យុទ្ធនាការសម្លៀកបំពាក់ស្អាតស្អំ (CCC) បាននិយាយថា ចំណែកបានទៅកម្មករដែលក្រុមហ៊ុនAdidas និងក្រុមហ៊ុន Nike ចំណាយឲ្យក្នុងការផលិតស្បែកជើងបានធ្លាក់ចុះចាប់តាំងពីដើមទសវត្សរ៍១៩៩០ ដោយ CCCលើកឡើងអំពីការផ្លាស់ប្តូរផលិតកម្មពីប្រទេសចិនទៅកាន់ប្រទេសដែលមានតម្លៃពលកម្មថោក ដូចជាប្រទេសឥណ្ឌូណេស៊ី។
CCC បាននិយាយក្នុងសេចក្តីថ្លែងការណ៍ថា ចំណែកនៃតម្លៃផលិតកម្មស្បែកជើងម៉ាក Nike និង Adidas បានទៅកម្មករគឺមានការថយចុះ៣០% បើប្រៀបធៀបនឹងចំណែករបស់កម្មករកាលពីដើមទសវត្សរ៍១៩៩០។ ឧទាហរណ៍ក្នុងឆ្នាំ ២០១៧គឺមាន២,៥%សម្រាប់ស្បែកជើងម៉ាក Nike ដែលក្នុងឆ្នាំ១៩៩៥គឺមាន៤%។
CCC បាននិយាយថា ក្រុមហ៊ុនទាំងនេះបានសម្រេចចិត្តចំណាយប្រាក់ទៅលើកីឡាករបាល់ទាត់ជាជាងឱ្យកម្មករដែលកាត់ដេរខោអាវ និងស្បែកជើងកីឡាករទាំងនោះ។
CCC បាននិយាយថា ក្រុមហ៊ុន Adidas និងក្រុមហ៊ុន Nike ដែលឧបត្ថម្ភក្រុមកីឡាបាល់ទាត់ចំនួន២២ក្នុងចំណោម៣២ក្រុមនៅក្នុងការប្រកួតកីឡាបាល់ទាត់នៅក្នុងប្រទេសរុស្ស៊ី ដែលចាប់ផ្តើមនៅសប្តាហ៍នេះ បានផ្លាស់ប្តូរផលិតកម្មរបស់ពួកគេទៅប្រទេសឥណ្ឌូនេស៊ី កម្ពុជានិងវៀតណាមដែលប្រាក់ឈ្នួលមានកម្រិតទាប និងមានការរំលោភសិទ្ធិកម្លាំងពលកម្ម។
សម្ព័ន្ធសកលមួយដែលមានសហជីព កម្មករ និងអង្គការសិទ្ធិមនុស្សបាននិយាយថា ក្នុងប្រទេសទាំងបីនេះប្រាក់ខែជាមធ្យមរបស់កម្មករកាត់ដេរគឺពី៤៥ ទៅ៦៥ ភាគរយទាបជាងអ្វីដែលគេហៅថា «ប្រាក់ឈ្នួលសម្រាប់រស់នៅ» គឺសម្រាប់បំពេញសេចក្តីត្រូវការជាមូលដ្ឋានរបស់គ្រួសារពួកគេ៕
