ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

គូ​ប្រជែង​នានា​ តេស្ត​សាក​ល្បង​កម្លាំង​យោធា​អាមេរិក នៅ​ពេល​មាន​ការ​រាល​​ដាល​ជា​សាកល​នៃ​មេរោគ​កូរ៉ូណា​


រូបឯកសារ៖ យន្ត​ហោះ​ទម្លាក់​គ្រាប់​បែក​ ប្រភេទ SU-35 និង​ប្រភេទ​ផ្សេង​ទៀត​កំពុង​ហោះ​ហើរ​សម្ដែង​នៅ​ទីក្រុង​ Zhukovsky ប្រទេស​រុស្ស៊ី។

សកម្មភាព​អរិភាព​ជា​បន្ត​បន្ទាប់​ពី​ប្រទេស​អ៊ីរ៉ង់​ រុស្ស៊ី និង​កូរ៉េខាង​ជើង​ បាន​សាក​ ល្បង​កម្លាំង​យោធា​សហរដ្ឋអាមេរិក​នៅ​បរទេស​ជាង​៤៨​ម៉ោង​កន្លង​មក​ នៅ​ពេល​ដែល​សហរដ្ឋ​អាមេរិក​ បន្ត​ប្រយុទ្ធ​ការ​រាលដាល​ជា​សាល​នូវ​មេរោគ​កូរ៉ូណា នៅ​ក្នុង​ប្រទេស​របស់​ខ្លួន។

លោក​ Mark Esper ​រដ្ឋ​មន្រ្តី​ការពារ​ប្រទេស​សហរដ្ឋ​អាមេរិក​ បាន​ប្រាប់​បណ្តាញ​ ទូរទស្សន៍ NBC ក្នុង​កិច្ច​សម្ភាសន៍​កាល​ពី​ថ្ងៃព្រហស្បតិ៍​ថា៖ «យើង​បន្ត​ការ​ការពារ។ ខ្ញុំ​មាន​ទំនុក​ចិត្ត​យ៉ាង​ខ្លាំង​ថា ​យើង ​បាន​ប្រុង​ប្រៀប​ខ្លួន​១០០​ភាគ​រយ​ដើម្បី​ដោះស្រាយ​ការ​គំរាម​កំហែង​នេះ គូ​សត្រូវ​ដែល​មក​ពី​ទីនោះ»។

មន្ទីរ​បច្ចកោណ បាន​ចេញ​វីដេអូ​អំពី​អ្វី​ដែល​ខ្លួន​ បាន​ពណ៌នា​ថា​ជា​ការ​ខិត​មក​ជិត​ម្តង​ហើយ​ម្តង​ទៀត​ប្រកប​ដោយ​គ្រោះ​ថ្នាក់ និង​ការ​រុក​គួន​កាល​ពី​ថ្ងៃ​ពុធ​ដោយ​នាវា​ឆ្មាំ​ការពារ​បដិវត្តន៍​អ៊ីរ៉ង់​ចំនួន​១១​លើក​ឆ្ពោះ​មក​កាន់​នាវា​សហរដ្ឋ​អាមេរិក​ចំនួន​៦​គ្រឿង​នៅ​ក្នុង​ដែន​ទឹក​អន្តរជាតិ​នៅក្នុង​ឈូង​សមុទ្រ​ពែក។ការ​បើក​នាវា​ខិត​មក​ជិត​នេះ​ បាន​ស្ថិត​នៅ​ក្នុង​រង្វង់​១០​ម៉ែត្រ​ពី​នាវា​ឆ្មាំ​ការពារ​ដែល​សមុទ្រ​សហរដ្ឋ​អាមេរិក​ឈ្មោះ ​Cutter Maui។

តាម​កង​នាវា​សហរដ្ឋ​អាមេរិក​ បាន​ប្រាប់​ឲ្យ​ដឹង​ថា ​នៅ​ដែន​អាកាស​អន្តរជាតិ​លើ​ សមុទ្រ​មីឌីទែរ៉ានេ​ យន្តហោះ​ចំបាំង​រុស្ស៊ី​មួយ​គ្រឿង​ធុន​ SU-35​ បាន​ស្ទាក់​យន្តហោះ​ស៊ើប​យក​ការណ៍​ធុន P-8A​ របស់​សហរដ្ឋ​អាមេរិក​ ដែល​កំពុង​ហោះ​ក្នុង​ល្បឿន​យ៉ាង​លឿន។ ក្រុម​អាកាស​យានិក​យន្តហោះ​ធុន​ P-8A​ បាន​រាយការណ៍​ពី​ការ​រំខាន​យាយី​ដែល​មាន​រយៈ​ពេល​ប្រហែល​៤០​នាទី។​

ឧត្តមសេនីយ៍​សហរដ្ឋ​អាមេរិក​លោក ​Tod Wolters​ មេ​បញ្ជាការ​នៃ​ទី​បញ្ជាការ​សហរដ្ឋ​អាមេរិក​និង​អឺរ៉ុប​និង​ជា​អគ្គ​មេ​បញ្ជាការ​កំពូល​សម្ព័ន្ធ​មិត្ត​អឺរ៉ុប​របស់​អង្គការ​អូតង់​ បាន​ពណ៌នា​ការ​ស្ទាក់​យន្តហោះ​ជា​«ការ​អកុសល»​និង​«គ្មាន​វិជ្ជាជីវៈ»។

តាម​ទី​បញ្ជា​អាកាស​របស់​សហរដ្ឋ​អាមេរិក​ បាន​ប្រាប់​ឲ្យ​ដឹង​ថា រុស្ស៊ី​ ក៏​បាន​សាក​ល្បង​កាំជ្រួច​មីស៊ីល​ប្រឆាំង​ផ្កាយរណប​កាល​ពី​ថ្ងៃពុធ​ដែរ។

តាម​យោធា​កូរ៉េខាង​ត្បូង​និង​សហរដ្ឋ​អាមេរិក​ បាន​ប្រាប់​ឲ្យ​ដឹង​ថា​ កាល​ពី​មួយ​ថ្ងៃ​មុន កូរ៉េ​ខាង​ជើង​ បាន​បាញ់​បង្ហោះ​សាក​ល្បង​កាំជ្រួច​មីស៊ីល​វង់​ប្រតិបត្តិការ​ខ្លី​ជាច្រើន​គ្រាប់​ចូល​ក្នុង​សមុទ្រ​ជប៉ុន ប៉ុន្មាន​ម៉ោង​មុន​ការបោះ​ឆ្នោត​តាម​បែប​ប្រជាធិបតេយ្យ​នៅ​ក្នុង​ប្រទេស​កូរ៉េ​ខាង​ត្បូង៕

XS
SM
MD
LG