ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក ហ៊ុន សែន ថា​ការ​ចាប់ខ្លួន​អ្នក​ជំទាស់​សង្ស័យ​ថា​មាន​បំណង​ផ្តួល​រំលំ​រដ្ឋាភិបាល​លោក ​ជា​រឿង​ត្រឹមត្រូវ


រូបឯកសារ៖ នាយករដ្ឋមន្ត្រីកម្ពុជាលោក ហ៊ុន សែន ថ្លែងក្នុងពិធីបើកិច្ចប្រជុំកំពូលអាស៊ានលើកទី ៤០ និងលើកទី ៤១ និងកិច្ចប្រជុំកំពូលពាក់ព័ន្ធ នៅរាជធានីភ្នំពេញ ថ្ងៃទី ១១ ខែវិច្ឆិកា ឆ្នាំ ២០២២។

នាយករដ្ឋមន្ត្រី​កម្ពុជា លោក​ ហ៊ុន សែន អះអាង​ថា​ ការ​សម្រេច​របស់​រដ្ឋាភិបាល​កម្ពុជា​ក្នុង​ការ​ចាប់​ខ្លួន​ក្រុម​អ្នក​ជំទាស់​ ដែល​លោក​ចោទ​ថាស្ថិត​ក្នុង​សកម្មភាព​ដែល​មាន​បំណង​ផ្តួល​រំលំ​រដ្ឋាភិបាល​ស្របច្បាប់​របស់​លោក​ ក្រោយ​ការ​បោះឆ្នោត​ជាតិ​ឆ្នាំ​ ២០១៣ នោះ​ ជា​ការត្រឹមត្រូវ។ លោក​បាន​ថ្លែង​ដូច្នេះ ដោយ​យក​ករណី​ចាប់ខ្លួន​ក្រុម​ប៉ុន​ប៉ង​ធ្វើ​រដ្ឋប្រហារ​មួយ​ក្រុម​នៅ​ប្រទេស​អាល្លឺម៉ង់ មក​ធ្វើ​ជា​ហេតុផល​គាំទ្រ​ចំណាត់ការ​របស់​រដ្ឋាភិបាល​កម្ពុជា។

បើតាម​សេចក្តីរាយការណ៍​របស់​ភ្នាក់ងារ​ផ្សព្វផ្សាយ​មួយ​ចំនួន​របស់​ចក្រភព​អង់គ្លេស​ អាជ្ញាធរ​អាល្លឺម៉ង់​បាន​ចាប់​ខ្លួន​មនុស្ស​ ២៥ នាក់​ ដែល​ជា​ក្រុមស្តាំ​និយម​ជ្រុល​ និង​ភាគច្រើន​ជា​សមាជិក​នៃ​ចលនា​ Reichsbuerger ដែល​ត្រូវ​បាន​រដ្ឋអាជ្ញា​សហព័ន្ធ​រដ្ឋាភិបាល​អាល្លឺម៉ង់​ចោទ​ថា​មិន​ជឿ​លើ​ការ​កើត​មាន​រដ្ឋទំនើប​អាល្លឺម៉ង់​បច្ចុប្បន្ន។

​លោក​ ហ៊ុន សែន ​ដែល​កំពុង​មាន​វត្តមាន​នៅ​ក្នុងតំបន់​អឺរ៉ុប​ដើម្បី​ចូលរួម​កិច្ចប្រជុំ​ក្រោម​ក្របខណ្ឌ​អាស៊ាន​ក្នុង​ទីក្រុង​ព្រុចសែល​ ប្រទេស​បែលហ្ស៊ិក និង​បំពេញ​ទស្សនកិច្ច​ការទូត​នៅ​ប្រទេស​បារំាង​ មិន​បាន​និយាយ​ចំឈ្មោះ​អ្នក​ជំទាស់​ណាមួយ​នោះ​ទេ ប៉ុន្តែ​ទំនង​ជា​លោក​សំដៅ​ដល់​អតីត​គណបក្ស​សង្គ្រោះជាតិ​ ដែល​គេ​ដឹង​ថា​បាន​ដឹកនាំ​បាតុកម្ម​ទ្រង់ទ្រាយ​ធំ​ក្រោយ​ការ​បោះឆ្នោត​ជាតិ​ឆ្នាំ​ ២០១៣។

បើ​តាម​ឃ្លីប​វីដេអូ​ដែល​មាន​រយៈពេលជាង ៣ នាទី​ ដែលបង្ហោះ​ដោយ​អង្គភាព​ព័ត៌មាន​ដែល​ស្និទ្ធ​នឹង​រដ្ឋាភិបាល​ Fresh News​ លោក​ ហ៊ុន សែន​ បាន​សួរ​ទៅ​អ្នក​ចូលរួម​ក្នុង​កម្មវិធី​សំណេះ​សំណាល​មួយ​ក្នុងទីក្រុង​ព្រុច​សែល​ថា៖ «ប៉ុន្មាន​ថ្ងៃ​នេះ​ ឯណា​អ្នកនៅ​អាល្លឺម៉ង់​ អ្នក​នៅ​អាល្លឺម៉ង់​ តើពិត​ជា​មាន​គេ​ចាប់​មនុស្ស​ប៉ុន​ប៉ង​ធ្វើ​រដ្ឋ​ប្រហារ​មែន​ទេ?...ហេតុអី​បាន​ជា​ប្រជាធិបតេយ្យ​ចាក់ឫស​តាំង​ពីក្រោយ​សង្គ្រាម​ លោក​លើកទី ២ មក​មាន​ការ​ប៉ុនប៉ង​ធ្វើ​រដ្ឋ​ប្រហារ​ក្នុង​ឆ្នាំ​២ ០២២?»។

លោក​បន្ថែម​ថា៖ «ហេតុអីបាន​អាល្លឺម៉ង់​ត្រូវ​ចាប់​មនុស្ស​ហ្នឹង? កម្ពុជា​ច្បាស់​ណាស់​ ពួក​អ្នក​ឯង​ប៉ុនប៉ង​ទៅ​រក​ចាប់​ខ្ញុំ​ថែមទៀត​ រឿង​អីខ្ញុំមិន​ចាប់​អ្នកឯង? មើល​ខ្ញុំសុំ​សួរ​អ្នក​ឯង? អ្នក​ឯង​ដាក់​ផែនការ​ចូល​ស្រុក​ដើម្បី​បំផុស​ចាប់​ ហ៊ុន​ សែន​ ផ្តួល​ ហ៊ុន សែន​ដោយ​អាវុធ។ អ៊ីចឹង ហ៊ុន សែន​ ចាប់​អត់​មាន​អី​ខុស​ទេ! បើ​អាល្លឺម៉ង់​ថា​ចាប់​អត់​ខុស​ អ៊ីចឹង​ ហ៊ុន​ សែន​ ចាប់​អត់​ខុស​ទេ»។

លោក ហ៊ុន​ សែន ​បាន​លើក​ឡើង​ទៀត​ថា​ នៅ​ប្រទេស​កម្ពុជា​ អ្នក​ជំទាស់​នឹង​លោក​មាន​បំណង​ពិត​ក្នុងការ​រៀប​គម្រោង​ផ្តួល​រំលំរដ្ឋាភិបាល​របស់​លោក​ ព្រោះ​មាន​ការ​កំណត់​ពេល​ជាក់​លាក់​ក្នុងការ​អនុវត្ត​ផែនការ​ផ្តួល​រំលំនោះ។

លោកថ្លែងថា៖ «​អ៊ីចឹង ហេតុអី​យើង​ចេញ​ជា​សំណួរ​សួរ​ថា​ ហេតុអី​បាន​ជា​ ពី​ឆ្នាំ​ ៤៥ ​រហូត​មក​ដល់​ឥឡូវ​ វា​ចូល​ដល់​ចិតសិប​ប៉ុន្មាន​ឆ្នាំហើយ? បានបែរ​ជា​មាន​ការ​ប៉ុនប៉ង​ធ្វើ​រដ្ឋប្រហារ។ អ៊ីចឹង​ នៅ​កម្ពុជា​ អ្នក​ឯង​ប៉ុន​ប៉ង​ពិត​ អ្នក​ឯង​និយាយ​ពិត​ គ្រោង​ធ្វើ​ពិត​ ការ​ផ្តួល​រំលំ​ពិត​ កំណត់​ទាំង​កាល​បរិច្ឆេទ​ ដើម្បីរំលំ​នៅថ្ងៃ​ទី​ ២៩​ ខែ​ធ្នូ​ ឆ្នាំ​ ២០១៣​ ដែល​ពេល​នោះ​ហើយ​ ឈាន​ទៅដល់​ការ​ស្លាប់​មនុស្ស រឿងអី​ដែល​យើង​មិន​ត្រូវ​ធ្វើ? អ៊ីចឹង​ មិនអាច​មាន​ស្តង់ដា​ពីរ​ ស្តង់ដា​បី​ទេ only single standard (ស្តង់ដា​តែ​មួយ)»។

បើតាម​សារព័ត៌មាន​ BBC របស់​ចក្រភព​អង់គ្លេស​បុរស​ម្នាក់ ដែល​គេ​ឲ្យ​ឈ្មោះ​ថា​ Heinrich XII​ មក​ពី​គ្រួសារ​អភិជន​ដែល​មាន​អាយុកាល​ចំណាស់​មួយ ត្រូវបាន​ចោទ​ប្រកាន់​ថា​ ជា​អ្នកស្ថិត​នៅ​កណ្តាល​នៃ​ផែនការ​ផ្តួល​រំលំរដ្ឋាភិបាល​ទីក្រុង​ប៊ែរឡាំង​នោះ។ ​សារព័ត៌មាន​បាន​យោង​តាម​រដ្ឋអាជ្ញា​សហព័ន្ធ​អាល្លឺម៉ង់​ដែល​ថា​ បុរស​រូប​នោះ​គឺ​ជា​មេគំនិត​ម្នាក់​ក្នុង​ចំណោម​មេគំនិត​ពីរនាក់​ និង​ស្ថិត​ក្នុង​ចំណោម​ជន​ឯ​ទៀត​ដែល​ត្រូវបាន​ចាប់ខ្លួន​ក្នុង​រដ្ឋ​ចំនួន​ ១១ ​នៅ​អាល្លឺម៉ង់។

ចំណែក​សេចក្តី​រាយការណ៍​របស់​ទីភ្នាក់​ងារ​ព័ត៌មាន​ Reuters ​បាន​បង្ហាញថា​ ចលនា Reichsbuerger នេះ​តំណាង​ឲ្យ​ការ​គំរាម​កំហែង​ដែល​កំពុង​កើន​ឡើង​ចំពោះ​ប្រទេស​អាល្លឺម៉ង់។ នៅ​ក្នុង​រយៈពេល​តែ​មួយឆ្នាំ​ ចលនា​នេះ​បាន​ពង្រីក​ខ្លួន​ពី​មនុស្ស​មាន​ចំនួន​តែ​ ២.០០០ នាក់​ ទៅ​ដល់​ ២៣.០០០ នាក់។ រដ្ឋ​អាជ្ញា​បាន​រាយការណ៍​ថា​ ជន​សង្ស័យ​ រួម​មាន​បុគ្គល​ដែល​មាន​អាវុធ​ និង​បាន​ដឹង​ពី​របៀប​ប្រើ​អាវុធ​ទាំង​នោះ។ ចលនា​នោះ​បាន​ប៉ុនប៉ង​រើស​បន្ថែម​សមាជិក​កងទ័ព​បច្ចុប្បន្ន​ ឬ​អតីត​សមាជិក​កងទ័ព​ ហើយ​មាន​ស្តុក​អាវុធ​ទុក​ជាច្រើនទៀត​ផង។

វីអូអេ​ព្យាយាម​សុំ​ការ​អត្ថាធិប្បាយ​ពី​ស្ថានទូត​អាល្លឺម៉ង់​ប្រចាំ​ទីក្រុង​ភ្នំពេញ​តាម​សារ​អេឡិចត្រូនិក​អ៊ីមែល​ តែ​គ្មា​ន​ការឆ្លើយ​តប​ គិត​ត្រឹម​រសៀល​ថ្ងៃ​អង្គារ​នេះ។

លោក ​អ៊ូ ចន្ទរ័ត្ន​ អតីត​តំណាង​រាស្ត្រអតីតគណបក្ស​សង្គ្រោះ​ជាតិ​ ប្រាប់​វីអូអេ​នៅ​ថ្ងៃ អង្គារ​នេះ​ថា​ លោក​មិន​បាន​តាម​ដាន​ស្ថានការណ៍​នយោបាយ​នៅ​ប្រទេស​អាល្លឺម៉ង់​នោះ​ទេ។ ប៉ុន្តែ​លោកយល់​ថា​ ស្ថានភាព​នៅ​អាល្លឺម៉ង់​និង​នៅ​កម្ពុជា​ អាច​ខុស​គ្នា​ ដោយ​សារ​តែ​គណបក្ស​សង្គ្រោះជាតិ​គំាទ្រ​តែ​សកម្មភាព​បោះឆ្នោតបែប​ប្រជាធិបតយ្យ​ក្នុង​ការប្រកួត​យក​អំណាច​ប៉ុណ្ណោះ។

លោក​ថ្លែងថា៖ «បើ​សិន​ជា​ប្រទេស​គេមាន​បញ្ហា​ដូច​កម្ពុជា​មែន​ ខ្ញុំយល់​ថា​ សម្តេច​ធ្វើ​ត្រូវ​ហើយ​ ប៉ុន្តែ​ភាគច្រើន​ ប្រទេស​គេ គេអត់​ធ្វើ​អ៊ីចឹង​ទេ។ ហើយ​ការ​ផ្តួលរំលំ​រដ្ឋាភិបាល​ណាមួយ​ ខ្ញុំ​មិន​ជឿ​ថា​ វា​អាច​មាន​កើត​ឡើង​ទេ»។

លោក​បន្ថែមថា៖ «ហើយ​នៅ​កម្ពុជា​ ក៏​ដូច្នោះ​ដែរ​ កាល​ពី​មាន​វត្តមាន​គណបក្ស​សង្គ្រោះ​ជាតិ​ ក៏​គ្មាន​អ្នក​ណា​ទៅ​មាន​ចិត្ត​ទៅ​រំលំ​រដ្ឋាភិបាល​អី​ដែរ ព្រោះ​យើង​ដឹង​ហើយ​គណបក្ស​សង្គ្រោះ​ជាតិ​ហ្នឹង​មាន​ការ​គាំ​ទ្រ​ច្រើន​ណាស់​ទៅ​ហើយ​ តាម​លក្ខណៈ​តាម​បែប​ប្រជាធិបតេយ្យ។ ដូច្នេះ​គ្មាន​មូលហេតុ​អី​ដែល​ត្រូវ​ទៅ​មាន​ចេតនា​ក្នុង​ការ​ផ្តួល​រំលំ​រដ្ឋាភិបាល​ទេ មែន​ទែន​ទៅ​នោះ។ អានេះ​ អ្វី​ដែល​ខ្ញុំ​នៅ​ក្នុង​ហ្នឹង​ ហើយ​ខ្ញុំ​មើល​ឃើញ​ ខ្ញុំ​យល់​ថា​ អ៊ីចឹង»។​

គួររំឭក​ថា​ គណបក្ស​សង្គ្រោះជាតិ​ដែល​ត្រូវ​មើល​ឃើញ​ថា​ជា​បក្ស​ប្រឆាំង​ដ៏​ធំ​ និង​ជា​គូប្រជែង​នយោបាយ​ប្រកៀក​ប្រកិត​បំផុត​ជាមួយ​នឹង​គណបក្ស​កាន់​អំណាច​ ត្រូវ​បាន​តុលាការ​កំពូល​កម្ពុជា​រំលាយ​ចោល​ កាល​ពី​ឆ្នាំ​ ២០១៧​ ក្រោម​ការ​សង្ស័យ​របស់​រដ្ឋាភិបាល​ថា ​គណបក្ស​នេះ​មាន​បំណង​ប៉ុនប៉ង​ផ្តួល​រំលំ​រដ្ឋាភិបាល​ដោយ​មាន​បរទេស​នៅ​ពី​ក្រោយ៕

XS
SM
MD
LG