ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មុន​ការ​បោះ​ឆ្នោត​ដ៏​សំខាន់​ អត្រា​អត់​ការងារ​ធ្វើ​បាន​បន្ថែម​ទម្ងន់​បញ្ហា​សេដ្ឋកិច្ច​ដល់​បក្ស​កាន់​អំណាច​នៅ​តួកគី


អ្នកគាំទ្រ​កំពុង​ស្ដាប់​ការ​ថ្លែង​របស់​ប្រធានាធិបតី​តួកគី Recep Tayyip Erdogan ក្នុង​ពេល​ធ្វើ​យុទ្ធនាការ​ឃោសនា​​របស់​គណបក្ស​យុត្តិធម៌​និង​អភិវឌ្ឍន៍ នៅ​ទីក្រុង​អង់ការ៉ា ប្រទេស​តួក​គី កាល​ពី​ថ្ងៃ​ទី​១៤ មីនា ២០១៩។

អត្រា​គ្មាន​ការងារ​ធ្វើ​ក្នុង​ប្រទេស​តួកគី​បាន​កើន​ដល់​កម្រិត​ខ្ពស់​ក្នុង​រយៈ​ពេល​ជិត​១០​ឆ្នាំ​មក​នេះ ​ដោយ​នាំ​មក​នូវ​ដំណឹង​អាក្រក់​អំពី​សេដ្ឋកិច្ច​សម្រាប់​លោក​ប្រធានាធិបតី ​រេស៊ីប តាយីព អឺដូហ្គាន់​ (Recep Tayyip Erdogan) ​នៅ​មុន​ពេល​ការ​បោះ​ឆ្នោត​ក្នុង​ប្រទេស។

បើ​តាម​តួលេខ​ដែល​បាន​ចេញ​ផ្សាយ​កាល​ពីថ្ងៃ​សុក្រ​បាន​បញ្ជាក់​ថា ​ភាព​អត់​ការងារ​ធ្វើ​ក្នុង​ប្រទេស​តួកគី​បាន​កើន​ឡើង​ដល់​ ១៣.៥​ ភាគរយ ​ដែល​ជា​តួ​លេខ​ខ្ពស់​បំផុត​ចាប់​តាំង​ពីឆ្នាំ​២០១០។ ​ចំនួន​មនុស្ស​អត់​ការងារ​ធ្វើ​មាន​រហូត​ដល់​ទៅ​៤.៣​លាន​នាក់។

តួ​លេខ​នៃ​អ្នក​អត់​ការងារ​ធ្វើ​ គឺ​ជា​ដំណឹង​អាក្រក់​ផ្នែក​សេដ្ឋកិច្ច​ជាមួយ​នឹង​ការ​កំណើនអតិផរណា​ និង​ការ​អន់​ថយ​ផ្នែកសេដ្ឋកិច្ច​ក្នុង​ប្រទេស។

លោក ​អឺដូហ្គាន់​ កំពុង​ដឹកនាំ​យុទ្ធនាការ​គណបក្ស ​AK party ​របស់​លោក​ ដើម្បី​គ្រប់​គ្រង​ឲ្យ​បាន​នៅ​ក្នុង​ទីក្រុង​ស្ទើរ​តែ​ទាំង​អស់​របស់​ប្រទេស​តួកគី។ ​

ទោះជា​យ៉ាងណា​ក៏ដោយ​ ព័ត៌មាន​អាក្រក់​អំពី​បញ្ហា​សេដ្ឋកិច្ច ​ការ​បោះឆ្នោត​នៅថ្ងៃ​ទី៣១ ​ខែ​មីនា ​គឺជា​ការ​ប្រកួត​ប្រជែង​ដ៏ស្វិត​ស្វាញ។ ​សម្រាប់លោក ​អឺដូហ្គាន់ ​មិន​ដែល​ចាញ់​ឆ្នោត​នោះ វិធី​ជោគជ័យ​ដែល​លោក​ប្រើ​គឺការ​បំបាត់​សំឡេង​ក្រុម​អ្នក​រិះគន់​ដែល​ចោទ​ប្រកាន់​លោក​ថា​គ្រប់គ្រង​ប្រទេស​បែប​ផ្តាច់ការ​និយម៕

XS
SM
MD
LG