ដោយការស្មោះត្រង់នឹងសាសនាឥស្លាមចាប់តាំងពីនៅក្មេង Al-Baghdadi បានក្លាយជាជនជ្រុលនិយមដោយការលុកលុយរបស់សហរដ្ឋអាមេរិកនៅក្នុងប្រទេសអ៊ីរ៉ាក់នៅឆ្នាំ២០០៣ ដើម្បីផ្តួលរំលំរបបសាដាម ហ៊ុយសេន។
សម្រាប់ Abu Bark Al-Baghdadi ពេលវេលាដ៏ល្អបំផុតនៃជីវិតរបស់លោកអាចកើតមាននៅឆ្នាំ២០១៤ នៅពេលដែលលោកឈរពាក់អាវវែងពណ៌ខ្មៅនៅខាងមុខពួកអ្នកសូត្រធម៌ក្នុងវិហារឥស្លាមមួយកន្លែងនៅទីក្រុងម៉ូស៊ុល ជាទីក្រុងមួយរបស់ក្រុមរដ្ឋឥស្លាមនៅភាគខាងជើងនៃប្រទេសអ៊ីរ៉ាក់ ដែលត្រូវបានកាន់កាប់ និងត្រូវបានប្រកាសថា លោកជាមេដឹកនាំកាលីហ្វាត នយោបាយ និងសាសនារបស់សហគមន៍សាសនាឥស្លាមទូទាំងសាកលលោក។
លោក Baghdadi បានប្រកាសថា៖ «ខ្ញុំត្រូវបានគេជ្រើសតាំងដើម្បីដឹកនាំលោកអ្នក ក៏ប៉ុន្តែខ្ញុំមិនមែនជាមនុស្សដ៏ល្អបំផុតក្នុងចំណោមអ្នកទាំងអស់គ្នាទេ។ បើអស់លោក អ្នកឃើញខ្ញុំធ្វើល្អ អស់លោកអ្នកត្រូវតែធ្វើតាមខ្ញុំ។ បើអស់លោកអ្នកឃើញខ្ញុំធ្វើមិនល្អ ផ្តល់ឱវាទនិងណែនាំខ្ញុំ។ ប្រសិនបើខ្ញុំមិនគោរពព្រះលោកអ្នកមិនត្រូវគោរពខ្ញុំទេ»។
មេដឹកនាំសាសនាឥស្លាមផ្សេងទៀតបានច្រានចោលការអះអាងរបស់លោក ក៏ប៉ុន្តែ ទឹកដីកាលីហ្វាតរបស់លោក នៅទីបញ្ចប់បានគ្របដណ្តប់ចំនួន ៤០ភាគរយនៃប្រទេសអ៊ីរ៉ាក់និងផ្នែកយ៉ាងធំនៃភាគខាងជើងប្រទេសស៊ីរី។ ការណ៍នេះបានទាក់ទាញពួកអ្នកប្រយុទ្ធបរទេសរាប់ពាន់នាក់ឲ្យចូលរួមបុព្វហេតុរបស់ក្រុមរដ្ឋឥស្លាមប្រឆាំងនឹងប្រទេសលោកខាងលិចនិងសម្ព័ន្ធមិត្តនៅតំបន់មជ្ឈិមបូព៌ានៅក្នុងតំបន់។
ក្នុងរដ្ឋធានីរ៉ាក់កាដែលប្រកាសដោយក្រុមរដ្ឋអ៊ីស្លាមនៅក្នុងប្រទេសស៊ីរី ក្រុមរដ្ឋឥស្លាមបានត្រួតត្រាកាលីហ្វាតរបស់ខ្លួនដូចជារដ្ឋ ដោយប្រើប្រព័ន្ធតុលាការឥស្លាមដ៏ព្រៃផ្សៃនិងឃោរឃៅ ខណៈដែលក្រុមរដ្ឋឥស្លាមបានប្រមូលពន្ធ និងផ្តល់សេវាកម្មសាធារណៈបន្តិចបន្តួច។
ក៏ប៉ុន្តែ Baghdadi ដែលមានតម្លៃ២៥លានដុល្លារចំពោះក្បាលរបស់លោកចាប់តាំងពីឆ្នាំ២០១៦មក មិនបានត្រូវគេឃើញជាសាធារណៈទេ លើកលែងតែវីដេអូ ដែលមានរយៈពេល១៨នាទីបានត្រូវចេញផ្សាយកាលពីចុងខែមេសា។
មានសេចក្តីរាយការណ៍ជាច្រើនក្នុងរយៈពេលជាច្រើនឆ្នាំកន្លងមកនេះថា លោកបានត្រូវគេសម្លាប់ឬរងរបួសធ្ងន់នៅក្នុងការវាយប្រហាររបស់សហរដ្ឋអាមេរិកនិងសម្ព័ន្ធមិត្តទូទាំងប្រទេសអ៊ីរ៉ាក់និងតំបន់ភាគខាងជើងប្រទេសស៊ីរីនៅពេលដែលរដ្ឋកាលីហ្វាត បានដួលរលំជាបណ្តើរៗ។ កាលពីខែមិថុនា ឆ្នាំ២០១៧ រដ្ឋាភិបាលអ៊ីរ៉ាក់បានប្រកាសថា ខ្លួនបានដណ្តើមទីក្រុងម៉ូស៊ុលពីក្រុមរដ្ឋអ៊ីស្លាមមកវិញហើយ៦ខែក្រោយមក បានប្រកាសជ័យជម្នះទាំងស្រុងនៅក្នុងប្រទេសអ៊ីរ៉ាក់។ កាលពីចុងខែមីនា កងកម្លាំងប្រជាធិបតេយ្យស៊ីរី ដែលគាំទ្រដោយសហរដ្ឋអាមេរិកបានប្រកាសពីការរំដោះទីក្រុង Baghuz ដែលជាទឹកដីដែលកាន់កាប់ដោយក្រុមរដ្ឋឥស្លាមចុងក្រោយនៅក្នុងប្រទេសស៊ីរី។
Baghdadi បានលេចមុខឡើងវិញនៅខ្សែអាត់ថតសំឡេង ជារឿយៗក្នុងព្រឹត្តិការណ៍ថ្មីៗនេះដើម្បីបង្ហាញថា លោកនៅរស់រានមានជីវិត។ បើពុំដូច្នោះទេ លោកបានលាក់ខ្លួន ប្រើបច្ចេកវិទ្យាដើម្បីបញ្ចៀសការឈ្លបមើលអំពីទីកន្លែងរបស់លោក។ លោកមិនប្រើទូរសព្ទដៃទេ ហើយជារឿយៗប្តូរផ្ទះដែលមានសុវត្ថិភាពពីមួយទៅមួយទៀតហើយចៀសវាងធ្វើដំណើរតាមក្បួនរថយន្តដែលអាចធ្វើឲ្យមានការចាប់អារម្មណ៍ពីកងកម្លាំងសម្ព័ន្ធមិត្តនៅក្នុងតំបន់។
ក៏ប៉ុន្តែសហរដ្ឋអាមេរិកបានបន្តតាមប្រមាញ់លោកដល់កម្រិតខ្ពស់បំផុតនៅក្នុងការវាយឆ្មក់របស់កងទ័ពពិសេសសហរដ្ឋអាមេរិកកាលពីថ្ងៃសៅរ៍សប្តាហ៍មុននៅក្នុងប្រទេសស៊ីរីដែល Baghdadi បានចុចបំផ្ទុះអាវកាក់ដាក់គ្រាប់បែកអត្តឃាតរបស់លោក និងកូន៣នាក់ទៀតនៅពេលដែលកងកុម៉្មង់ដូអាមេរិកាំងបានដេញតាមលោកនៅក្នុងរូងក្រោមដីមួយដែលមិនមានផ្លូវចេញ។
ប្រធានាធិបតីអាមេរិកលោក ដូណាល់ ត្រាំ បានប្រកាសពីការវាយឆ្មក់និងការស្លាប់របស់ Baghdadi នៅក្នុងសន្ទរកថានិងសន្និសីទកាសែតដ៏កម្ររបស់សេតវិមានកាលពីព្រឹកថ្ងៃអាទិត្យសប្តាហ៍មុនដែលបានប្រាប់ពិភពលោកថា Baghdadi បានស្លាប់ហើយបានថ្ងូរនិងស្រែកយំនៅតាមផ្លូវ។ ក្នុងរយៈពេល១៥នាទីនៃការពិសោធន៍ សហរដ្ឋអាមេរិកនិយាយថា ការធ្វើតេស្ តDNAបានបញ្ជាក់ថា Baghdadi ពិតជាស្លាប់មែន។
Baghdadi មានឈ្មោះកំណើតថា Ibrahim Awwad Ibrahim Al-Badri កើតនៅឆ្នាំ១៩៧១នៅទីក្រុងSamarraនៃប្រទេសអ៊ីរ៉ាក់។លោក ជាកូនរបស់គ្រូបង្រៀនគម្ពីកូរ៉ាន់ម្នាក់។
ប្រវត្តិរូបរបស់លោកនៅឆ្នាំ២០១៥ដែលចងក្រងដោយវិទ្យាស្ថាន Brookingដែលជាអង្គការស្រាវជ្រាវមួយនៅរដ្ឋធានីវ៉ាស៊ីនតោន បានពណ៌នាលោកថាជាយុវជនម្នាក់ដែលមិនសូវមាត់ករហើយនៅពេលដែលលោកនិយាយ គេពិបាកស្តាប់ណាស់។
ក៏ប៉ុន្តែ ក្រោយមក សេចក្តីរាយការណ៍របស់វិទ្យាស្ថាន Brookings បានប្រាប់ឲ្យដឹងថា «ឈ្មោះហៅក្រៅរបស់ Ibrahim គឺថា «អ្នកជឿ»។ នៅពេលលោក មិនទៅសាលារៀន លោក បានចំណាយពេលជាច្រើននៃពេលវេលានៅវិហារអ៊ីស្លាមក្នុងមូលដ្ឋានដើម្បីសិក្សាសាសនា ហើយនៅពេលដែលលោកមកផ្ទះនៅពេលចប់ពីរៀន នេះតាមលោក Shamsiដែលជាបងប្អូនប្រុសម្នាក់របស់លោក។ លោកបានក្រើនរំលឹកមនុស្សផ្សេងទៀតដែលងាកចេញពីច្បាប់អ៊ីស្លាមដ៏តឹងរ៉ឹងនោះ»។
លោកក៏ចូលចិត្តបាល់ទាត់ដែរ។ គេហៅលោកថា Messi ដែលជាឈ្មោះរបស់លោក Lionel Messi ដែលជាជើងឯកកីឡាបាល់ទាត់អាហ្សង់ទីន។
លោកបានសិក្សាគុម្ពីកូរ៉ាន់នៅសាកលវិទ្យាល័យសាដាមក្នុងទីក្រុងបាដាដហើយបានចូលរួមគណបក្ស Muslim Brotherhood ដែលជាចលនាអារ៉ាប់ដែលផ្អែកលើការបង្កើតរដ្ឋតាមច្បាប់អ៊ីស្លាមដែលរដ្ឋាភិបាលខ្លះបានហាមឃាត់។
សេចក្តីរាយការណ៍និងសៀវភៅខ្លះបានតាមដានភាពជ្រុលនិយមរបស់លោកតាំងពីការលុកលុយរបស់សហរដ្ឋអាមេរិកនៅក្នុងប្រទេសអ៊ីរ៉ាក់នៅឆ្នាំ២០០៣ ដើម្បីផ្តួលរំលំបុរសខ្លាំងលោកសាដាម ហ៊ូសេន។ Baghdadi បានចូលរួមក្រុមកងជីវពលនិកាយស៊ុននី ដើម្បីប្រយុទ្ធការកាន់កាប់របស់សហរដ្ឋអាមេរិក។
លោកបានត្រូវគេចាប់ដាក់គុកនៅ Camp Bucca នៅឆ្នាំ២០០៤ ហើយវត្តមានរបស់លោកបានត្រូវគេដឹងថាជាអ្នកសូត្រធម៌និងជាអ្នកលេងបាល់ទាត់។
វិទ្យាស្ថាន Brookings ប្រាប់ឲ្យដឹងថា «ពួកអ្នកទោសជាច្រើននៃអ្នកទោសទាំងអស់ចំនួន២ម៉ឺន៤ពាន់នាក់នៅ Bucca ជាពួកអារ៉ាប់និកាយស៊ុននី ដែលបានធ្វើជាទាហាននិងភ្នាក់ងារស៊ើបការណ៍សម្ងាត់របស់សាដាម ហ៊ូសេន។ នៅពេលដែលសាដាម បានដួលរលំ ពួកគេក៏បានដួលរលំដែរដែលជាផលវិបាកនៃការកំចាត់ពួកគណបក្សបាអាតដោយសហរដ្ឋអាមេរិកនិងការឡើងកាន់អំណាចថ្មីរបស់ពួកនិកាយស៊ីអ៊ីដដែលមានសំឡេងភាគច្រើនដែលត្រូវបានគេសង្កត់សង្កិនជាយូរយារណាស់មកហើយនៅក្នុងប្រទេសអ៊ីរ៉ាក់។ ប្រសិនបើពួកគេមិនមែនជាពួកជីហាដនៅពេលដែលពួកគេមកដល់ ក៏ពួកគេជាច្រើនក្លាយជាពួកជីហាដដែរ នៅពេលដែលពួកគេចាកចេញទៅវិញ»។
វិទ្យាស្ថាន Brookings បានប្រាប់ឲ្យដឹងទៀតថា « Baghdadi នឹងក្លាយជាការផ្ទុះដ៏ខ្លាំងបំផុតមួយចេញពីអគ្គីភ័យទាំងនោះ គាត់ក៏ជាបុរសម្នាក់ដែលទទួលខុសត្រូវចំពោះមហាអគ្គីភ័យភាគច្រើនដែលនឹងឆាបឆេះនៅក្នុងតំបន់មិនដល់មួយទសវត្សរ៍ផង»។
នៅពេលដែល Baghdadi បានត្រូវគេដោះលែងចេញពីគុក លោកមានមធ្យោបាយទាក់ទងឡើងវិញជាមួយពួកអ្នកទោសដែលជាសហការីរបស់លោក។ ពួកគេបានសរសេរលេខទូរសព្ទគ្នាទៅវិញទៅមកនៅក្នុងខោទ្រនាប់របស់ខ្លួន។
លោកបានបង្កើតចំណងទាក់ទងជាមួយក្រុមអាល់កៃដាក្នុងប្រទេសអ៊ីរ៉ាក់ ក៏ប៉ុន្តែ ពួកអ្នកទោសជាច្រើននៅ Bucca នឹងបន្តក្លាយជាឥស្សរជននាំមុខរបស់សាខាក្រុមរដ្ឋអ៊ីស្លាមនៅក្នុងប្រទេសអ៊ីរ៉ាក់ ហើយ Baghdadi បានក្លាយជាមេដឹកនាំរបស់ក្រុមនោះនៅឆ្នាំ២០១០ នៅពេលដែលពួកមេដឹកនាំរបស់ក្រុមនោះត្រូវបានសម្លាប់នៅក្នុងការវាយប្រហារតាមអាកាស។
មួយឆ្នាំក្រោយមក លោក Baghdadi បានពង្រីកក្រុមនោះនៅក្នុងប្រទេសស៊ីរីនៅពេលដែលក្រុមរដ្ឋឥស្លាមបានរឹបអូសយកទឹកដីកាន់តែច្រើនឡើងៗ រួមមានទីក្រុង Raqqa ហើយនៅទីបញ្ចប់ទីក្រុងមូស៊ុលនៅឆ្នាំ២០១៤ ដែលនៅទីនោះលោកបានធ្វើសន្ទរក ថាផ្សាយតាមទូរទស្សន៍នៅវិហារឥស្លាម Grand Mosque នៅក្នុងទីក្រុង។លោកបានថ្លែងទៅកាន់ពួកអ្នកគាំទ្រក្រុមរដ្ឋឥស្លាមនៅឆ្នាំ២០១៥ ឆ្នាំ២០១៦ និង ២០១៧ នៅក្នុងសារថតសំឡេង។
ការក្រើនរំលឹកតាមខ្សែអាត់ថតសំឡេងលើកចុងក្រោយរបស់លោកទៅកាន់ពួកអ្នក គាំទ្ររដ្ឋឥស្លាមបានធ្វើឡើងកាលពីខែមុន៕
ប្រែសម្រួលដោយជឹង ប៉ូជីន
