ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អាយុ​និង​ទម្ងន់ ​ជា​កត្តា​ថ្លឹងថ្លែង​ពី​ដំណើរ​វិវត្តន៍​នៃ​ជំងឺ​កូវីដ១៩​របស់​លោក Trump


រូបឯកសារ៖ ប្រធានាធិបតីសហរដ្ឋអាមេរិកលោក Donald Trump បានមកដល់សេតវិមានវិញ បន្ទាប់ពីបានធ្វើដំណើរវិលត្រឡប់ពីរដ្ឋ New Jersey ថ្ងៃព្រហស្បតិ៍ ទី១ ខែតុលា ឆ្នាំ២០២០ មុនពេលលោកត្រូវបានធ្វើតេស្តរកឃើញថា បានឆ្លងជំងឺកូវីដ១៩ នាពេលយប់ថ្ងៃព្រហស្បតិ៍រំលងអធ្រាត្រចូលព្រឹកថ្ងៃសុក្រ។

អ្នកជំនាញ​និយាយ​ថា អាយុ និង​ទម្ងន់​របស់​លោក​ប្រធានាធិបតី​ Donald Trump​ ធ្វើ​ឲ្យ​លោក អាចប្រឈម​នឹង​គ្រោះថ្នាក់​ខ្ពស់​ ក្នុង​ករណី​មាន​អាការៈ​ជំងឺកូវីដ១៩​ធ្ងន់ធ្ងរ​ ក៏ប៉ុន្តែ​វា​ពិបាក​ក្នុងការ​ព្យាករណ៍​ឲ្យ​លើស​ពីនេះ​ ទៅ​លើ​ដំណើរ​វិវត្តន៍​នៃ​ស្ថានភាព​ជំងឺ​កូវីដ១៩ ​របស់​លោក។

វេជ្ជបណ្ឌិត​របស់​លោកប្រធានាធិបតី គឺ​លោក Sean Conley បាន​បញ្ជាក់​នៅក្នុង​សេចក្តី​ថ្លែងការណ៍​មួយ​ កាលពី​ព្រឹក​ថ្ងៃសុក្រ​ថា លោក​ប្រធានាធិបតី​និង​ភរិយា​របស់​លោក​គឺ​លោកស្រី​ Melania Trump ​បានធ្វើ​តេស្ត​រកឃើញ​ថា​ បាន​ឆ្លង​វីរុសកូរ៉ូណា ​តែមាន​សុខភាព​ធម្មតា​នៅ​ពេល​នោះ។

លោក Sean Conley បន្ត​ថា៖ «ខ្ញុំ​រំពឹង​ថា លោក​ប្រធានាធិបតី នឹង​បន្ត​បំពេញ​ភារកិច្ច​របស់​លោក​ដោយ​គ្មាន​ការ​បង្អាក់​ ខណៈ​ពេល​ដែល​លោក​កំពុង​រើប​ឡើងវិញ​ពី​ជំងឺ​កូវីដ១៩​ នេះ»។

លោក Trump មាន​អាយុ ៧៤ ឆ្នាំ ហើយ​អត្រា​ត្រូវ​ទៅ​សម្រាក​ព្យាបាល​នៅ​មន្ទីរពេទ្យ​កើនឡើង​ជា​លំដាប់​ទៅ​តាម​អាយុ​របស់​អ្នកជំងឺ។ មជ្ឈមណ្ឌល​គ្រប់គ្រង និង​បង្ការ​ជំងឺ​ឆ្លង​សហរដ្ឋ​អាមេរិក (CDC) បាន​ឲ្យ​ដឹង​ថា មនុស្ស​ដែល​មាន​អាយុ​ស្របាល​នឹង​លោក​Trump ត្រូវ​បាន​បញ្ជូន​ទៅ​ព្យាបាល​នៅ​មន្ទីរពេទ្យ​ក្នុង​អត្រា ៥ ដង​ខ្ពស់​ជាង​មនុស្ស​ដែល​មាន​អាយុ​ពី ១៨ ទៅ ២៩ ឆ្នាំ។ រីឯ​អត្រា​មរណៈ​វិញ គឺ​ខ្ពស់ជាង​៩០ ដង។

លទ្ធផល​ពី​ការពិនិត្យ​សុខភាព​កាលពី​ពេល​ថ្មីៗ​នេះ​របស់​លោក Trump បាន​ឲ្យ​ដឹង​ថា លោក Trump មាន​កម្ពស់ ១,៩ ម៉ែត្រ និង​មាន​ទម្ងន់​ជិត ១១១ គីឡូក្រាម។ ទិន្នន័យ​ខាងលើ​នេះ បាន​ដាក់​សន្ទស្សន៍​រាងកាយ​របស់​លោក​ចូលក្នុង​តារាង​នៃ​អ្នក​ដែល​ធាត់ជ្រុល។

មជ្ឈមណ្ឌល CDC បាន​ឲ្យ​ដឹង​ថា ទិន្នន័យ​អំពី​កម្ពស់ និង​ទម្ងន់​របស់​លោក Trump អាច​ឲ្យ​ដឹង​ថា អត្រា​ដែល​លោក ប្រឈមនឹង​ការ​តម្រូវឲ្យ​ទៅ​សម្រាក​ព្យាបាល​នៅ​មន្ទីរពេទ្យ មាន​ដល់​ទៅ​៣ដង។

លោក​វេជ្ជបណ្ឌិត Amesh Adalja អ្នក​ឯកទេស​ជំងឺ​ឆ្លង និង​ជា​អ្នកស្រាវជ្រាវ​ជាន់ខ្ពស់​ផ្នែក​សន្តិសុខ​សុខាភិបាល​នៃ​មជ្ឈមណ្ឌល Johns Hopkins បាន​និយាយ​ថា៖ «ជាទូទៅ​អ្នក​ដែល​មាន​ទិន្នន័យ​កម្ពស់ និង​ទម្ងន់​ដូចនេះ ត្រូវតែ​ទទួល​ការព្យាបាល​ឲ្យ​បាន​ដិតដល់»។

លោក​វេជ្ជបណ្ឌិត Amesh Adalja បាន​ថ្លែងបន្ថែម​ទៀត​ថា៖ «ក៏ប៉ុន្តែ វា​មិន​មែន​មាន​ន័យ​ថា អ្នក​ទាំងនោះ​ប្រាកដជា​មាន​អាការៈ​ធ្ងន់ធ្ងរ​នោះ​ទេ»។

លោក Adalja បាន​និយាយ​បន្ថែម​ទៀត​ថា​ កម្រិត​ធ្ងន់ធ្ងរ​នៃ​ការ​កើត​ជំងឺ​កូវីដ១៩​មាន​ភាព​ចម្រុះ​គ្នា​ខ្លាំង​ ដែល​រួមមាន​តាំង​ពី​ការ​ធ្លាក់​ខ្លួនឈឺដោយមិន​ចេញ​រោគសញ្ញា​អ្វី​ទាំង​អស់​ រហូត​ដល់​ការ​ស្លាប់។ ​

លោកបាន​បន្តថា៖ «អាការៈធ្ងន់ធ្ងរ​នៃ​អ្នក​ជំងឺ​ដែល​ឆ្លង​វីរុស​កូរ៉ូណា​គឺ​មានលក្ខណៈ​ខុសៗ​គ្នា អាស្រ័យ​ទៅលើ​មនុស្ស​ម្នាក់ៗ។​ យើង​មិន​ដឹង​ច្បាស់​ពី​មូលហេតុ​ដែល​ថា ហេតុអ្វី​បានជា មនុស្ស​មួយ​ចំនួន​ទោះបី​ជា​ពួកគេ​ស្ថិត​នៅក្នុង​ក្រុម​ដែល​មាន​ហានិភ័យ​ខ្ពស់​ក៏ដោយ ក៏​ពួកគេ​មាន​អាការៈ​ស្រាល ហើយ​អ្នកផ្សេងទៀត បែរ​ជា​មាន​អាការៈ​ធ្ងន់ធ្ងរ​នោះ»។

ប្រធានាធិបតីអាមេរិកលោក Donald Trump ចុះពីឧទ្ធម្ភាគចក្រ Marine One ពេលលោកបានទៅដល់មន្ទីរពេទ្យយោធា Walter Reed ដើម្បីសម្រាកព្យាបាលជំងឺកូវីដ១៩ នៅទីក្រុង Bethesda រដ្ឋ Maryland ជាយរដ្ឋធានីវ៉ាស៊ីនតោន កាលពីថ្ងៃទី២ ខែតុលា ឆ្នាំ២០២០។
ប្រធានាធិបតីអាមេរិកលោក Donald Trump ចុះពីឧទ្ធម្ភាគចក្រ Marine One ពេលលោកបានទៅដល់មន្ទីរពេទ្យយោធា Walter Reed ដើម្បីសម្រាកព្យាបាលជំងឺកូវីដ១៩ នៅទីក្រុង Bethesda រដ្ឋ Maryland ជាយរដ្ឋធានីវ៉ាស៊ីនតោន កាលពីថ្ងៃទី២ ខែតុលា ឆ្នាំ២០២០។

ការសិក្សា​ទ្រង់ទ្រាយ​តូច​មួយ​ដែល​ធ្វើ​ឡើង​នៅ​ឯ​មណ្ឌល​ថែទាំ​មនុស្សចាស់​ ដែល​ជា​កន្លែង​សម្បូរដោយ​ក្រុម​មន្សុស​ដែល​មាន​ហានិភ័យ​ខ្ពស់ បាន​រក​ឃើញ​ថា មាន​មនុស្ស​ជាង ១ភាគ៣ នៃ​អ្នក​ដែល​បាន​ធ្វើ​តេស្ត​រកឃើញ​ថា បាន​ឆ្លង​ជំងឺ​វីរុស​កូរ៉ូណា​នេះ មិន​មាន​រោគសញ្ញា​អ្វី​នោះ​ទេ។

លោក Mark Meadows ប្រធាន​ខុទ្ទកាល័យ​នៃ​សេតវិមាន ​បាន​និយាយ​កាលពី​ថ្ងៃសុក្រ​ថា លោក Trump មាន​«រោគសញ្ញា​កម្រិត​ស្រាល»។

មនុស្ស​ភាគច្រើន មិន​ធ្លាក់​ខ្លួន​ឈឺ​ធ្ងន់ធ្ងរ​ទេ ក្រោយពី​ពួកគេ​ឆ្លង​វីរុស​កូរ៉ូណា។ ​ប៉ុន្តែ អ្នកជំងឺ​មួយ​ចំនួន​តូច​កាន់តែ​មាន​អាការៈ​ធ្ងន់ធ្ងរ​ពី​ ៨ ទៅ ​១០ ថ្ងៃ​ក្រោយមក​ បន្ទាប់ពី​ពួកគេ​មាន​រោគសញ្ញា​ដំបូង។

អ្នកស្រី Helen Boucher ប្រធាន​ផ្នែកជំងឺឆ្លង​នៅ​មជ្ឈមណ្ឌល​វេជ្ជសាស្ត្រ ​Tufts ថ្លែង​ថា៖​ «សប្តាហ៍​ទី២​ (ក្រោយពី​ឆ្លងវី​រុស​កូរ៉ូណា) ​នោះ​ ពិតជា​សំខាន់​ណាស់​សម្រាប់​យើង​ក្នុង​ការឃ្លាំមើល​អ្នក​ជំងឺ»។

អ្នកស្រី Boucher បាន​កត់សម្គាល់​ឃើញ​ថា អ្នកជំងឺ​ដែល​សម្រាក​ព្យាបាល​នៅ​មន្ទីរពេទ្យ​ក្នុង​សប្តាហ៍​ទី២ ​អាច «ធ្លាក់ខ្លួន​ឈឺខ្លាំង»​ រហូត​ដល់​សប្តាហ៍​ទី៣​ និង​ទី៤។ ដូច្នេះ វា​ត្រូវការ​ពេលវេលា ដើម្បី​ដឹង​អំពី​លទ្ធផល។

មជ្ឈមណ្ឌល​ CDC ​ណែនាំ​ឲ្យ​អ្នក​ជំងឺ​នៅ​ដាច់​ដោយ​ឡែក​ពី​អ្នក​ដទៃ យ៉ាងតិចណាស់​រយៈពេល ​១០ ថ្ងៃ​បន្ទាប់ពី​រោគសញ្ញា​លេច​ចេញ​ដំបូង​ ដរាបណា​ ២៤ ម៉ោង​ បាន​កន្លងផុត​ហើយ ​ហើយ​ពួកគេ​គ្មាន​គ្រុនក្តៅ​ហើយ ​គ្មាន​រោគសញ្ញា​ផ្សេង​ទៀត​ទេ​នោះ។

បើ​ដូច​ការណែនាំ​ខាង​លើ​នេះ​នោះ​ មាន​ន័យ​ថា ​លោក​ Trump​ នឹង​មិន​មាន​ពេល​ច្រើន​ក្នុងការ​ចេញ​ទៅ​ធ្វើ​យុទ្ធនាការ​ឃោសនា​រក​សំឡេងឆ្នោត​នោះ​ទេ ដោយសារ​នៅ​សល់​តែ​ជិត​មួយខែ​ទៀត​ប៉ុណ្ណោះ មុន​ថ្ងៃ​បោះឆ្នោត​នឹង​ឈាន​មកដល់។

ទោះបី​អាការៈ​របស់​លោក​មិន​ធ្ងន់ធ្ងរ​ជាងនេះ​ហើយ​លោក​បាន​ជា​ធូរស្បើយ​យ៉ាងឆាប់រហ័ស​ក៏ដោយ​ក៏លោក​ប្រហែលជា​មិនមាន​សុខភាព​ពេញលេញ​ទេ នៅ​ចុង​បញ្ចប់​នៃ​រយៈពេល ១០ ថ្ងៃ ដែល​លោកត្រូវ​នៅ​ដាច់​ដោយ​ឡែក​ពី​គេនោះ។

លោក​វេជ្ជបណ្ឌិត Amesh Adalja បាន​ថ្លែង​ថា៖ «ជួនកាល ក្នុង​ករណី​ខ្លះ​ទោះបីជា​អ្នកជំងឺ​មាន​អាការៈ​ស្រាល​ក៏ដោយ ក៏ពួកគេ​ត្រូវ​ចំណាយ​ពេល​ខ្លះ ដើម្បី​ឲ្យ​មាន​សុខភាព​ជា​ធម្មតា​ឡើង​វិញ»៕

ប្រែសម្រួលដោយអ្នកស្រី លី ម៉ូរីវ៉ាន់

តួលេខនៃករណីឆ្លងជំងឺកូវីដ១៩

XS
SM
MD
LG