ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

នៅ​មុន​ការ​បោះ​ឆ្នោត ​លោក ​ហ៊ុន សែន​ ព្រមាន​ប្តឹង​អ្នក​រិះគន់​គណបក្ស​កាន់​អំណាច


រូបឯកសារ៖ នាយករដ្ឋមន្ត្រីកម្ពុជាលោក ហ៊ុន សែន ថ្លែងក្នុងពិធីបើកិច្ចប្រជុំកំពូលអាស៊ានលើកទី ៤០ និងលើកទី ៤១ និងកិច្ចប្រជុំកំពូលពាក់ព័ន្ធ នៅរាជធានីភ្នំពេញ ថ្ងៃទី ១១ ខែវិច្ឆិកា ឆ្នាំ ២០២២។

លោក​នាយក​រដ្ឋមន្ត្រី ​ហ៊ុន សែន​ នៅ​ថ្ងៃ​ចន្ទ​នេះ ​បាន​ព្រមាន​ចាត់​វិធាន​ការ​ផ្លូវ​ច្បាប់​លើ​គណ​បក្ស​នយោបាយ​ណា​ដែល​លោក​មិន​បញ្ចេញ​ឈ្មោះ​ថា​ បាន​វាយ​ប្រហារ​គណបក្ស​ប្រជាជន​កម្ពុជា។​

បើ​តាម​លោក​នាយក​រដ្ឋមន្ត្រី​ គណបក្ស​ប្រឆាំង​អាច​ឃោសនា​ ឬក៏​បញ្ជ្រាប​ពី​គោល​នយោបាយ​របស់​ខ្លួន​ទៅ​កាន់​ប្រជា​ពល​រដ្ឋ​បាន​ ប៉ុន្តែ​លោក​ហាម​មិន​ឱ្យ​មាន​ការ​ប្រើ​ប្រាស់​វោហា​ស័ព្ទ​នយោបាយវាយ​ប្រហារ​គណ​បក្ស​ដ​ទៃ។​

លោក ​ហ៊ុន សែន​ បញ្ជាក់​ថា៖ ​«ខ្ញុំ​សូម​ដាស់​តឿន​អ្នក​ បើ​សិន​ជា​អ្នក​បន្ត​ ​យើង​ខ្ញុំ​នឹង​ប្រើ​សិទ្ធិ​ការ​ពារ​ខ្លួន​ក្នុង​ករណី​ចាំបាច់​តាម​រយៈ​ផ្លូវ​ច្បាប់។ ខ្ញុំ​គ្រាន់​តែ​ព្រមាន ​និង​ដាស់​តឿន​អ្នក​ឱ្យ​អ្នក​បាន​យល់។ ​អ្នក​ប្រជុំ​នៅ​សៀមរាប​ តើ​អ្នក​បាន​ធ្វើ​អ្វី? ​អ្នក​ប្រជុំ​ប៉ុន្មាន​ថ្ងៃ​នៅ​ខេត្ត​កំពង់ចាម​យើង​នេះ ​នៅ​ជើង​ព្រៃ។ ​អ្នក​ត្រូវ​យល់​ឱ្យ​ច្បាស់ ​មិន​មែន​អ្វីៗ​ត្រូវ​តែ​ធ្វើ​តាម​ចិត្ត​អ្នក​ទេ»។​

ការ​ថ្លែង​របស់​លោក​ ហ៊ុន សែន​ បែប​នេះ​ធ្វើ​ឡើង​នៅ​ក្នុង​ពិធី​បើក​ការដ្ឋាន​សាង​សង់​ពង្រីក ​និង​លើក​គុណភាព ​កំណាត់​ផ្លូវ​ជាតិ​លេខ​៧ ​ពី​ស្គន់​ទៅ​ក្រុង​កំពង់ចាម​ នាព្រឹក​ថ្ងៃ​ទី​៩ ​ខែ​មករា ​ឆ្នាំ​២០២៣​ នៅក្នុង​ខេត្ត​កំពង់ចាម។​

លោក​នាយក​រដ្ឋមន្ត្រី​ក៏​បាន​បញ្ជា​ឱ្យ​មេ​ធាវី​របស់​គណបក្ស​ប្រជាជន​កម្ពុជា​នៅ​ទូទាំង​ខេត្ត​ និង​រាជធានី​ត្រៀម​ជើង​ព្រួល​ជា​ស្រេច​ដើម្បី​តាម​ដាន​ និង​ពិនិត្យ​ទៅ​លើ​ពាក្យ​សម្តី​របស់​គណ​បក្ស​ណា​ដែល​វាយ​ប្រហារ​គណបក្ស​ប្រជា​ជន​កម្ពុជា​ ខណៈ​លោក​ថា​ ការ​និយាយ​អាក្រក់​ពី​គណ​បក្ស​ដទៃ​មិន​មែន​ជា​ការ​បញ្ចេញ​មតិ​ឡើយ។​

លោក​ថ្លែង​ថា៖​ «ហើយ​អ្នក​គិត​ថា ​អី​ឡើង​អាង​តុលា​ការ ​ ខ្ញុំ​ចង់​សួរ​អ្នក​ទៅ​វិញ​ថា ​ជម្រើស​មាន​តែ​ពីរ​ទេ។ មួយ​គឺ​ប្រើ​ផ្លូវ​ច្បាប់​ មួយ​ទៀត​គឺ​ប្រើ​ដំបង​ហ្មង។​ តើ​អ្នក​យក​មួយ​ណា​ ពីរហ្នឹង? ​អាហ្នឹង​អ្នក​និយាយ​ឱ្យ​ច្បាស់។​ ខ្ញុំ​សូម​ព្រមាន​ចំពោះ​អ្នក។ ​ពួក​ខ្ញុំ​នេះ​មិ​ន​ទុក​ឱ្យ​ពួក​អ្នក​ចោទ​ថា​ជា​ចោរ​មួយ​ជីវិត​ទេ។ ​ខ្ញុំ​សូម​ជម្រាប​ជូន​ត្រូវ​តែ​បញ្ចប់​វប្ប​ធម៌​ឡាំប៉ា​ក្រោយ​ការ​បោះ​ឆ្នោត»។

អនុ​ប្រធាន​គណបក្ស​ភ្លើងទៀន ​លោក ​សុន ឆ័យ ​ប្រាប់​វីអូអេ​នៅ​ថ្ងៃ​ចន្ទ​នេះ​ថា ​នៅ​ក្នុង​សង្គម​ប្រជា​ធិបតេយ្យ ​ការ​ប្រកួត​ប្រជែង​គោល​នយោបាយ​របស់​គណបក្ស​នយោបាយ​នីមួយៗ​ជា​រឿង​សំខាន់​ដើម្បី​ទាក់​ទាញ​ទឹក​ចិត្ត​របស់​ប្រជា​ពល​រដ្ឋ​ ខណៈ​ថា​ ការ​ប្រើ​ពាក្យ​ពេចន៍​ជេរ​ប្រទេច​គ្នា​មិន​មែន​ជា​វិធី​ដែល​គណបក្ស​នីមួយៗ​ត្រូវ​ធ្វើ​ឡើយ។​

ទោះ​ជា​យ៉ាងណា​ បើ​តាម​អនុ​ប្រធាន​គណបក្ស​រូប​នេះ​ គណបក្ស​នីមួយៗ​ក៏​មាន​សិទ្ធិ​នៅ​ក្នុង​ការ​រិះ​គន់ភាព​ឆកល្វែង​របស់​គណ​បក្ស​នយោបាយ​ដទៃ ​ជាពិសេស​គណបក្ស​កាន់​អំណាច។​

លោក​ថ្លែង​ថា៖ ​«ប៉ុន្តែ​យើង​ត្រូវ​ដឹង​ដែរ​ថា​ ក្នុង​ស្ថាន​ភាព​នៃ​ការ​ប្រកួត​ប្រជែង​នៃ​ប្រទេស​ជា​ច្រើន ​គឺ​គេ​មាន​សិទ្ធិ​គ្រប់​គ្រាន់​ក្នុង​ការ​រិះគន់​គណ​បក្ស​មួយដើម្បី​ឱ្យ​ពល​រដ្ឋ​ឃើញ​អំពី​កំហុស​ឆ្គង​នៃ​គណ​បក្ស​មួយ ​ហើយ​មក​ប្រៀប​ធៀប​នឹង​គណ​បក្ស​គេ»។​

លោក ​សុន ឆ័យ​ អះអាង​ថា ​ការ​ព្រមាន​របស់​លោក​នាយក​រដ្ឋមន្ត្រី​ជា​ការ​រឹតត្បិត​សិទ្ធិ​សេរីភាព​របស់​គណបក្ស​នយោបាយ​នីមួយៗ​ ព្រម​ទាំង​សេរីភាព​របស់​បុគ្គល​ផង​ដែរ។​

លោក​ សុន ឆ័យ​ ជំរុញ​ឱ្យ​គណបក្ស​នយោបាយ​មាន​ការ​សហការ​គ្នា​ យោគ​យល់​និង​អធ្យាស្រ័យ​នា​រវាង​គ្នា ​និង​គ្នា​ដើម្បី​ផល​ប្រយោជន៍​របស់​ប្រជាជន ​និង​ប្រទេស​ជាតិ។​

លោក​បញ្ជាក់​ថា៖​ «ដើម្បី​យើង​បង្ក​បរិកាស​ល្អ​ជាមួយ​គ្នា​នៅ​ក្នុង​បរិបទ​នៃ​ការ​ប្រព្រឹត្ត​ទៅ​នៃ​នយោបាយ​នៅ​ក្នុង​ប្រទេស​កម្ពុជា​យើង។ ​ការ​មិន​សប្បាយ​ចិត្ត​ណា​មួយ​គួរ​តែ​គណបក្ស​ប្រជាជន ​និង​គណបក្ស​ភ្លើងទៀន​នេះ​សហការ​គ្នា ​មាន​ការ​ជួប​គ្នា​ពិគ្រោះ​ ហើយ​ប្តូរ​យោបល់​គ្នា»។​

លោក​នាយក​រដ្ឋមន្ត្រី ​នៅ​ថ្ងៃ​ចន្ទ​នេះ ​ក៏​បាន​ព្រមាន​លោក ​គង់ គាំ ​អ្នក​នយោបាយ​ជើង​ចាស់​មួយ​រូប ​ដែល​បច្ចុប្បន្ន​ជា​ទីប្រឹក្សា​គណប​ក្ស​ភ្លើងទៀន​ កុំ​ឱ្យ​រិះ​គន់​រូប​លោក ​ក៏ដូច​ជា​វាយ​ប្រហារ​គណបក្ស​កាន់​អំណាច​ផង​ដែរ។​

លោក​ គង់ គាំ ​ទីប្រឹក្សា​របស់​គណបក្ស​ភ្លើងទៀន ​ប្រាប់​វីអូអេ​ថា ​លោក​មិន​យល់​ថា​ ការ​ព្រមាន​របស់​លោក​នាយក​រដ្ឋមន្ត្រី ​ហ៊ុន សែន ​ជា​ការ​រឹតត្បិត​សិទ្ធិ​សេរីភាព​ឡើយ​ ខណៈ​លោក​ចាត់​ទុក​ថា​ នេះ​ជា​ការ​ធម្មតា​ដោយ​សារ​វា​ជា​ការ​ដាស់​តឿន​មួយ។​

លោក​បញ្ជាក់​ថា៖​ «ខ្ញុំ​ឃើញ​គាត់​ប្រតិកម្ម​តែ​របៀប​នេះ​ជា​ហូរហែ​ហើយ​ចំពោះ​តែ​នរណា​ ​ហើយ​ហាក់​ដូច​ជា​គាត់​មាន​បន្ទាត់ ​គន្លង​ និង​របៀប​មិន​ចង់​ឱ្យ​រិះគន់ ​វាយ​ប្រហារ​គ្នា។ ​គាត់​យល់​ថា​ប្រជា​ធិប​តេយ្យគឺ​ថា ​ទំនិញ​នរណា​ អ្នក​នោះ​អួត​មុខ​ទំនិញ​របស់​ខ្លួន​ទៅ​ ហើយ​គាត់​អួត​ទំនិញ​របស់​គាត់​ទៅ​ កុំ​បង្អាប់​បង្អោន​គ្នា»។​

ប្រធាន​វេទិកា ​The Thinker Cambodia ​លោក​ វណ្ណ ប៊ុនណា ​ប្រាប់​វីអូអេ​នៅ​ថ្ងៃ​ចន្ទនេះ​ថា ​ការ​រិះ​គន់​គ្នា​រវាង​គណបក្ស​នយោបាយ​មិនមែន​ជា​រឿង​ចម្លែក​ឡើយ​នៅ​ក្នុង​សង្គម​ប្រជា​ធិបតេយ្យ​ ដោយ​ហេតុថា​ វា​ជា​ការ​បង្ហាញ​សាធារណជន​ក៏ដូច​ជា​គណបក្ស​កាន់​អំណាច​ឱ្យ​ឃើញ​ពី​ចំណុច​ឆក​ល្វែង​របស់​ខ្លួន​ ហើយ​ធ្វើ​ការ​កែ​តម្រូវ ​និង​ដើម្បី​ទាញ​យក​ប្រជា​ប្រិយភាព​ពី​ប្រជា​ពល​រដ្ឋ។​

ទោះ​ជាយ៉ាងណា​ ​លោក​សង្កេត​ឃើញ​ថា ​នៅ​ក្នុង​នយោបាយ​កម្ពុជា​ ការ​រិះ​គន់​របស់​គណបក្ស​នយោបាយ​ចំពោះ​គ្នា​ភាគ​ច្រើន​ជា​ការ​រិះ​គន់​ទៅ​លើ​បុគ្គល​ និង​គ្រួសារ​ជា​ជាង​រិះ​គន់​ទៅ​លើ​គោល​នយោបាយ​ ឬ​ក៏​ភាព​អសកម្ម​ផ្សេងៗ​ក្នុង​ន័យ​ដើម្បី​ស្ថាបនា​ ដែល​លោក​ថា​ ការរិះគន់​បែប​នេះ​នាំ​ឱ្យមានការ​ចង​គំនុំ​ និង​ហិង្សា​ចំពោះគ្នា​និង​គ្នា។​

លោក​ថ្លែង​ថា៖ ​«ដោយ​សារ​ការ​រិះ​គន់​បែប​ក្រុម​គ្រួសារ ​ក៏​ដូច​ជា​បុគ្គល​វា​ធ្វើ​ឱ្យ​បែក​បាក់​ជាតិ​កាន់​តែ​ខ្លាំង​ ហើយ​វា​ចង​គំនុំ​គ្នា​ផង​ដែរ។​ អ៊ីចឹង​ទេ​ គណបក្ស​ក្រៅ​រដ្ឋាភិបាល​គួរ​តែ​រិះគន់​នៅ​ក្នុង​ន័យ​ស្ថាបនា​ ហើយ​រិះគន់​ទៅ​លើ​គោល​នយោបាយ។ ​ណា​មួយ​វិញ​ទៀត​គណ​បក្ស​កាន់អំណាច​ក៏មិ​នគួរ​ចាប់​ចង ​ឬក៏​ធ្វើទុក្ខ​បុក​ម្នេញ​ដល់​គណបក្ស​ក្រៅ​រដ្ឋាភិបាល​ដែរ​ ដោយសារ​នៅ​ក្នុង​ទិដ្ឋភាព​នយោបាយ​ រឿង​រិះគន់​ជា​រឿង​ធម្មតា»។​

នៅ​ថ្ងៃ​ចន្ទ​នេះ ​លោក ​ហ៊ុន សែន ​ក៏​បាន​ទម្លាយ​ដែរ​ថា ​លោក ​ថាច់ សេដ្ឋា ​អនុ​ប្រធាន​គណបក្ស​ភ្លើង​ទៀន ​បាន​សុំ​ណាត់​ជួប​លោក​ ហ៊ុន ម៉ាណែត​ ដែល​ជា​កូន​ប្រុស​ច្បង​របស់​លោក​ ខណៈ​ថា ​លោក​ ហ៊ុន ម៉ាណែត ​ដែល​ជា​អនាគត​បេក្ខជន​នាយក​រដ្ឋមន្ត្រី​បាន​ប្រាប់​លោក ​ថាច់ សេដ្ឋា ​នៅ​ក្នុង​ជំនួប​នោះ​ថា ​កុំ​ឱ្យ​សមាជិក​របស់​គណបក្ស​ភ្លើង​ទៀន​ប្រព្រឹត្ត​ខុស​ច្បាប់៕

XS
SM
MD
LG