អង្គការសុខភាពពិភពលោកចាត់ទុកសន្និសីទនេះថាជាជោគជ័យដ៏អស្ចារ្យមួយ ដោយបានកត់សម្គាល់ឃើញថា មានមនុស្សចំនួន ៩ រយនាក់បានចូលរួម គឺមានចំនួនច្រើនជាងការរំពឹងទុកទ្វេដង។ ជាងនេះទៅទៀត អង្គការនេះបានបញ្ជាក់ថា មានប្រទេសដែលជាសមាជិកចំនួនជាង ៧០ ប្រទេស អង្គការក្រៅរដ្ឋាភិបាលនានា និងអ្នកចូលរួមដទៃទៀតបានប្ដេជ្ញាដោយស្ម័គ្រចិត្តដើម្បីចាត់វិធានការកាត់បន្ថយការបំពុលបរិយាកាស។
លោកស្រី Maria Neira នាយកផ្នែកសុខភាពសាធារណៈនិងបរិស្ថាននៃអង្គការសុខភាពពិភពលោក បាននិយាយថា អង្គការសុខភាពពិភពលោកកំពុងដើរតួនាទីនាំមុខគេនៅក្នុងការចាត់វិធានការដោះស្រាយការបំពុលបរិយាកាសដើម្បីឲ្យពិភពលោកមានបរិយាកាសល្អជាងមុន។
លោកស្រី Maria Neiraបានបញ្ជាក់ដូច្នេះថា៖ «ក្នុងនាមជាទីភ្នាក់ងារសុខភាពសាកលលោក អង្គការសុខភាពពិភពលោកបានប្ដេជ្ញាយ៉ាងខ្លាំងក្លា ដោយចាប់ផ្ដើមពីការស្នើនូវគោលដៅប្រាថ្នាទុកមួយនៃការកាត់បន្ថយអត្រាមរណភាពដែលបណ្ដាលមកពីការបំពុលបរិយាកាសឲ្យបានចំនួនពីរភាគបីនៅត្រឹមឆ្នាំ ២០៣០។ នេះគឺជាការប្រឈមដ៏ធំមួយដែលយើងនឹងអំពាវនាវអោយមនុស្សគ្រប់គ្នាចូលរួមចំណែកចំពោះបញ្ហានេះ»។
លោកស្រី Neira បាននិយាយថា ការចាត់វិធានការទាន់ពេលវេលាគឺជាការចាំបាច់ដើម្បីសម្រេចឲ្យបាននូវគោលបំណងនេះ។ ជាឧទាហរណ៍ លោកស្រីបានបញ្ជាក់ថា មនុស្សត្រូវតែឈប់ដុតកាកសំណល់រឹង និងកាកសំណល់កសិកម្ម ក៏ដូចជាមិនត្រូវប្រើប្រេងឥន្ធនៈផូស៊ីលនោះទេ។
អ្នកស្រីបន្ថែមថា ប្រជាជននៅទ្វីបអាហ្វ្រិក និងតំបន់ផ្សេងទៀតដែលមានប្រជាជនជួបការលំបាក គឺចាំបាច់ត្រូវទទួលបានការជួយជ្រោមជ្រែងដើម្បីសម្រេចឲ្យបាននូវគោលបំណងនេះ។
លោកស្រី Neira និយាយដូច្នេះថា៖ «យើងត្រូវធ្វើយ៉ាងណាឲ្យមនុស្ស ៣ ពាន់លាននាក់ដែលសព្វថ្ងៃនេះនៅតែពឹងផ្អែកលើប្រេងឥន្ធនៈផូស៊ីលដើម្បីចម្អិនអាហារ ឬបំភ្លឺផ្ទះសម្បែងរបស់ពួកគេ ឲ្យឈប់ប្រើប្រេងឥន្ធនៈប្រភេទនេះតទៅទៀត។ យើងត្រូវធ្វើឲ្យប្រាកដថា ពួកគេនឹងមានលទ្ធភាពអាចប្រើប្រាស់ថាមពលដែលមិនបំពុលបរិស្ថានបាន»។
អង្គការសុខភាពពិភពលោកគ្រោងនឹងដាក់ឲ្យដំណើរការនូវប្រព័ន្ធតាមដានមួយ ដើម្បីតាមដានមើលការប្ដេជ្ញារបស់បណ្ដាប្រទេសដែលចូលរួមក្នុងគោលបំណងនេះ។ ប្រព័ន្ធនេះមានគោលបំណងវាស់វែងពីដំណើរវិវឌ្ឍទៅមុខដែលកំពុងធ្វើឡើងដើម្បីសម្រេចឲ្យនូវសុខភាពប្រសើរជាងមុនសម្រាប់មនុស្សរាល់គ្នា ដោយការលុបបំបាត់ការបំពុលបរិយាកាសនៅលើពិភពលោក៕
ប្រែសម្រួលដោយ ហេង រស្មី
