បណ្ដាប្រទេសកំពុងអភិវឌ្ឍនានាបានរិះគន់សហរដ្ឋអាមេរិក និងសម្ព័ន្ធមិត្តរបស់អាមេរិកនៅឯកិច្ចប្រជុំស្ដីពីការប្រែប្រួលអាកាសធាតុនៅថ្ងៃអាទិត្យនេះ ដោយបានចោទប្រកាន់បណ្ដាប្រទេសអ្នកមានបំផុតនានានៅលើពិភពលោកថា បានរារាំងកិច្ចព្រមព្រៀងមួយដែលមានគោលបំណងទប់ស្កាត់ការកើនឡើងកម្ដៅផែនដី។
អ្នកជំនាញនានាមកពីជុំវិញពិភពលោកបានពិភាក្សាគ្នានៅក្នុងទីក្រុងបាងកក ប្រទេសថៃ នៅសប្ដាហ៍នេះ ដើម្បីសម្រេចឲ្យបាននូវក្បួនច្បាប់ដ៏ទូលំទូលាយមួយសម្រាប់បណ្ដាប្រទេសនានាអនុវត្តកិច្ចព្រមព្រៀងទីក្រុងប៉ារីសស្ដីពីការប្រែប្រួលអាកាសធាតុ។
ប៉ុន្តែការពិភាក្សានេះបានទទួលបរាជ័យ ដោយសារតែបញ្ហាសំខាន់មួយ ដែលនោះគឺបញ្ហាថាតើត្រូវឧបត្ថម្ភថវិកាសម្រាប់កិច្ចប្រឹងប្រែងទប់ស្កាត់ការប្រែប្រួលអាកាសធាតុតាមរបៀបណា និងថាតើថវិការួមចំណែកទាំងនោះនឹងត្រូវរាយការណ៍តាមរបៀបណា។
គណៈប្រតិភូតំណាងឲ្យបណ្ដាប្រទេសក្រីក្រ និងប្រទេសតូចៗនៅលើពិភពលោកនេះ បានបញ្ជាក់នៅថ្ងៃចុងក្រោយនៃកិច្ចប្រជុំនេះថា សហរដ្ឋអាមេរិក និងបណ្ដាបស្ចិមប្រទេសសេដ្ឋកិច្ចធំៗដទៃទៀត មិនបានគោរពតាមការប្ដេជ្ញារបស់ខ្លួននៅក្នុងការវិនិយោគចំពោះបរិស្ថាននោះទេ។
កិច្ចព្រមព្រៀងប្រែប្រួលអាកាសធាតុដែលបានបង្កើតឡើងកាលពីឆ្នាំ ២០១៥ មានគោលបំណងកម្រិតការកើនឡើងសីតុណ្ហភាពពិភពលោកឲ្យនៅត្រឹមតិចជាង ២ អង្សាសេ និងឲ្យនៅក្រោម ១,៥ អង្សាសេ ប្រសិនបើទៅរួចនៅត្រឹមចុងសតវត្សនេះ។
ដើម្បីសម្រេចបានដូច្នេះ បណ្ដាប្រទេសនានាឯកភាពគ្នាលើចំណុចមួយចំនួន ដូចជា ការបង្កើតកញ្ចប់ថវិកាជារៀងរាល់ឆ្នាំចំនួន ១ រយពាន់លានដុល្លារអាមេរិក ដើម្បីជួយបណ្ដាប្រទេសកំពុងអភិវឌ្ឍនៅក្នុងកិច្ចប្រឹងប្រែងទប់ស្កាត់ការកើនឡើងកម្ដៅផែនដី៕
