ស្រ្តីម្នាក់ដែលត្រូវបានចោទប្រកាន់ថា មានទំនាក់ទំនងស្នេហាជាមួយព្រះអង្គ លួន សុវ៉ាត សកម្មជនសង្ឃល្បីឈ្មោះ បានចេញមុខដាក់ពាក្យបណ្តឹងថា នាងមិនមានទំនាក់ទំនងស្នេហាជាមួយព្រះអង្គនោះទេហើយថា ជនមិនស្គាល់អត្តសញ្ញាណបានបង្កើតហ្វេសប៊ុកដាក់ឈ្មោះហៅក្រៅរបស់កញ្ញា។
ស្រ្តីម្នាក់នោះមានឈ្មោះ ទឹម រដ្ឋា ហៅក្រៅថា ស្រីដា អាយុ៣០ឆ្នាំ ជាអ្នករស់នៅក្នុងភូមិអន្លង់ត្នោត ឃុំជីក្រែង ស្រុកជីក្រែង ខេត្តសៀមរាប ដែលមានផ្ទះនៅទល់មុខវត្តស្លែង ដែលព្រះអង្គ លួន សុវ៉ាតធ្លាប់គង់នៅ។
ក្នុងពាក្យបណ្តឹង ចុះថ្ងៃទី១៩ ខែមិថុនា ដែល VOA ទទួលបាន កញ្ញា ទឹម រដ្ឋា ដែលមានបងប្អូនស្រី៣នាក់ទៀតលើកឡើងថា ជនអនាមិកបង្កើតទំព័រហ្វេសប៊ុកក្លែងក្លាយឈ្មោះ Srey Da Chi-Kraeng ដែលបង្ហោះវីដេអូ៤ឃ្លីប ដែលក្នុងនោះមានរូបកញ្ញា បងប្អូនស្រីនិងម្តាយ។ ក្នុងវីដេអូនោះបងប្អូនស្រី និងម្តាយ ត្រូវបានចោទប្រកាន់ថា សន្ទនាស្នេហាជាមួយព្រះអង្គ លួន សុវ៉ាត ដែលព្រះអង្គបានបដិសេធដូចគ្នា។
ពាក្យបណ្តឹងដែលបង្ហោះទៅហ្វេសប៊ុករបស់រដ្ឋមន្រ្តីក្រសួងមហាផ្ទៃលោក ស ខេង ឲ្យដឹងថា៖
«ទាំងបងប្អូនខ្ញុំ៤នាក់ និងម្តាយត្រូវបានគេលួចយករូបថតទៅដាក់ក្នុងផេក រួមទាំងកាត់តសំឡេងធ្វើជាវីដេអូឃ្លីបនិយាយសាសងជាមួយព្រះសង្ឃបែបលេបខាយស្នេហា។ កត្តានេះធ្វើឲ្យខូចកិត្តិយសធ្ងន់ធ្ងរដល់នាងខ្ញុំនិងសមាជិកគ្រួសារទាំងអស់ ព្រមទាំងមានការរើសអើងនៅក្នុងភូមិ និងទីកន្លែងធ្វើការ»។
កញ្ញា ទឹម រដ្ឋា ថ្លែងប្រាប់ VOA នៅថ្ងៃអង្គារនេះថា វីដេអូដែលបង្ហោះលើទំព័រហ្វេសប៊ុកនោះមានរូបកញ្ញាបងប្អូននិងម្តាយបង្កើត។ កញ្ញាបន្តថា នេះជាការកាត់តសំឡេងបញ្ចូលគ្នា បង្កើតជាសាច់រឿង ដែលកញ្ញាថា មិនបានដឹងរឿងនេះទាល់តែសោះ។
កញ្ញាបញ្ជាក់ថា៖ «ខ្ញុំអត់បានប្រព្រឹត្ត។ ចង់និយាយថា បួនប្រាំនាក់(គ្រួសារ) គេចងទៅទាំង៥អ៊ីចឹង។អ៊ីចឹងអាគ្នាមិនបានធ្វើវាជាប់ទៅអ៊ីចឹងដែរ។ អ៊ីចឹងវាធ្វើឲ្យប៉ះពាល់កិត្តិយស។ វាធ្វើឲ្យប៉ះពាល់ផ្លូវចិត្តយើងទៀត»។
កញ្ញាបានបដិសេធថា កញ្ញាមិនមានទំនាក់ទំនងស្នេហាអ្វីជាមួយព្រះអង្គ លួន សុវ៉ាត នោះទេបើទោះជាផ្ទះនៅជិតវត្តព្រះអង្គគង់នៅ និងធ្លាប់ស្គាល់ព្រះអង្គក៏ដោយ។ កញ្ញាបន្ថែមថា មានគេចង់ធ្វើបាបព្រះអង្គ។
កញ្ញាបន្តថា៖ «ខ្ញុំអត់មានទំនាក់ទំនង(ស្នេហា)ជាមួយគាត់ផង គ្រាន់តែស្គាល់ ដោយសារលោក(គង់នៅ)វត្តនៅទល់មុខផ្ទះរបស់ខ្ញុំ»។
កញ្ញាបដិសេធមិនបកស្រាយបន្ត ដោយចង់រក្សាភាពស្ងៀមស្ងាត់និងទុកឲ្យសមត្ថកិច្ចចាត់ការស្វែងរកអ្នកបង្កើតទំព័រហ្វេសប៊ុកនេះ។
វីដេអូយ៉ាងតិចចំនួន៤ ដែលមានការចោទប្រកាន់ថា ជាសំឡេងរបស់ព្រះអង្គ លួន សុវ៉ាត ត្រូវបានបង្ហោះលើទំព័រហ្វេសប៊ុកមួយឈ្មោះ Srey Da Chi-Kraeng។ នេះជាទំព័រហ្វេសប៊ុកដែលទើបត្រូវបានបង្កើតឡើង កាលពីថ្ងៃទី ៣០ ខែឧសភា ឆ្នាំ២០២០នេះ ដែលមានអ្នកចុច Likes ទៅដល់ជាង ១ពាន់នាក់។
វីដេអូមួយក្នុងចំណោមវីដេអូផ្សេងទៀត ដែលមានរយៈពេលជាង៧នាទី ជាវីដេអូថតចេញពីការហៅសន្ទនាគ្នាតាមប្រព័ន្ធសង្គមហ្វេសប៊ុក ដែលមានឈ្មោះជាភាសាខ្មែរ «លួន សុវ៉ាត»។ ការសន្ទនាគ្នានេះមាននិយាយទាក់ទងនឹងស្នេហា ការប្រើប្រាស់ពាក្យពេចន៍ដូចជាម៉ាស្សា ឈឺខ្នង ឈឺចង្កេះនិងការហៅមកជួបគ្នាផងដែរ។ ចាប់តាំងពីថ្ងៃទី៤ខែមិថុនាមក ទំព័រហ្វេសប៊ុក Srey Da Chi-Kraeng មិនមានបង្ហោះសារអ្វីទៀតនោះទេ។
ចំពេលមានការចោទប្រកាន់រឿងសន្ទនាស្នេហា រហូតដល់មានការផ្សឹក ព្រះអង្គព្រះអង្គ លួន សុវ៉ាត នោះ សកម្មជនសង្ឃល្បីឈ្មោះនេះ កំពុងត្រូវបានតុលាការខេត្តសៀមរាបសង្ស័យថា បានប្រព្រឹត្តបទល្មើស«រំលោភសេពសន្ថវៈ»។
លោក ជួន សុបញ្ញា អ្នកនាំពាក្យតុលាការខេត្តសៀមរាប បានប្រាប់ VOA នៅថ្ងៃអង្គារនេះថាតុលាការបានទទួលពាក្យបណ្តឹងរបស់ជនរងគ្រោះ ទាក់ទងនឹងការសង្ស័យ «បទល្មើសរំលោភសេពសន្ថវៈ»។ លោកបន្តថា តុលាការកំពុងតែបន្តការស៊ើបអង្កេតករណីនេះ បន្ទាប់ពីការចុះឆែកឆេរផ្ទះរបស់ព្រះអង្គ។
ប៉ុន្តែ អ្នកនាំពាក្យតុលាការរូបនោះមិនអាចបញ្ជាក់ថា តើជាបណ្តឹងរបស់អ្នកណា? មានប៉ុន្មាននាក់?និងពាក់ព័ន្ធនឹងវីដេអូ ដែលមានការចោទប្រកាន់រឿងសន្ទនាស្នេហាជាមួយព្រះអង្គ លួន សុវ៉ាត ឬយ៉ាងណាទេ។
នៅពេលសួរទាក់ទងនឹងការបង្ហោះហ្វេសប៊ុករបស់ស្រ្តីម្នាក់ ដែលបានបដិសេធថា មិនមានទំនាក់ទំនងស្នេហាជាមួយព្រះអង្គ លួន សុវ៉ាត លោក ជួន សុបញ្ញា មានប្រសាសន៍ថា៖
«លោកថា ស្រ្តីហ្នឹងជាអ្នកប្តឹងមិនប្តឹងយ៉ាងម៉េច ខ្ញុំអត់បានដឹងអំពីបញ្ហាហ្នឹងទេ។ ខ្ញុំអាចឆ្លើយជាមួយលោកបញ្ហាមួយចំនួនដែលមិនពាក់ព័ន្ធនឹងការសម្ងាត់ក្នុងការស៊ើបអង្កេត»។
លោកស្រី ដួង ថាវរី ស្នងការរងនគរបាលខេត្តសៀមរាបទទួលបន្ទុកផ្នែកប្រឆាំងការជួញដូរមនុស្សនិងការពារអនីតិជន មានប្រសាសន៍ថា ប្អូនស្រីម្នាក់ក្នុងចំណោមបងប្អូនទាំង៤នាក់របស់ស្រ្តីខាងលើ បានប្តឹងព្រះអង្គ លួន សុវ៉ាត ពីបទរំលោភសេពសន្ថវៈ ក្រោយសមត្ថកិច្ចបានចុះទៅតាមដានរឿងចោទប្រកាន់ព្រះអង្គពីបទសន្ទនាស្នេហា។
នៅពេលសួរថា តើមូលហេតុអ្វីបានជាស្រ្តីម្នាក់នោះទើបប្តឹងពេលសមត្ថកិច្ចចុះទៅស្រាវជ្រាវលោកស្រីបញ្ជាក់ថា ដោយសារតែគាត់ចង់រក្សាការសម្ងាត់ពីមុនមក។
លោកស្រីបញ្ជាក់ថា៖ «គាត់ចង់ប្តឹង បានគាត់ដាក់បណ្តឹង។ មិនមែនយើងបង្ខំគាត់ឯណា។ ដល់ពេលយើងសាកសួរទៅ គាត់ថាគាត់ចង់ប្តឹង។កាលលើកមុន គាត់ថា គាត់អត់ចង់ប្តឹង។ គាត់ថា ជារឿងសម្ងាត់។ គាត់លាក់អ៊ីចឹងទៅ។ អ៊ីចឹងដល់ទៅបែកធ្លាយចេញឃ្លីបវីដេអូ មកបរិហារកេរ្តិ៍គាត់ អ៊ីចឹង គាត់ដាក់បណ្តឹងតែម្តង»។
លោកស្រី ដួង ថាវរី បានបដិសេធមិនអត្ថាធិប្បាយលម្អិតអំពីហេតុផលនៃការចោទប្រកាន់ពីបទរំលោភសេពសន្ថវៈនោះទេ។ អ្នកស្រីបកស្រាយថា នេះជាការស៊ើបអង្កេតរបស់ប៉ូលិស ហើយថា មានធាតុផ្សំគ្រប់គ្រាន់នៃបទល្មើសរំលោភសេពសន្ថវៈ ទើបបញ្ជូនសំណុំរឿងទៅតុលាការ។
លោក អំ សំអាត នាយករងទទួលបន្ទុកឃ្លាំមើលសិទ្ធិមនុស្សនៃអង្គការលីកាដូ បង្ហាញការសង្ស័យព្រោះថា ដំបូងឡើយ ជាការចោទប្រកាន់រឿងទំនាក់ទំនងស្នេហាដែលខុសនឹងវិន័យព្រះពុទ្ធសាសនា ប៉ុន្តែបន្ទាប់មកបែរជាមានការចោទប្រកាន់ពីបទសេពសន្ថវៈទៅវិញ។ លោកបន្តថា គួរតែមានការស៊ើបអង្កេតឲ្យច្បាស់លាស់ ដោយភាគីទាំងសងខាងបានបដិសេធសារវីដេអូបង្ហោះលើទំព័រហ្វេសប៊ុកនោះ។ លោកបន្តថា ការចោទប្រកាន់អំពើ «សេពសន្ថវៈ» ជារឿងមួយដែល «អាចងាយនឹងកើតឡើង»។
លោកមានប្រសាសន៍ថា៖ «ហើយទាក់ទងទៅនឹងការចោទប្រកាន់រំលោភសេពសន្ថវៈ វាជារឿងងាយមួយ ហើយបទរំលោភសេពសន្ថវៈ វាជាបទឧក្រិដ្ឋទៅទៀត!»
ក្រមព្រហ្មទណ្ឌកម្ពុជា មាត្រា ២៣៩ ចែងថា បទល្មើសរំលោភសេពសន្ថវៈជាការរួមភេទដោយការប្រើហិង្សា ការបង្ខិតបង្ខំ ការគំរាមកំហែងជាដើម។ បទរំលោភសេពសន្ថវៈនេះត្រូវផ្តន្ទាទោសជាប់ពន្ធនាគារពី៥ឆ្នាំទៅ១០ឆ្នាំ។
ព្រះអង្គ លួន សុវ៉ាត ធ្លាប់មានសង្ឃដីកាប្រាប់ VOA កាលពីកន្លងទៅថា នេះជាការបង្កើតគណនីហ្វេសប៊ុកក្លែងក្លាយ ហើយជាការយកសំឡេងមកកាត់តបញ្ចូលគ្នា។ ព្រះអង្គបន្តថា ព្រះអង្គមិនបានសរសេរ ឬក៏មិនបានហៅទៅអ្នកណាទេ តាមហ្វេសប៊ុកពិតរបស់ព្រះអង្គ។
កាលពីឆ្នាំ២០១២ ព្រះតេជគុណ លួន សុវ៉ាត បានទទួលរង្វាន់អ្នកការពារសិទ្ធិមនុស្សអន្តរជាតិ ឈ្មោះ Martin Ennels Award ដ៏ល្បីនៅទីក្រុងហ្សឺណែវ ប្រទេសស្វីស។
ព្រះអង្គធ្លាប់ចេញព្រះភក្ត្រនៅកន្លែងតវ៉ានានា ពាក់ព័ន្ធនឹងជម្លោះដីធ្លី និងការទាមទាររកយុត្តិធម៌ផ្សេងៗ។ ព្រះអង្គតែងតែប្រើប្រាស់ទូរស័ព្ទដៃ ដើម្បីថតនិងផ្សាយផ្ទាល់តាមរយៈទំព័រហ្វេសប៊ុករបស់ព្រះអង្គ ដែលមានអ្នកចុច Likes រហូតទៅដល់ជាង១០ម៉ឺននាក់៕
