ថ្នាក់ដឹកនាំនៃអតីតបក្សប្រឆាំងនៅប្រទេសកម្ពុជា បានប្តេជ្ញាថា នឹងវិលចូលប្រទេសកម្ពុជាវិញនៅខែកញ្ញាខាងមុខនេះ បើទោះបីជាមានការព្រមានជាបន្តបន្ទាប់ពីថ្នាក់ដឹកនាំប្រទេសកម្ពុជា និងក្រសួងការបរទេស ដល់សមាជិកសភាសហភាពអឺរ៉ុបដែលចង់អមដំណើរពីការខុសច្បាប់ការទូតនិងរំលោភអធិបតេយ្យកម្ពុជាក៏ដោយ។
លោកស្រី មូរ សុខហួរ អនុប្រធានគណបក្សសង្គ្រោះជាតិ និងជាអ្នករៀបចំដំណើរនិវត្តន៍របស់លោកសម រង្ស៊ី ប្រធានស្តីទីគណបក្ស បានបញ្ជាក់ប្រាប់ VOA នៅថ្ងៃអាទិត្យទី ០៧ ខែកក្កដា ឆ្នាំ២០១៩ ថា ពិភពលោកព្រួយបារម្ភពីលទ្ធិប្រជាធិបតេយ្យនៅកម្ពុជា និងវត្តមានចិននៅកម្ពុជា ដែលនឹងប៉ះពាល់សន្តិសុខនៅក្នុងតំបន់។ លោកស្រីបន្ថែមថា នៅពេលណាដែលអ្នកប្រជាធិបតេយ្យរងគ្រោះ គឺអ្នកប្រជាធិបតេយ្យដទៃទៀតសាមគ្គីគ្នាជាក្រុមគ្រួសារតែមួយ។ លោកស្រីបន្ថែមថា អ្នកទាំងនោះមិនព្រួយបារម្ភនឹងការគំរាមកំហែងទេ ប៉ុន្តែពួកគេរឹតតែត្រូវចូលរួមជួយថែមទៀត។
លោកស្រីមូរ សុខហួរបានបញ្ជាក់ប្រាប់វីអូអេថា៖
«នៅក្នុងការគំរាមកំហែងពីលោក ហ៊ុន សែន គឺជាការសោកស្តាយចំពោះប្រទេសកម្ពុជាទាំងមូលពីព្រោះវាធ្វើឱ្យបាត់បង់នូវរូបភាពនៃប្រទេសជាតិយើង នូវតម្លៃនៃប្រទេសជាតិយើងដោយសារតែអ្នកដឹកនាំគិតតែពីអំណាចរបស់ខ្លួន។ ប៉ុន្តែចំពោះយើងអ្នកប្រជាធិបតេយ្យនិងមិត្តយើងជាអ្នកប្រជាធិបតេយ្យដូចគ្នាគេមិនបារម្ភពីការគំរាមកំហែងទេ។ ផ្ទុយទៅវិញគេរឹតតែបង្ហាញឱ្យឃើញថាការគំរាមកំហែងពីរដ្ឋាភិបាលមិនស្របច្បាប់នៃប្រទេសកម្ពុជាគឺជាការដាក់ឃុំឃាំងលទ្ធិប្រជាធិបតេយ្យដែលតម្រូវឱ្យពួកគេត្រូវតែចូលរួមនៅពេលដែលពួកយើងធ្វើមាតុភូមិនិវត្តន៍ខាងមុខនេះ»។
ក្រសួងការបរទេសកម្ពុជា ចេញសេចក្តីថ្លែងការណ៍កាលពីថ្ងៃសៅរ៍ថា ក្រសួងការបរទេសមានការភ្ញាក់ផ្អើលនិងរំឮកអ្នកទាំងនោះឲ្យដឹងពីច្បាប់ការទូត ច្បាប់អន្តោប្រវេសន៍ ដែលតម្រូវឲ្យជនបរទេសគិតគូពីសន្តិសុខជាតិ ផលវិបាកនានា ដែលកើតចេញពីការបន្លំនិងមធ្យោបាយខុសច្បាប់កម្ពុជា។ ក្រសួងការបរទេស ក៏សម្តែងនូវការខកចិត្តយ៉ាងខ្លាំង និងចាត់ទុកទង្វើអស់ទាំងនេះ ជាទង្វើគ្មានលក្ខណៈការទូតនិងមិនគោរពអធិប្បតេយ្យភាព និងនីតិរដ្ឋនៃព្រះរាជាណាចក្រកម្ពុជា។
លោក សម រង្ស៉ី បានប្រកាសឥតឈប់ឈរពីការវិលត្រឡប់ទៅកាន់ប្រទេសកម្ពុជាវិញដើម្បីស្តារប្រជាធិបតេយ្យ និងសិទ្ធិមនុស្សឡើងវិញ និងទាមទារឲ្យមានការដោះលែងលោក កឹម សុខា ប្រធានគណបក្សសង្គ្រោះជាតិ ដែលត្រូវរំលាយ។
រហូតមកដល់ពេលនេះមានអ្នកតំណាងរាស្រ្តនិងមន្ត្រីគណបក្សចំនួន១០នាក់ដែលបានសន្យាធ្វើដំណើរជាមួយនឹងលោក សម រង្ស៊ី ដោយផ្ទាល់។ អ្នកទាំងនោះមកពីប្រទេសអង់គ្លេស ម៉ារ៉ុក អាហ្វ្រិកខាងត្បូង ហុល្លង់ កាណាដា ហ្វាំងឡង់ និងប្រេស៊ីល៕
