នាយករដ្ឋមន្ត្រីអូស្ត្រាលីលោក Anthony Albanese បានអញ្ជើញទៅដល់រដ្ឋធានីហ្សាការតា ប្រទេសឥណ្ឌូនេស៊ីកាលពីថ្ងៃអាទិត្យម្សិលមិញដើម្បីបំពេញទស្សនកិច្ចនៅក្នុងប្រទេសនេះ បន្ទាប់ពីបានសន្យាបង្កើនកិច្ចសហប្រតិបត្តិការរវាងប្រទេសទាំង២។ នេះបើតាមសេចក្តីរាយ ការណ៍របស់ទីភ្នាក់ងារព័ត៌មាន AFP។
ទស្សនកិច្ចនេះជាដំណើរទស្សនកិច្ចទ្វេភាគីលើកទី១របស់លោកចាប់តាំងពីត្រូវបានស្បថចូលកាន់តំណែងជានាយករដ្ឋមន្ត្រីអូស្ត្រាលីលើកទី៣១កាលពីថ្ងៃទី២៣ ខែឧសភាកន្លងមក។
លោក Albanese ត្រូវបានអមដំណើរដោយសមាជិកគណៈរដ្ឋមន្ត្រីជាច្រើនរូប រួមទាំងលោកស្រីរដ្ឋមន្ត្រីការបរទេស Penny Wong ដែលត្រូវមានគម្រោងជួបលោកប្រធានាធិបតី Joko Widodo នៅថ្ងៃចន្ទនេះ។
លោក Albanese បានបញ្ជាក់នៅក្នុងការចេញផ្សាយសារព័ត៌មានមុនដំណើរទស្សនកិច្ចថា «ឥណ្ឌូណេស៊ីជាប្រទេសជិតខាងដ៏ជិតស្និទ្ធបំផុតមួយរបស់យើង ដែលហេតុដូច្នេះហើយបានជាខ្ញុំតាំងចិត្តបំពេញទស្សនកិច្ចឱ្យបានឆាប់រហ័សទៅតាមលទ្ធភាពដែលអាចធ្វើបាន»។
លោកបានថ្លែងបន្តទៀតថា«ខ្ញុំសង្ឃឹមនឹងស្ថាបនាចំណងទាក់ទងបន្ថែមទៀត រួមទាំងការ ស្តារឡើងវិញនូវទំនាក់ទំនងពាណិជ្ជកម្មរបស់យើង និងធ្វើឱ្យប្រសើរឡើងនូវកិច្ចសហប្រតិបត្តិការអាកាសធាតុ ហេដ្ឋារចនាសម្ព័ន្ធនិងថាមពលផងដែរ»។
លោកស្រីរដ្ឋមន្ត្រីការបរទេស Wong កាលពីពេលមុនបានស្នើឱ្យរដ្ឋាភិបាលថ្មីរបស់អូស្ត្រាលីផ្តល់អាទិភាពកាន់តែធំឡើងដល់តំបន់អាស៊ីអាគ្នេយ៍ ហើយជាពិសេសប្រទេសឥណ្ឌូណេស៊ី។
លោក Scott Morrison ជានាយករដ្ឋមន្ត្រីអូស្ត្រាលីចុងក្រោយដែលបានបំពេញទស្សនកិច្ចនៅក្នុងប្រទេសឥណ្ឌូណេស៊ីកាលពីឆ្នាំ២០១៩។
ក្នុងសន្និសីទកាសែតកាលពីថ្ងៃព្រហស្បតិ៍សប្តាហ៍មុន ប្រធាននាយកដ្ឋានតំបន់អាស៊ីខាងកើតនិងមហាសមុទ្រប៉ាស៊ីហ្វិករបស់ក្រសួងការបរទេសឥណ្ឌូណេស៊ីបានបញ្ជាក់ថា វាបានក្លាយជាប្រពៃណីមួយសម្រាប់នាយករដ្ឋមន្ត្រីជាប់ឆ្នោតថ្មីរបស់អូស្ត្រាលីជ្រើសរើសប្រទេសឥណ្ឌូណេស៊ី ដែលមានសេដ្ឋកិច្ចធំជាងគេបង្អស់នៅក្នុងតំបន់អាស៊ីអាគ្នេយ៍ជាប្រទេសទី១ សម្រាប់ដំណើរបំពេញទស្សនកិច្ចនោះ។
ក្នុងឆ្នាំ២០១៨និង២០១៩ ពាណិជ្ជកម្មសរុបរវាងអូស្ត្រាលីនិងឥណ្ឌូណេស៊ីមានតម្លៃ១២ពាន់ ៣រយលានដុល្លារ៕
