ប្រធានាធិបតីអាហ្វហ្គានីស្ថាន លោក Ashraf Ghani បាននិយាយកាលពីថ្ងៃអាទិត្យថា រដ្ឋាភិបាលរបស់លោកមិនមានការប្តេជ្ញានឹងដោះលែងអ្នកទោសតាលីបង់ចំនួន៥.០០០នាក់នោះទេ។ ការដោះលែងអ្នកទោសតាលីបង់នេះគឺជាផ្នែកមួយនៃកិច្ចព្រមព្រៀងសន្ដិភាពលក្ខណៈប្រវត្តិសាស្ត្រដែលសហរដ្ឋអាមេរិកបានចុះហត្ថលេខាជាមួយនឹងក្រុមតាលីបង់កាលពីថ្ងៃសៅរ៍។
លោក Ghani បានថ្លែងនៅក្នុងសន្និសីទសារព័ត៌មានមួយក្នុងទីក្រុងកាប៊ុលថា ការទាមទារឲ្យដោះលែងអ្នកទោសក្រុមឧទ្ទាមនោះមិនអាចជាកិច្ចការត្រូវធ្វើជាមុនសម្រាប់បើកជំនួបប្រជុំសន្ដិភាពផ្ទៃក្នុងរបស់អាហ្វហ្គានីស្ថានជាមួយនឹងក្រុមតាលីបង់នោះទេ។ លោកបានទទូចថា ការទាមទាររបស់ក្រុមឧទ្ទាមអាចនឹងត្រូវបានដាក់បញ្ចូលទៅក្នុងរបៀបវារៈនៃកិច្ចសន្ទនាដែលនឹងធ្វើឡើងក្នុងពេលខាងមុខនេះ។
លោក Ghani ថ្លែងថា៖ «សមត្ថកិច្ចក្នុងការដោះលែងអ្នកទោសគឺអាស្រ័យលើរដ្ឋាភិបាលអាហ្វហ្គានីស្ថានមិនមែនសហរដ្ឋអាមេរិកនោះទេ»។ លោកបានបន្ថែមទៀតថា រដ្ឋាភិបាលរបស់លោកនឹងមិនទទួលយកសម្ពាធលើការដោះដូរអ្នកទោសនោះទេ៕
