អង្គការឃ្លាំមើលសកលលោកមួយបានទាមទារកាលពីថ្ងៃទី ១២ ខែ មករា ឲ្យម្ចាស់ជំនួយអន្តរជាតិដាក់ទណ្ឌកម្មលើរដ្ឋមន្ត្រីការពារជាតិថ្មីរបស់អាហ្វហ្គានីស្ថាន លោក Asadullah Khalid ដោយពួកគេនិយាយថា មានភស្តុតាងដ៏គួរឲ្យទុកចិត្តបានដែលបញ្ជាក់ថា លោកជាប់ពាក់ព័ន្ធនឹងការរំលោភសិទ្ធិមនុស្សយ៉ាងធ្ងន់ធ្ងរ។
ការតែងតាំងលោក Khalid កាលពីខែធ្នូ គឺជាផ្នែកមួយនៃការរុះរើគណៈរដ្ឋមន្ត្រីរបស់លោកប្រធានាធិបតី Ashraf Ghani ដែលលោកបានចេញបញ្ជា ខណៈដែលកងកម្លាំងរដ្ឋាភិបាលអាហ្វហ្កានីស្ថានបរាជ័យនៅក្នុងសមរភូមិប្រយុទ្ធជាមួយនឹងក្រុមឧទ្ទាមតាលីបង់នៅទូទាំងប្រទេស។
រដ្ឋមន្ត្រីការពារជាតិដែលកាលពីមុនគ្រប់គ្រងខេត្ត Kandahar និង Ghazni ដែលស្ថិតក្រោមការប្រយុទ្ធគ្នា និងធ្លាប់បម្រើជាប្រធានចារកម្មអាហ្វហ្គានីស្ថានផងនោះ ក៏រងការចោទប្រកាន់ថាបានបញ្ជាឲ្យសម្លាប់ក្រុមការងារអង្គការសហប្រជាជាតិចំនួន៥នាក់ នៅក្នុងហេតុការណ៍គប់គ្រាប់បែកនៅលើដងផ្លូវមួយកាលពីខែមេសា ឆ្នាំ២០០៧ នៅខេត្ត Kandahar ផងដែរ។
អង្គការឃ្លាំមើលសិទ្ធិមនុស្ស Human Rights Watch បានកត់សម្គាល់ថា៖ «ភស្តុតាងគួរឲ្យទុកចិត្តអំពីការរំលោភសិទ្ធិមនុស្សនិងឧក្រិដ្ឋកម្មសង្គ្រាមដែលពាកព័ន្ធនឹងលោកKhalid នៅតែដិតដាមក្នុងជីវភាពនយោបាយរបស់លោករហូត»។
អង្គការ Human Rights Watch បានបញ្ជាក់ទៀតថា មានភស្តុតាងដ៏ច្បាស់មួយទៀតដែលភ្ជាប់លោកទៅនឹងអំពើហិង្សាផ្លូវភេទទៅលើស្ត្រីនិងក្មេងស្រី នៅពេលលោកកាន់តំណែងជាអភិបាលខេត្ត Ghazni និងខេត្ត Kandahar។
របាយការណ៍របស់អង្គការ Human Rights Watch បានបរិហារការតែងតាំងលោក Khalid ថាជាការវិវត្តឱកាសនិយមនិងឥតមេត្តារបស់លោកប្រធានាធិបតី Ghani ដើម្បីទទួលបានផលចំណេញក្នុងរយៈពេលខ្លី ក្នុងការបោះឆ្នោតប្រធានាធិបតីអាហ្វហ្គានីស្ថានដែលនឹងមកដល់ក្នុងពេលឆាប់ៗនេះ។
អង្គការ Human Rights Watch បានឲ្យដឹងថា ការវិវត្តនេះគួរតែជាការដាស់តឿនដ៏ខ្លាំងមួយមិនសម្រាប់តែនៅទីក្រុងកាប៊ុលទេ ប៉ុន្តែសម្រាប់ជាការដាស់តឿនដល់ម្ចាស់ជំនួយសំខាន់ៗនៅក្នុងរដ្ឋធានីនានារបស់អាហ្វហ្គានីស្ថានផងដែរ។
អង្គការសិទ្ធិមនុស្សនេះថ្លែងថា៖ «ពួកគេមិននិយាយអ្វីច្រើនទេរឿងសិទ្ធិមនុស្សសម្រាប់រដ្ឋាភិបាលដែលកាន់តែរង្គោះរង្គើ និងម្ចាស់ជំនួយដែលកំពុងរកវិធីចាកចេញពីសង្គ្រាមអាហ្វហ្គានីស្ថានដែលអូសបន្លាយនោះ»។
រដ្ឋាភិបាលអាហ្វហ្គានីស្ថានមិនបានផ្តល់អត្ថាធិប្បាយឆ្លើយតបភ្លាមៗលើរបាយការណ៍លើកឡើងធ្ងន់ៗនេះទេ។
ដើម្បីឆ្លើយតបនឹងការរិះគន់នេះ ក្នុងចំណោមមន្ត្រីជាច្រើនដែលត្រូវបានអញ្ជើញឲ្យចូលរួមក្នុងពិធីចូលកាន់តំណែងរបស់លោក Khalid ជារដ្ឋមន្ត្រីការពារជាតិអាហ្វហ្គានីស្ថានកាលពីពេលថ្មីៗនេះ ក៏មានគណៈកម្មការសិទ្ធិមនុស្សឯករាជ្យរបស់អាហ្វហ្គានីស្ថានផងដែរ។
លោក Khalid បានថ្លែងនៅក្នុងពិធីចូលកាន់តំណែងនោះដោយនិយាយថា៖ «ក្តីរំពឹងរបស់ខ្ញុំពីទាហានរបស់ខ្ញុំគឺថា បើទោះបីជាពួកគេតឹងរ៉ឹងនិងឈ្លើយដាក់សត្រូវក៏ដោយ ក៏ពួកគេនឹងធ្វើឲ្យបានល្អតាមតែអាចធ្វើបាន ដើម្បីកាត់បន្ថយគ្រោះថ្នាក់លើជនស៊ីវិល និងបង្ហាញអាកប្បកិរិយាល្អទៅកាន់អ្នកទោសសង្គ្រាម ដែលស្ថិតនៅក្រោមកាតព្វកិច្ចច្បាប់និងសាសនារបស់ពួកគេ»។
របាយការណ៍របស់អង្គការអះអាងទៀតថា រដ្ឋាភិបាលរបស់លោកប្រធានាធិបតី Ghani មិនបានបង្ហាញឆន្ទៈថាពួកគេចង់ស៊ើបអង្កេតករណីព្រហ្មទណ្ឌលើលោក Khalid ទេ ប៉ុន្តែសហរដ្ឋអាមេរិកនិងកាណាដាមានអំណាចតាមច្បាប់របស់ពួកគេក្នុងការដាក់ទណ្ឌកម្មផ្នែកហិរញ្ញវត្ថុនិងការធ្វើដំណើរលើលោក Khalid។
អង្គការ Human Rights Watch ថ្លែងថា៖ «សហភាពអឺរ៉ុបនិងម្ចាស់ជំនួយផ្សេងទៀតគួរតែដាក់ទណ្ឌកម្មស្រដៀងគ្នានេះ ដើម្បីផ្ញើសារយ៉ាងច្បាស់មួយថា ការតែងតាំងអ្នករំលោភសិទ្ធិមនុស្សដ៏ល្បីម្នាក់ឲ្យកាន់អំណាចគឺមិនអាចទទួលយកបានទេ»។
ការចោទប្រកាន់លើលោក Khalid កើតឡើងពីដំបូងតាំងពីពេលដែលលោកជាអភិបាលខេត្ត Kandahar កាលពីមួយទសវត្សរ៍មុនម៉្លេះ ដែលពេលនោះទាហានកាណាដារាប់ពាន់នាក់បានបោះមូលដ្ឋាននៅក្នុងខេត្តនេះ ដែលជាផ្នែកមួយនៃក្រុមយោធាចម្រុះដឹកនាំដោយសហរដ្ឋអាមេរិក៕
ប្រែសម្រួលដោយលោក នៀម ឆេង
