ពួកអ្នកវិភាគនិយាយថា ទំនាក់ទំនងរបស់អូស្ត្រាលីជាមួយចិនមិនទំនងមានភាពប្រសើរឡើងនៅក្រោមរដ្ឋាភិបាលឆ្វេងនិយមថ្មីនៅក្រុងកង់បេរ៉ាទេ ថ្វីបើពួកគេនិយាយថា ការសម្រេចចិត្តដោយប្រទេសនានានៅក្នុងមហាសមុទ្រប៉ាស៊ីហ្វិកដើម្បីទប់ទល់សន្ធិសញ្ញាសន្តិសុខជាមួយរដ្ឋាភិបាលក្រុងប៉េកាំងបានផ្តល់សញ្ញានៃការផ្លាស់ប្តូរយុទ្ធសាស្ត្រនៃថាមពលនៅក្នុងតំបន់សម្រាប់រដ្ឋាភិបាលក្រុងកង់បេរ៉ានិងក្រុមចតុភាគីឬQuadដែលជាក្រុមក្រៅផ្លូវការមួយដែលមានសហរដ្ឋអាមេរិក ជប៉ុន ឥណ្ឌានិងប្រទេសអូស្ត្រាលីក៏ដោយ។
ពួកអ្នកគាំទ្រខ្លះក្នុងប្រទេសអូស្ត្រាលីដែលចង់ឱ្យមានទំនាក់ទំនងប្រសើរឡើងជាមួយចិនកាលពីដំបូងបានទទួលការលើកទឹកចិត្តអំពីជ័យជម្នះរបស់គណបក្សការងារអូស្ត្រាលីនៅថ្ងៃទី២១ ខែឧសភាដែលបានធ្វើឱ្យលោក Anthony Albaneseក្លាយជានាយករដ្ឋមន្ត្រី។ ក៏ប៉ុន្តែ លោក Bart Edes ជាសាស្ត្រាចារ្យខាងការអនុវត្តនៅឯសាកលវិទ្យាល័យ McGill ក្នុងទីក្រុង Montreal នៃប្រទេសកាណាដាបាននិយាយថា «ការមានទំនាក់ទំនងការទូតកាន់តែខ្លាំងឡើង»ជាមួយចិនទំនងកើតមានឡើង ហើយ«ការឆ្លើយឆ្លងពាក្យសម្តីនិងការបង្កហេតុទំនងជាមានតិចជាង ហើយគោលនយោបាយនោះមិនប្រាកដមានការផ្លាស់ប្តូរទេ»។
អូស្ត្រាលីជាអ្នករិះគន់យ៉ាងខ្លាំងដល់ចំណាត់ការរបស់ចិនចំពោះកោះតៃវ៉ាន់ ទីក្រុងហុងកុង ជនជាតិភាគតិចអ៊ុយហ្គ័រ ជម្លោះក្នុងសមុទ្រចិនខាងត្បូងហើយនឹងការចោទប្រកាន់ថា រដ្ឋាភិបាលក្រុងប៉េកាំងបានជ្រៀតជ្រែកក្នុងដំណើរការបោះឆ្នោតរបស់អូស្ត្រាលីដែលបណ្តាលឱ្យមានការអនុម័តច្បាប់នៃការជ្រៀតជ្រែកបរទេសនៅឆ្នាំ២០១៨។
ទំនាក់ទំនងនោះបានធ្លាក់ដល់កម្រិតទាបថ្មីមួយកាលពីខែមេសា ឆ្នាំ២០២១ នៅពេលដែលលោកនាយករដ្ឋមន្ត្រី Scott Morrison បានស្នើឱ្យមានការស៊ើបអង្កេតឯករាជ្យមួយអំពីការផ្ទុះឡើងនូវជំងឺកូវីដ១៩ ដែលបានបណ្តាលឱ្យចិនដាក់ទណ្ឌកម្មការនាំចូលទំនិញរបស់អូស្ត្រាលី។
លោក Hunter Marsten ជាអ្នកស្រាវជ្រាវនៅសាកលវិទ្យាល័យជាតិ National University អូស្ត្រាលីបានប្រាប់វីអូអេថា «ខ្ញុំមិនគិតថា ការបោះឆ្នោតនោះ នឹងប្រែក្រឡាស់ទិសដៅទាំងអស់នៅក្នុងទំនាក់ទំនងរវាងអូស្ត្រាលីនិងចិននោះទេ។ ខ្ញុំមិនគិតថា ទំនាក់ទំនងទាំងនោះមានភាពប្រសើឡើងរួចហើយនោះទេ។ វាជាការពិបាកដើម្បីនិយាយថា តើទំនាក់ទំនងនោះនឹងមានភាពប្រសើឡើងនោះឬទេ»។
ភ្លាមៗបន្ទាប់ពីជ័យជម្នះរបស់លោក លោក Albanese និងលោកស្រីរដ្ឋមន្ត្រីការបរទេស Penny Wong បានឡើងជិះយន្តហោះទៅកាន់ទីក្រុងតូក្យូប្រទេសជប៉ុន ហើយបានបញ្ជាក់ឡើងវិញពីការតាំងចិត្តរបស់អូស្ត្រាលីដល់ក្រុមចតុភាគីឬQuad ជាមួយមេដឹកនាំរបស់ឥណ្ឌា ជប៉ុននិងសហរដ្ឋអាមេរិក។
បន្ទាប់មក លោកស្រី Wong បានជិះយន្តហោះទៅកាន់ប្រទេសហ្វ៊ីជីជាទីកន្លែងដែលរដ្ឋមន្ត្រីការបរទេសចិនលោក Wang Yi បានសង្ឃឹមថា នឹងចុះហត្ថលេខាលើកិច្ចព្រមព្រៀងពាណិជ្ជកម្មនិងសន្តិសុខជាមួយប្រទេសចំនួន១០ដែលជាកោះនៅក្នុងមហាសមុទ្រប៉ាស៊ីហ្វិកដែលមេដឹកនាំប្រទេសទាំងនោះ បានត្អូញត្អែរជាយូរយាណាស់មកហើយពីការព្រងើយកន្តើយរបស់សម្ព័ន្ធមិត្តដ៏យូរអង្វែងដែលមានសហរដ្ឋអាមេរិក អូស្ត្រាលីនិងនូវែលសេឡង់។
បញ្ហាដ៏សំខាន់មួយនៅតែមិនទាន់មានការជឿនលឿនស្តីពីការប្រែប្រួលអាកាសធាតុ។ នាយករដ្ឋមន្ត្រីហ្វ៊ីជីលោក Frank Bainimarama បានបញ្ជូនសារតាម Twitterថា៖ «ការ ព្រួយកង្វល់ដ៏ធំបំផុតរបស់យើង មិនមែនភូមិសាស្ត្រនយោបាយទេ-វាគឺជាការប្រែប្រួលអាកាសធាតុ»។ លោកបានបន្ថែមទៀតថា លោកមានជំនួបដ៏អស្ចារ្យជាមួយរដ្ឋមន្ត្រីការបរទេសអូស្ត្រាលីលោកស្រី Wong។
លោកMarstenបាននិយាយថា អូស្ត្រាលីមានការធូរស្រាលក្នុងចិត្តដែលកិច្ចព្រមព្រៀងសន្តិសុខដែលត្រូវបានគេមើលឃើញថា រដ្ឋាភិបាលក្រុងប៉េកាំងស្វះស្វែងដើម្បីត្រួតត្រាតំបន់មហាសមុទ្រប៉ាស៊ីហ្វិកនោះបាននៅជាប់គាំង បន្ទាប់ពីពួកមេដឹកនាំកោះនោះខកខានមិនបានឈោងដល់ការមូលមតិគ្នាដោយនិយាយថា កិច្ចព្រមព្រៀងនោះខ្វះតម្លាភាពហើយថា កិច្ចព្រមព្រៀងនោះធ្វើឱ្យមានការតានតឹងខាងនយោបាយខ្លាំង។
លោកMarsten បាននិយាយទៀតថា៖ «មានក្តីរំពឹងខ្លះថា កិច្ចព្រមព្រៀងនោះ នឹងមិនមានរូបរាងឡើងទេ។ គំនិតដែលថា លោក អ្នកអាចដាក់បញ្ចូលកោះនៅមហាមហាសមុទ្រប៉ាស៊ីហ្វិកចូលក្នុងសហគមន៍ជាមួយគ្នាដ៏ធំមួយនោះដើម្បីធ្វើការជាមួយដៃគូមួយ ជាអង្គភាពមួយដើម្បីបង្កើតកិច្ចព្រមព្រៀងមួយមានភាពមិនប្រាកដប្រជា»។
អូស្ត្រាលីក៏បានបញ្ជាក់ពីចំណងទាក់ទងជាប្រពៃណី ជាពិសេសជាមួយសហរដ្ឋអាមេរិកដែលមានតាំងពីសង្គ្រាមលោកលើកទី២ នៅពេលដែលប្រជុំកោះនៅមហាសមុទ្រប៉ាស៊ីហ្វិកបានទទួលរងការវាយប្រហារដ៏ធ្ងន់ធ្ងរបំផុតក្នុងសង្គ្រាម។
លោក Marsten បាននិយាយនៅមុនដំណើរទស្សនកិច្ចបន្ថែមរបស់លោកស្រី Wong ទៅដែនកោះ Samoa និងTonga ថា៖ «ដំណើរទស្សនកិច្ចរបស់លោកស្រីរដ្ឋមន្ត្រីការបរទេស Penny Wong បង្ហាញថា រដ្ឋាភិបាលថ្មីរបស់អូស្ត្រាលីចង់ពិនិត្យមើលឱ្យបានដិតដល់ដើម្បីក្លាយជាដៃគូដ៏មានតម្លៃដែលអាចត្រូវបានគេបកស្រាយថាជាប្រភេទនៃការប្រកួតប្រជែងដ៏ឆ្លៀសវៃមួយជាមួយរដ្ឋាភិបាលក្រុងប៉េកាំង»។
លោកបានបញ្ជាក់ទៀតថា ការចូលរួមរបស់លោក Albaneseនៅក្នុងជំនួបរបស់ក្រុមចតុភាគីឬQuad បានចង្អុលបង្ហាញ«ពីការបន្តនៃកិច្ចព្រមព្រៀងដ៏ធំ» នៅក្នុងការគាំទ្រប្រធានាធិបតីសហរដ្ឋអាមេរិកលោកJoe Bidenនិងគោលនយោបាយអភិរក្សនិយមរបស់លោកMorrison រួមទាំងកិច្ចព្រមព្រៀងAUKUSដែលអាចឱ្យអូស្ត្រាលីទទួលបាននាវាមុជទឹកប្រើថាមពលនុយក្លេអ៊ែរដែលជាបន្លាក្នុងកែវភ្នែករបស់ចិន។
លោក Marstenបានថ្លែងទៀតថា៖ «ខ្ញុំគិតថា មានការបែកបាក់សំខាន់ៗខ្លះនៅត្រង់នេះ មួយផ្នែកដោយសារការបង្ខិតបង្ខំផ្នែកសេដ្ឋកិច្ចនិងច្បាប់ខ្លះតាំងពីចិនមានឥទ្ធិពលក្នុងនយោបាយអូស្ត្រាលីចាប់តាំងពីឆ្នាំ២០១៨មក។
លោក Gavin Greenwoodជាអ្នកវិភាគនៅអង្គការហានិភ័យA2 Global Riskដែលមានទី តាំងក្នុងទីក្រុងហុងកុងបាននិយាយថា ប្រទេសជាកោះនៅក្នុងមហាសមុទ្រប៉ាស៊ីហ្វិកមិនត្រូវបានយកចិត្តទុកដាក់ពីបណ្តាប្រទេសដែលមានតួនាទីធំៗ ជាពិសេសចំពោះការប្រែប្រួលអាកាសធាតុហើយនឹងការព្រួយកង្វល់របស់ពួកគេអំពីកម្រិតទឹកសមុទ្រកើនឡើង។
ក៏ប៉ុន្តែ ដោយមានការជាប់ទាក់ទិននឹងចិន មុនដំបូងដោយសន្ធិសញ្ញាសន្តិសុខជាមួយប្រទេស Solomon Islandsបានប្រកាសកាលពីខែមេសា ប្រទេសនេះអាចនាំឱ្យមានជម្លោះដោយប្រយោលដោយមានការទាក់ទិននឹងផលប្រយោជន៍របស់សហរដ្ឋអាមេរិក កោះតៃវ៉ាន់ ជប៉ុន បារាំងនិងចក្រភពអង់គ្លេសក៏ស្ថិតក្នុងភាពមិនប្រាកដប្រជាដែរ។
លោក Greenwoodនិយាយទៀតថា៖ «អូស្ត្រាលីជានិច្ចកាលជាប់គាំងនៅកណ្តាលជម្លោះ»។
លោកបានបន្ថែមទៀតថា ការប្រយុទ្ធដោយប្រយោលដើម្បីឥទ្ធិពលនឹងរីកកាន់តែធំឡើង ដោយសារគ្រឿងលើកទឹកចិត្តហិរញ្ញវត្ថុដូចជាការសិក្សាអប់រំនិងអាហាររូបករណ៍និងជំនួយគ្មានចំណង។
លោកបានបន្ថែមទៀតថា៖ «សមត្ថភាពរបស់សហរដ្ឋអាមេរិក អូស្ត្រាលីនិងកោះតៃវ៉ាន់ដើម្បីធ្វើឱ្យមានទំនាក់ទំនងឡើងវិញជាមួយបណ្តាប្រទេសនៅកោះប៉ាស៊ីហ្វិកធំសម្បើមណាស់ ហើយខ្ញុំប្រាកដថា ការណ៍នេះនឹងបន្តកើតមានឡើងហើយខ្ញុំជឿថា វានឹងត្រូវបានធ្វើឡើងដោយស្ងាត់ៗដែលមិនស្ថិតនៅក្រោមការតាមដានហើយនឹងបន្តធ្វើដូច្នេះ»។
លោក Albaneseបានធ្វើយុទ្ធនាការដោយបានជំរុញការប្រែប្រួលអាកាសធាតុឡើងទៅដល់របៀបវារៈកំពូលនយោបាយខណៈដែល«ធ្វើការទាក់ទងឡើងវិញជាមួយបណ្តាប្រទេសជាកោះនៅមហាសមុទ្រប៉ាស៊ីហ្វិកនិងប្រឆាំងកិច្ចព្រមព្រៀងសន្តិសុខមុនដំបូងដែលបានប្រ កាសកាលពីខែមេសារវាងរដ្ឋាភិបាលក្រុងប៉េកាំងនិងប្រទេស Solomon Islands ដែលបានធ្វើឱ្យរដ្ឋាភិបាលលោក Morrison អាម៉ាស់។
ក៏ប៉ុន្តែ នៅទីបំផុត អ្វីៗទាំងអស់សុទ្ធតែទាក់ទិននឹងរដ្ឋាភិបាលក្រុងប៉េកាំង ហើយលោក Edesបាននិយាយទៀតថា មានការកំណត់ថា តើទំនាក់ទំនងរវាងអូស្ត្រាលីនិងចិនអាចមានភាពប្រសើឡើងត្រឹមកម្រិតណាចំពោះការខ្វែងគំនិតគ្នាដ៏សំខាន់នោះ មិនថាតើអូស្ត្រាលីត្រូវបានដឹកនាំដោយគណបក្សសេរីអភិរក្សនិយមឬ គណបក្សពលកម្មអូស្ត្រាលី(ALP) នោះទេ៕
ប្រែសម្រួលដោយ លោកជឹង ប៉ូជីន
