ពលរដ្ឋខ្មែរជាង១.០០០នាក់គ្រោងនឹងជួបជុំគ្នាដើរជាក្បួនក្នុងរាជធានីភ្នំពេញនៅព្រឹកថ្ងៃសុក្រនេះ ដើម្បីទាមទារឲ្យរដ្ឋាភិបាលលុបចោលកិច្ចព្រមព្រៀងទទួលជនភៀសខ្លួនមកពីប្រទេសអូស្ត្រាលី។ នេះបើតាមសេចក្តីប្រកាសព័ត៌មានរួមមួយរបស់ក្រុមអ្នកតស៊ូមតិចម្រុះគ្នាដែលវីអូអេទទួលបាន។
ក្រុមអ្នកតវ៉ាមានព្រះសង្ឃ និស្សិត ជនរងគ្រោះដោយសារដីធ្លី តំណាងសហជីព និងអង្គការក្រៅរដ្ឋាភិបាលនឹងដាក់ញតិ្តនៅទីស្តីការគណៈរដ្ឋមន្ត្រី សភា ស្ថានទូតអូស្ត្រាលី ស្ថាតទូតសហរដ្ឋអាមេរិក ការិយាល័យអង្គការសហប្រជាជាតិ និងការិយាល័យសហភាពអឺរ៉ុបជាដើម។ ការដាក់ញត្តិនេះគឺមានគោលបំណងស្វះស្វែងរកអន្តរាគមន៍ទាំងក្នុងប្រទេសនិងក្រៅប្រទេសដើម្បីលុបចោលកិច្ចព្រមព្រៀងដែលអូស្ត្រាលីបានចុះហត្ថលេខាកាលពីចុងខែកញ្ញា។
ក្រុមអ្នកតស៊ូមតិទាំងជាតិនិងអន្តរជាតិបាននិយាយក្នុងសេចក្តីប្រកាសព័ត៌មាន ដែរថា កម្ពុជាជាប្រទេសក្រីក្រមួយក្នុងពិភពលោក គ្មានហេដ្ឋារចនាសម្ព័ន្ធនិងសេវាកម្មសាធារណៈគ្រប់គ្រាន់ក្នុងការទទួលជនភៀសខ្លួនចម្រុះជាតិសាសន៍បាននោះទេ។
ក្រុមអ្នកតស៊ូមតិ រួមទាំងអ្នករៀបចំបាតុកម្មម្នាក់គឺលោក ម៉ៅ ពិសេស ដែលជាប្រធានសហព័ន្ធនិស្សិតបញ្ញវ័ន្តកម្ពុជា បានអះអាងទៀតថា កម្ពុជានិងអូស្ត្រាលីបានរំលោភលើសិទ្ធិជនភៀសខ្លួន សិទ្ធិមនុស្ស ហើយនឹងកាតព្វកិច្ចអន្តរជាតិស្តីពីជនភៀសខ្លួនផងដែរ៕
