សកម្មជនសង្ឃល្បីឈ្មោះ គឺព្រះអង្គ លួន សុវ៉ាត ដែលរងការចោទប្រកាន់ថា សន្ទនាស្នេហាជាមួយមនុស្សស្រីមួយចំនួន ត្រូវបានតុលាការខេត្តសៀមរាបសង្ស័យថា បានប្រព្រឹត្តបទល្មើស«រំលោភសេពសន្ថវៈ» ខណៈកម្លាំងសមត្ថកិច្ចកំពុងតាមចាប់ព្រះកាយព្រះអង្គ។
ព្រះអង្គក៏ត្រូវបានបង្ខំឲ្យផ្សឹកដោយព្រះមេគណខេត្តសៀមរាបផងដែរ។ ក្រោយការបង្ខំឲ្យផ្សឹក សមត្ថកិច្ចក៏បានចុះឆែកឆេរផ្ទះរបស់ព្រះអង្គ និងរឹបអូសយកវត្ថុតាងមួយចំនួន។
នៅថ្ងៃសុក្រនេះ លោក ជួន សុបញ្ញា អ្នកនាំពាក្យរបស់តុលាការខេត្តសៀមរាប បានប្រាប់ VOA ថា តុលាការបានទទួលពាក្យបណ្តឹងរបស់ជនរងគ្រោះ ទាក់ទងនឹងការសង្ស័យ «បទល្មើសរំលោភសេពសន្ថវៈ»។ លោកបន្តថា ការចុះឆែកឆេរផ្ទះរបស់ព្រះអង្គ គឺជាការស៊ើបអង្កេតបឋមពាក់ព័ន្ធនឹងពាក្យបណ្តឹងនេះ។
លោកមានប្រសាសន៍ថា៖ «ការឆែកឆេរ គឺមានការឆែកឆេរ ហើយមានដីកាពីតុលាការ។ យើងសង្ស័យពីបទល្មើសរំលោភសេពសន្ថវៈ ដោយសារយើងមានបណ្តឹង»។
ប៉ុន្តែលោកមិនអាចបញ្ជាក់ថា តើជាបណ្តឹងរបស់អ្នកណាមានប៉ុន្មាននាក់ និងពាក់ព័ន្ធនឹងវីដេអូដែលមានការចោទប្រកាន់ថា សន្ទនាស្នេហាជាមួយព្រះអង្គ លួន សុវ៉ាត ឬយ៉ាងណាទេ។
លោកមានប្រសាសន៍ថា៖ «លោកគួរតែយល់ ដីកានាំខ្លួន ដីកាចាប់ខ្លួនអី បើយើងផ្សព្វផ្សាយថា បានចេញមិនចេញអី។ ជាទូទៅ ជនដែលជាប់ពាក់ព័ន្ធដឹងបញ្ហាហ្នឹង គឺនឹងប៉ះពាល់ដល់ការស៊ើបអង្កេតភ្លាម។ គាត់អាចគេចខ្លួន ដូចខ្ញុំជម្រាបលោកអ៊ីចឹង។ លោកអត់គួរដេញដោលអំពីបញ្ហានេះទេ។ វាពាក់ព័ន្ធការសម្ងាត់ វិជ្ជាជីវៈ ពាក់ព័ន្ធនឹងការស៊ើបអង្កេតរបស់តុលាការ»។
ស្នងការនៃស្នងការដ្ឋាននគរបាលខេត្តសៀមរាប លោក ទិត្យ ណារ៉ុង មានប្រសាសន៍នៅថ្ងៃសុក្រនេះថា ការចុះឆែកឆែរផ្ទះ និងតាមចាប់ព្រះអង្គ លួន សុវ៉ាត គឺទាក់ទងនឹងសារសំឡេងតាមប្រព័ន្ធសង្គមហ្វេសប៊ុក និងពាក្យបណ្តឹងរបស់ជនរងគ្រោះ។
លោកបញ្ជាក់ថា៖ «អនុវត្តទៅតាមដីកាគឺ នាំខ្លួនចូលទៅតុលាការ»។
ប៉ុន្តែការអះអាងរបស់លោក ទិត្យ ណារ៉ុង នៅថ្ងៃសុក្រនេះ ខុសពីការអះអាងកាលពីថ្ងៃពុធ ដែលថា ព្រះអង្គ លួន សុវ៉ាត មិនបានប្រព្រឹត្តបទល្មើសអ្វីនោះទេ។
លោកមានប្រសាសន៍កាលនោះថា៖ «អត់មានប្រព្រឹត្តអីខុសទេ ព្រោះវាទាក់ទងគេបង្ហោះហ្វេសប៊ុករបស់លោក ហើយលោកបានគេចព្រះកាយព្រះអីចេញទៅ»។
ព្រះអង្គ លួន សុវ៉ាត មានសង្ឃដីកាប្រាប់ VOA នៅថ្ងៃសុក្រនេះថា នេះជាការបង្កើតគណនីហ្វេសប៊ុកក្លែងក្លាយ ហើយជាការយកសំឡេងមកកាត់តបញ្ចូលគ្នា។ ព្រះអង្គបន្តថា ព្រះអង្គមិនបានសរសេរ ឬក៏មិនបានហៅទៅអ្នកណាទេ តាមហ្វេសប៊ុកពិតរបស់ព្រះអង្គ។
ព្រះអង្គមានសង្ឃដីកាបន្ថែមថា ព្រះអង្គចង់រក្សាភាពស្ងៀមស្ងាត់លើបញ្ហានេះ។
ព្រះអង្គប្រាប់ VOA តាមប្រព័ន្ធសង្គមហ្វេសប៊ុកថា៖ «ស្ងៀមស្ងាត់ឆាប់ចប់រឿង។ ត្រង់គេចោទអីក៏ចោទទៅ ស្រេចតែគេថា ព្រោះអំណាចបក្ខពួកក្រុមគេរៀបចំ ធំដុំណាស់។ យើងទៅតទល់នឹងគេមិនអាចឈ្នះគេទេ កាន់តែតទល់ កាន់តែបកស្រាយ កាន់តែផ្សាយល្បី រឿងកាន់តែវែងឆ្ងាយ»។
ក្រមព្រហ្មទណ្ឌកម្ពុជា មាត្រា ២៣៩ ចែងថា បទល្មើសរំលោភជាការរួមភេទដោយការប្រើហិង្សា ការបង្ខិតបង្ខំ ការគំរាមកំហែងជាដើម។ បទរំលោភសេពសន្ថវៈនេះត្រូវផ្តន្ទាទោសជាប់ពន្ធនាគារពី ៥ ឆ្នាំទៅ ១០ ឆ្នាំ។
ព្រះអង្គ បូរ បេត ដែលជាសមាជិកនៃបណ្តាញព្រះសង្ឃឯករាជ្យដើម្បីយុត្តិធម៌សង្គម ដែលស្គាល់ព្រះអង្គ លួន សុវ៉ាត មានសង្ឃដីកានៅថ្ងៃសុក្រនេះថា ព្រះអង្គមិនជឿថា ព្រះអង្គ លួន សុវ៉ាតប្រព្រឹត្តបែបនេះទេ។ ព្រះអង្គសង្ស័យថា មានភាពមិនប្រក្រតី ដោយព្រះអង្គមានសង្ឃដីកាថា វីដេអូបង្ហោះតាមហ្វេសប៊ុកជាវីដេអូក្លែងក្លាយ និងកាត់តតែប៉ុណ្ណោះ ដូចករណីកើតឡើងចំពោះមេដឹកនាំគណបក្សប្រឆាំងកាលពីកន្លងទៅ។
ព្រះអង្គមានសង្ឃដីកាថា៖ «អាត្មាអត់ជឿថា លោកគ្រូ នួន សុវ៉ាត លោកទៅប្រព្រឹត្តអំពើអនាចារអ៊ីចឹងទេ ព្រោះព្រះសង្ឃជាមនុស្សមួយដែលមុតមាំ។ ព្រះអង្គលោកក៏ជាអ្នកចេះដឹងធម៌វិន័យក៏ច្រើនដែរ។ ហើយលោកក៏មិនមែនទើបបួសមួយថ្ងៃពីរថ្ងៃ។ លោកបួសរាប់ឆ្នាំមកហើយ។ វាមានរឿងអីផ្សេង អាថ៌កំបាំង។ គេចង់ធ្វើបាបលោកហើយ»។
វីដេអូយ៉ាងតិចចំនួន ៤ ដែលមានការចោទប្រកាន់ថាជាសំឡេងរបស់ព្រះអង្គ លួន សុវ៉ាត ត្រូវបានបង្ហោះលើទំព័រហ្វេសប៊ុកមួយឈ្មោះ Srey Da Chi-Kraeng។ នេះជាទំព័រហ្វេសប៊ុកដែលទើបត្រូវបានបង្កើតឡើង កាលពីថ្ងៃទី ៣០ ខែឧសភា ឆ្នាំ២០២០នេះ មានអ្នកចុច Likes ទៅដល់ជាង ១ពាន់នាក់។
វីដេអូមួយក្នុងចំណោមវីដេអូផ្សេងទៀត ដែលមានរយៈពេលជាង ៧នាទី ជាវីដេអូថតចេញពីការហៅសន្ទនាគ្នាតាមប្រព័ន្ធសង្គមហ្វេសប៊ុក ដែលមានឈ្មោះជាភាសាខ្មែរ «លួន សុវ៉ាត»។ ការសន្ទនាគ្នានេះមាននិយាយទាក់ទងនឹងស្នេហា ការប្រើប្រាស់ពាក្យពេចន៍ដូចជាម៉ាស្សា ឈឺខ្នង ឈឺចង្កេះនិងការហៅមកជួបគ្នាផងដែរ។
តាមការស្រាវជ្រាវរបស់ VOA ស្រ្តីម្នាក់ដែលមានរូបថតរបស់នាងនិងក្រុមគ្រួសារដាក់បញ្ចូលក្នុងវីដេអូពាក់ព័ន្ធនឹងព្រះអង្គ លួន សុវ៉ាត បានសរសេរថា ម្ចាស់ទំព័រហ្វេសប៊ុកឈ្មោះ Srey Da Chi Kraeng ជាជនខិលខូចបង្កើតរឿងនេះ ដើម្បីធ្វើបាបគ្រួសាររបស់អ្នកនាង។ កាលពីថ្ងៃទី ២ ខែមិថុនា ម្ចាស់ហ្វេសប៊ុកនោះក៏បានបង្ហោះសារថា «បងប្អូនស្រីខ្ញុំ ៤ នាក់ និងម៉ែមួយ មិនបានប្រព្រឹត្តខុសឆ្គងជាមួយព្រះសង្ឃ លួន សុវ៉ាត ដូចការចុះផ្សាយព័ត៌មានមួយចំនួនឡើយ។ សូមវិភាគទាំងអស់គ្នាទៅ»។
បើតាមព្រះអង្គ លួន សុវ៉ាត ក្រោយថ្ងៃចេញសេចក្តីសម្រេចឲ្យចាប់ផ្សឹកព្រះអង្គ ប៉ូលិសខេត្តសៀមរាបបានចុះទៅឆែកឆេរផ្ទះព្រះអង្គ និងរឹបអូសទ្រព្យសម្បត្តិមួយចំនួនផងដែរ។
ព្រះអង្គមានសង្ឃដីកាថា សមត្ថកិច្ចបាននាំខ្លួនក្មួយប្រុសរបស់ព្រះអង្គ ២ នាក់ ទៅសាកសួរនៅស្នងការខេត្ត ហើយវាយខ្នោះដៃ និងឃុំខ្លួនក្មួយម្នាក់ ១ យប់ ២ ថ្ងៃ ទើបមានការដោះលែង។ ព្រះអង្គបន្តថា ក្រុមប៉ូលិសក៏បានឆែកឆេរផ្ទះ និងរឹបអូសទ្រព្យសម្បត្តិឯកជន នៅភូមិកំណើតក្នុងឃុំជីក្រែង ស្រុកជីក្រែង ខេត្តសៀមរាប កាលពីថ្ងៃ ៧ ខែមិថុនា ដោយដកហូតទូរស័ព្ទ រថយន្ត Lexus 470 មួយគ្រឿង កាមេរ៉ាជិត ១០ គ្រឿង ទូរទស្សន៍ ១ គ្រឿង ទូរទឹកកក ធុងទឹកកក និងឯកសារមួយចំនួនទៀត។ ព្រះអង្គបន្ថែមថា ទ្រព្យសម្បត្តិដែលដកហូតរក្សាទុក មិនទាន់ប្រគល់ឲ្យវិញទេ។
កាលពីឆ្នាំ ២០១២ ព្រះតេជគុណ លួន សុវ៉ាត បានទទួលរង្វាន់អ្នកការពារសិទ្ធិមនុស្សអន្តរជាតិ ឈ្មោះ Martin Ennels Award ដ៏ល្បីនៅទីក្រុងហ្សឺណែវ ប្រទេសស្វីស។ ព្រះអង្គធ្លាប់ចេញព្រះភក្ត្រនៅកន្លែងតវ៉ានានា ពាក់ព័ន្ធនឹងជម្លោះដីធ្លី និងការទាមទាររកយុត្តិធម៌ផ្សេងៗ។ ព្រះអង្គតែងតែប្រើប្រាស់ទូរស័ព្ទដៃ ដើម្បីថតនិងផ្សាយផ្ទាល់តាមរយៈទំព័រហ្វេសប៊ុករបស់ព្រះអង្គ ដែលមានអ្នកចុច Likes រហូតទៅដល់ជាង ១០ ម៉ឺននាក់៕
