នៅទូទាំងស.រ.អា. នៅថ្ងៃសៅរ៍នេះ ពលរដ្ឋអាមេរិកាំងប្រារព្ធខួបឆ្នាំទី២៣៩នៃឯករាជ្យរបស់ប្រទេសពួកគេពីប្រទេសអង់គ្លេសដោយមានការដង្ហែក្បួន ការធ្វើការជួបជុំគ្នាដើម្បីញ៉ាំអាហារ ការអុជកាំជ្រួច និងការប្រគុំតន្រ្តី។
លោកប្រធានាធិបតី បារ៉ាក់ អូបាម៉ា បានប្រសិទ្ធិពរជូនពលរដ្ឋអាមេរិកាំងទាំងអស់ នៅថ្ងៃទី៤ ខែកក្កដានៅក្នុងសុន្ទរកថាប្រចាំសប្តាហ៍របស់លោក។ ថ្ងៃនេះក៏ជាថ្ងៃខួបកំណើតទី១៧របស់នាង Malia ដែលជាកូនស្រីច្បងរបស់លោកប្រធានាធិបតីដែរ។
លោកអូបាម៉ាធ្វើជាម្ចាស់ផ្ទះចាត់ចែង «ការអាំងសាច់មួយនៅក្នុងធ្លាខាងក្រោយ» សេតវិមាននៅថ្ងៃសៅរ៍នេះសម្រាប់ពួកយោធារាប់រយនាក់ និងគ្រួសាររបស់ពួកគេ។
នៅពេលជាមួយគ្នានេះ ពីធីចូលសញ្ជាតិមួយសម្រាប់ពលរដ្ឋអាមេរិកាំងថ្មី១០០នាក់ដោយមានសុន្ទរកថាសំខាន់មួយរបស់លោក John Brennan នាយកទីភ្នាក់ងារស៊ើបការសម្ងាត់ CIA នឹងប្រព្រឹត្តទៅនៅឯ Mount Vernon ដែលជាលំនៅដ្ឋានមានផ្ទៃដីធំរបស់លោក George Washington ប្រធានាធិបតីទីមួយរបស់ស.រ.អា។ សិល្បករដែលដើរតួជាលោក Washington និងលោកស្រី Martha ជាភរិយាលោកក៏នឹងមានវត្តមាននៅក្នុងទីនោះដែរ។
នឹងមានការប្រគុំតន្ត្រី និងការអុជកាំជ្រួចនៅក្នុងទីលាន National Mall ក្នុងរដ្ឋធានីវ៉ាស៊ីនតោននៅយប់ថ្ងៃសៅរ៍នេះ។
កាលពីថ្ងៃទី៤ ខែកក្កដា ឆ្នាំ១៧៧៦ អ្នកតំណាងដែនដីអាណានិគមអាមេរិកាំងទាំង១៣បានអនុម័តជាផ្លូវការសេចក្តីប្រកាសឯករាជ្យដោយប្រកាសការផ្តាច់ចំណងទាក់ទងជាមួយប្រទេសអង់គ្លេស៕
