ភ្ជាប់​ទៅ​គេហទំព័រ​ទាក់ទង

ស.រ.អា.​មាន​ដំណើរ​ការ​ល្អ​ក្នុង​ការ​សម្រេច​គោល​ដៅ​ទទួល​យក​ជន​ភៀស​ខ្លួន​ស៊ីរី


រូបឯកសារ៖ វេជ្ជបណ្ឌិត​ Zaher Sahloul ​ធ្វើ​ការ​ផ្នែក​ជន​ភៀស​ខ្លួន​ស៊ីរី និងជន​ភៀស​ខ្លួន​​​ស៊ីរី​បាន​មក​កាន់​សេតវិមាន​ដើម្បី​ស្នើ​ឲ្យ​រដ្ឋបាល​លោក​ អូបាម៉ា ធ្វើ​កិច្ច​ការ​បន្ថែម​ទៀត​ដើម្បី​ដោះ​ស្រាយ​វិបត្តិ​ក្នុង​ប្រទេស​ស៊ីរី។

អាជ្ញាធរ​អាមេរិកាំង​ជិត​សម្រេច​គោលដៅ​របស់​រដ្ឋបាល​លោក អូបាម៉ា ហើយក្នុង​ការ​ទទួល​យក​ជន​ភៀស​ខ្លួនស៊ីរី​មួយ​ម៉ឺន​នាក់​មិន​ឱ្យ​ហួស​ពី​ដំណាច់​ខែ​កញ្ញា​នេះ ​ក្រោយពេល​មាន​កំណើន​នៃ​ការ​ទទួល​យក​ជន​ភៀស​ក្នុង​រយៈ​ពេល​បី​ខែ​ចុង​ក្រោយ​នេះ។​

ចាប់​តាំង​ពី​ថ្ងៃ​ទី១​ខែ​ តុលា ឆ្នាំ​២០១៥​ រហូត​ដល់ថ្ងៃ​ទី៤​ ខែ​សីហា​ មាន​ជន​ភៀស​ខ្លួន​ស៊ីរី​ ៨០០៤ ​នាក់​ដែល​បាន​រត់​គេច​ខ្លួន​ចេញ​ពី​អំពើ​ហិង្សា​និង​ការ​ធ្វើ​ទុក្ខ​បុក​ម្នេញ​ក្នុង​ប្រទេស​របស់​ពួក​គេ​ ហើយ​បាន​មក​តាំង​លំនៅ​ដ្ឋាន​ជា​ថ្មី​ក្នុង​ស.រ.អា. ហើយ​ពាក់​កណ្តាល​នៃ​ចំនួន​ជន​ភៀស​ខ្លួន​ទាំង​នេះ​ មាន​អាយុ​តិច​ជាង​១៤ឆ្នាំ នេះ​បើ​តាម​ទិន្នន័យ​របស់​មជ្ឈមណ្ឌល​ពិនិត្យ​សំណុំ​ឯកសារ​ពួក​ជន​ភៀស​ខ្លួននៃ​ក្រសួង​ការបរទេស​ស.រ.អា.។

អ្នកស្រី Juliane Ramic ​នាយិកា​ជាន់​ខ្ពស់​សម្រាប់​កិច្ច​ការ​ជន​ភៀស​ខ្លួន ​និង​ការ​រួម​បញ្ចូល​ក្នុង​សហគមន៍​នៃ​មជ្ឈមណ្ឌល​សេវាកម្ម​ខាង​ជាតិសាសន៍​នៅ​ក្នុងក្រុង Philadelphia ​បាន​ធ្វើ​ការ​ច្រើន​ជាង​មុន​ជា​មួយ​ពួក​កុមារ​ស៊ីរី​កាល​ពី​ប៉ុន្មាន​ខែ​មុន​នេះ។

អ្នកស្រី​ Ramic ​បាន​និយាយ​ប្រាប់​វីអូអេ​ថា៖ យើង​មាន​នុំ ​cookies Little Debbie ទាំង​នេះ ហើយ​កុមារា​ម្នាក់​អាយុ​៧​ឆ្នាំ​បាន​គ្រវី​ដៃ​ដាក់​ខ្ញុំ​ ហើយ​ខ្ញុំ​គិត​ថា ​ក្មេង​នេះ​នឹង​ដាក់​បាត​ដៃ​វា​ទល់​នឹង​បាត​ដៃ​ខ្ញុំដើម្បី​អបអរ​សាទរ​ ក៏​ប៉ុន្តែ​វា​ដាក់​នុំ ​cookie វា​ក្នុង​ដៃ​ខ្ញុំ​ ហើយ​ទាញ​ម្រាម​ដៃ​ខ្ញុំ​បិទ​លើ​នុំ​នោះ។​ ម្តាយ​ក្មេង​នេះ​បាន​និយាយ​ថា​អ្នក​ស្រី​ជា​មិត្ត​ទី​មួយ​របស់​វា​ហើយ​វា​ចង់​អរគុណ​អ្នកស្រី»។

អ្នកស្រី​ Ramic ​បាន​ថ្លែង​បន្តថា៖ «នេះ​ជា​ការ​រំភើប​ចិត្តណាស់​ពីព្រោះ​នៅ​ពេល​ខ្ញុំ​ពិនិត្យ​មើល​អាយុ​ក្មេង​នេះ​និង​អ្វី​ដែល​កើត​មាន​ឡើង​នៅ​ក្នុង​ប្រទេស​ស៊ីរី ​អ្វី​ទាំង​អស់​ដែល​ពួក​គេ​ស្គាល់​គឺ​សង្គ្រាម​និង​ការ​ប្រយុទ្ធ​គ្នា»។

កាល​ពី​ខែ​កុម្ភៈ ​ក្រសួង​ការបរទេស ​.រ.អា.​ បាន​បង្កើត​អ្វី​ដែល​ហៅ​ថា​«មជ្ឈមណ្ឌល​បង្កើនការ​តាំង​លំនៅ​ដ្ឋាន​ជា​ថ្មី​នៃ​ពួក​ជនភៀស​ខ្លួន»​នៅ​ក្នុង​ក្រុង​ Amman ​ប្រទេស ​Jordanie។​ ​ការ​បំពេញ​សំណុំ​ឯកសារ​ ការ​សម្ភាសន៍​ ការ​ពិនិត្យ​សុខភាព​ និង​សន្តិសុខ​សម្រាប់​ពួក​ជន​ភៀស​ខ្លួននៅ​ទី​នោះ​ ជាធម្មតា​ ត្រូវ​ចំណាយ​ពេល​ពី​១៨​ទៅ​២៤ខែ​ ប៉ុន្តែមន្ត្រី​អាមេរិកាំង​អះអាង​ថា​ពួក​គេ​អាចកាត់​បន្ថយ​ពេល​វេលា​នៃ​ការ​ពិនិត្យ​សំណុំ​ឯកសារ​ឱ្យ​មក​នៅ​ត្រឹមបី​ខែ​ប៉ុណ្ណោះ។​

ចាប់​តាំង​ពី​ខែ​ឧសភា​មក ទិន្នន័យ​នៃ​ការ​មក​ដល់​នៃ​ពួក​ជន​ភៀស​ខ្លួន​បង្ហាញ​ថា​ចំនួន​ជន​ជាតិ​ស៊ីរី​បាន​កើន​ឡើង​ពី​រាប់រយ​នាក់​ក្នុង​ខែ​មុនៗ​ដល់​ចំនួន​១០៦៩​នាក់​ក្នុង​ខែ​ឧសភា​ បន្ទាប់​មក​ចំនួន​នេះ​បាន​ឡើង​ដល់​២០០០នាក់​ក្នុង​ខែ​មិថុនា​ និង​ខែ​កក្កដា៕

XS
SM
MD
LG