មន្ត្រីជាន់ខ្ពស់មួយរូបនៃសហភាពអឺរ៉ុបបានទៅដល់ប្រទេសស៊ីបហើយនៅថ្ងៃសុក្រនេះ ដើម្បីត្រួតពិនិត្យមើលការរៀបចំបញ្ជូនជំនួយ ដែលត្រូវការចាំបាច់តាមសមុទ្រ ទៅឱ្យតំបន់ហ្កាហ្សា ដែលកំពុងរងការបំផ្លិចបំផ្លាញដោយសារសង្គ្រាម គឺតែប៉ុន្មានម៉ោងប៉ុណ្ណោះ បន្ទាប់ពីប្រធានាធិបតីសហរដ្ឋអាមេរិក លោក Joe Biden បានប្រកាសថា យោធាសហរដ្ឋអាមេរិក នឹងរៀបចំបង្កើតកំពង់ផែបណ្តោះអាសន្នមួយនៅឆ្នេរសមុទ្រមែឌីទែរ៉ាណេ ដែលនៅមិនឆា្ងយប៉ុន្មានពីតំបន់ហ្កាហ្សានោះឡើយ ដើម្បីគាំទ្រដល់ការផ្តល់ជំនួយសង្គ្រោះ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
កិច្ចប្រឹងប្រែងខ្លាំងដើម្បីបង្កើនការផ្តល់ជំនួយនេះ ជាសញ្ញាបង្ហាញពីការមិនសប្បាយចិត្តកាន់តែខ្លាំងឡើងៗនៅក្នុងសហរដ្ឋអាមេរិកនិងអឺរ៉ុប លើសកម្មភាពសង្គ្រាមរបស់អ៊ីស្រាអែល នៅក្នុងតំបន់ហ្កាហ្សា។
ការប្រកាសរបស់លោក Biden ក្នុងផែនការបង្កើតកំពង់ផែសមុទ្រមួយ ជាការបង្ហាញពីរបៀបដែលសហរដ្ឋអាមេរិកអាចធ្វើការងារដោយមិនចាំបាច់ឆ្លងកាត់អ៊ីស្រាអែល ដែលជាដៃគូសម្ព័ន្ធមិត្តដ៏សំខាន់មួយរបស់ខ្លួនក្នុងតំបន់មជ្ឈិមបូព៌ា និងជាអ្នកដែលទទួលជំនួយយោធាលើសគេពីសហរដ្ឋអាមេរិកផងដែរ ក្នុងគោលបំណងដើម្បីផ្តល់ជំនួយទៅកាន់តំបន់ហ្កាហ្សា។
កិច្ចប្រឹងប្រែងក្នុងការបង្កើតផ្លូវដឹកជំនួយតាមសមុទ្រមួយ ដើម្បីដឹកជញ្ជូនជំនួយទៅឱ្យតំបន់ហ្កាហ្សានេះ កើតមានឡើង ក្នុងពេលដែលមានការព្រមានកាន់តែច្រើនឡើងពីការរីករាលដាលនៃភាពអត់ឃ្លានកាន់តែខ្លាំងឡើង នៅក្នុងចំណោមពលរដ្ឋប៉ាឡេស្ទីនប្រមាណ ២លាន ៣សែននាក់ ដែលកំពុងរស់នៅក្នុងតំបន់ហ្កាហ្សា។ ភាពអត់ឃ្លានកំពុងកើតមានឡើងខ្លាំងនៅភាគខាងជើងតំបន់ហ្កាហ្សា ដែលត្រូវបានកម្លាំងអ៊ីស្រាអែលទុកឱ្យនៅដាច់ពីគេអស់រយៈពេលជាច្រើនខែកន្លងទៅហើយ និងទទួលរងការឈឺចាប់ជាខ្លាំង ដោយកាត់ផ្តាច់ការផ្តល់ជំនួយស្បៀងអាហារទៅក្នុងតំបន់នោះ។
បន្ទាប់ពីមានការព្រមានជាច្រើនខែកន្លងទៅពីហានិភ័យនៃការកើតមានគ្រោះទុរភិក្សមួយក្នុងតំបន់ហ្កាហ្សា ក្រោមការទម្លាក់គ្រាប់បែក ការឡោមព័ទ្ធនិងការវាយប្រហាររបស់កងទ័ពអ៊ីស្រាអែល នោះ ក្រុមវេជ្ជបណ្ឌិតក្នុងមន្ទីរពេទ្យបានរាយការណ៍ពីការស្លាប់ចំនួន ២០ ករណី ដោយសារខ្វះអាហារូបត្ថម្ភ នៅក្នុងមន្ទីរពេទ្យ២កន្លែងនៅក្នុងតំបន់ហ្កាហ្សាភាគខាងជើង។
ខណៈគូសបញ្ជាក់ឡើងវិញពីការគាំទ្រដល់ប្រទេសអ៊ីស្រាអែល លោក Biden បានប្រើសុន្ទរកថាប្រចាំឆ្នាំរបស់លោកកាលពីយប់ថ្ងៃព្រហស្បតិ៍ ដើម្បីបញ្ជាក់ពីការទាមទារជាថ្មីម្តងទៀតថា នាយករដ្ឋមន្ត្រីអ៊ីស្រាអែលលោក Benjamin Netanyahu ត្រូវអនុញ្ញាតឱ្យដឹកជញ្ជូនជំនួយបន្ថែមទៀតទៅក្នុងតំបន់ហ្កាហ្សា៕
វេទិកាបញ្ចេញមតិ