មុនពេលដាក់គម្រោងការជាក់លាក់ដើម្បីវិលត្រឡប់ទៅកាន់ប្រទេសកម្ពុជាវិញរបស់លោកនៅខែខាងមុខ មេដឹកនាំមួយរូបគណបក្សសង្គ្រោះជាតិដែលត្រូវរំលាយ ហើយកំពុងនិរទេសខ្លួនគឺលោកសម រង្ស៊ី បានធ្វើដំណើរទៅកាន់ប្រទេសអាស៊ីមួយចំនួន ដើម្បីគៀងគរការគាំទ្រនយោបាយ ជាកន្លែងដែលអាជ្ញាធរកម្ពុជាធ្លាប់គំរាមចាប់ខ្លួនលោកដើម្បីមកទទួលទោសក្នុងប្រទេសកម្ពុជា។
ថ្លែងក្នុងពេលជួបជាមួយក្រុមយុវជនកម្ពុជាមួយក្រុម ដែលកំពុងរស់នៅធ្វើការងារក្នុងប្រទេសម៉ាឡេស៊ី លោក សម រង្ស៊ី បានបញ្ជាក់ថា៖
«សូមជម្រាបសួរបងប្អូនជនរួមជាតិនៅប្រទេសកម្ពុជា! ថ្ងៃនេះត្រូវជាថ្ងៃទី១៦ ខែសីហា ឆ្នាំ២០១៩។ ពេលនេះ ខ្ញុំសម រង្ស៊ី កំពុងតែស្ថិតនៅក្នុងទីក្រុង គូឡាឡាំពួ ប្រទេសម៉ាឡេស៊ី។ នៅជុំវិញខ្ញុំគឺយុវជន យុវតីរាប់សិបនាក់មកពីគណបក្សសង្គ្រោះជាតិមកពីប្រទេសកម្ពុជា (សំឡេងស្រែកគាំទ្រ) ឃើញថា គណបក្សសង្គ្រោះជាតិរស់រវើក មានយុវជនយ៉ាងច្រើនកុះករ គាំទ្រគណបក្សសង្គ្រោះជាតិ ហើយរង់ចាំដំណើរមាតុភូមិនិវត្តន៍របស់ខ្ញុំ សម រង្ស៊ី ជាមួយថ្នាក់ដឹកនាំគណបក្សសង្គ្រោះជាតិក្នុងពេលឆាប់ៗខាងមុខនេះវិលត្រឡប់ទៅលើទឹកដីប្រទេសកម្ពុជាវិញ (សំឡេងស្រែកគាំទ្រ)។ សូមកោតសរសើរទឹកចិត្តដ៏ក្លាហានទឹកចិត្តរបស់យុវជនខ្មែរ កម្លាំងនាំមុខដើម្បីនាំមកនូវការផ្លាស់ប្តូរនៅប្រទេសកម្ពុជា ជយោ! យុវជនសង្គ្រោះជាតិ (សំឡេងស្រែកគាំទ្រ)»។
មេដឹកនាំគណបក្សសង្គ្រោះជាតិរូបនេះ ជាប់ពាក់ព័ន្ធនឹងរឿងក្តីក្តាំតុលាការជាច្រើនទល់ជាមួយនឹងក្រុមមន្ត្រីគណបក្សកាន់អំណាច ពាក់ព័ន្ធនឹងបទចោទព្រហ្មទណ្ឌដែលអាជ្ញាធរតាមចាប់ខ្លួន តែមេដឹកនាំក្រុមជំទាស់បានចាត់ទុកថាបទចោទទាំងនោះជារឿងបំបិទសំឡេងក្រុមជំទាស់។
លោក សម រង្ស៊ី នឹងបន្តដំណើររបស់លោក ទៅកាន់ប្រទេសអូស្ត្រាលី និងប្រទេសនូវែលសេឡង់ទៀតចាប់ពីថ្ងៃទី១៧ដល់ថ្ងៃទី២៦ខែសីហា ដើម្បីជួបជាមួយពលរដ្ឋខ្មែរនៅទីនោះពិភាក្សាបញ្ហាស្ថានការណ៍នយោបាយកម្ពុជាចុងក្រោយ៕
