំងដល់ប្រទេសចិន ជាពិសេសនៅពេលដែលសេដ្ឋកិច្ចរបស់ចិនកំពុងរងផលប៉ះពាល់ដោយសង្គ្រាមពាណិជ្ជកម្មជាមួយនឹងសហរដ្ឋអាមេរិក៕
ប្រែសម្រួលដោយ ស៊ូ ពេជ្រចិន្តា
