ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប៉ូលិស​រក​ឃើញ​ករណី​ភ្លើង​ឆេះ​ផ្ទះ​ក្នុង​ខេត្ត​កំពង់​ឆ្នាំង​ស្លាប់​មនុស្ស​ ៥ ​នាក់ ​ជា​ឃាត​កម្ម​សម្លាប់​ភរិយា​និង​កូន


សកម្មភាពពន្លត់អគ្គីភ័យរបស់ស្នងការនគរបាលខេត្តកំពង់ឆ្នាំងនៅគេហដ្ឋាននៃករណីឃាតកម្មមួយនៅស្រុកបរិបូរណ៌ ខេត្តកំពង់ឆ្នាំង នាថ្ងៃទី ៩ ខែឧសភា ឆ្នាំ ២០២១។ (រូបថត៖ Child Protection Unit)

ភាព​សោក​សង្រេង​នៃ​ករណី​ភ្លើង​ឆេះ​ផ្ទះ​បណ្តាល​ឲ្យ​មនុស្ស​ ៥ ​នាក់​ស្លាប់​ បាន​ប្រែ​ក្លាយ​ជា​ការ​ថ្កោល​ទោស​មួយ​ទៅ​លើ​បុរស​ដែល​ជា​ស្វាមី​និង​ឪពុក។​

កាល​ពី​ថ្ងៃ​អាទិត្យ​សប្តាហ៍​មុន គឺ​នៅ​ម៉ោង​ជាង ​៨ ​យប់​ថ្ងៃ​ទី ៩ ខែ​ឧសភា ​មាន​ករណី​ភ្លើង​ឆេះ​ផ្ទះ ដែល​នៅ​ឆ្ងាយ​ពី​គេ​ឯង ​ក្នុង​ភូមិ​ដើម​ជ្រែ ឃុំ​ខុនរ៉ង​ស្រុក​បរិបូណ៌ ខេត្ត​កំពង់​ឆ្នាំង។​ នគរបាល​ខេត្ត​កំពង់​ឆ្នាំង​បាន​ជួយ​ពន្លត់​ភ្លើង​ឆេះ​ផ្ទះ​នេះ ដោយ​ប្រើ​ទឹក​អស់ ​៣ ​រថយន្ត​។ ​ដំបូង​ឡើយ​នគរបាលខេត្តបានចាត់​ទុក​ជា​ករណី​ឆ្លង​ចរន្ត​អគ្គិសនី ​ក្រោយ​ពីសាក​សួរ​បុរស​ដែល​ជា​ស្វាមី និង​ជា​ឪពុក​របស់​ជន​រង​គ្រោះ។​

អគ្គីភ័យ​នេះ​បានឆាប​ឆេះ​ផ្ទះ​មួយ​ខ្នង​ ទំហំ ​៧ ​ម៉ែត្រ​ គុណ​ ១២ ​ម៉ែត្រ​ សង់​ពី​ដែក​បាំង​និង​ប្រក់​ស័ង្កសី​ បណ្តាល​ឲ្យ​ម្តាយ​និង​កូន​ប្រុស​ ៤ ​នាក់ ​អាយុ​ចន្លោះ​ពី ​៣ ​ឆ្នាំ​ ទៅ​ ៩ ​ឆ្នាំ​ស្លាប់។​

ដោយ​សង្ស័យ​ថាហេតុ​អ្វី​បាន​ជា​ស្វាមី​មិន​អាច​ជួយ​កូន​ខ្លួន​ឯង​បាន ​សូម្បី​តែ​ម្នាក់​ ខណៈ​ផ្ទះ​ឆេះ​នោះ​មិន​ស្ថិត​ក្នុង​សភាព​ចង្អៀត​ណែន​សាំ​ញ៉ាំ​នោះ​ទេ​ ប៉ូលិស​ខេត្ត​កំពង់​ឆ្នាំង​ដោយ​មាន​ជំនួយ​ពី​អ្នក​ជំនាញ​ជា​ជន​បរទេស​របស់​អង្គភាព​ការពារ​កុមារ ​(CPU)​ នៃ​អង្គការ ​Cambodian Children's Fund ​ឬ​CCF ​បាន​ធ្វើ​កោសល្យ​វិច័យ​សាក​សព​ភរិយា ដែល​ស្គាល់​ថា​ឈ្មោះ​ ជា ​អាយុ​ ៣៨ ​ឆ្នាំ ​និង​កូន​ប្រុស​តូច​ជាង​គេ​អាយុ​ ៣ ​ឆ្នាំ ​ដែល​ស្គាល់​ថា​ឈ្មោះ​ ចំរើន។ លទ្ធផល​បង្ហាញ​ថា​ ពួកគេ​បាន​ស្លាប់ មុន​ភ្លើង​ឆេះ​ផ្ទះ។​

លោក ​ខូវ លី​ ស្នងការ​នគរបាល​ខេត្ត​កំពង់​ឆ្នាំង​ បាន​បញ្ជាក់​ថា មាន​ការ​សង្ស័យ​ថា​ហេតុ​អ្វី​បុរស​នោះ​នៅ​រស់ ហើយ​មិន​អាច​ជួយ​កូន​ណា​មួយ​បាន​ចេញ​ពី​អគ្គីភ័យ​ ដូច្នេះ​ហើយ​ទើប​អ្នក​ជំនាញ​បាន​វះ​សាកសព​មើល។​

លោក​ប្រាប់ ​VOA ​ថា៖​ «យើង​សហការ​ជាមួយ​នឹងអង្គការ​ CPU​ ធ្វើ​កោសល្យ​វិច័យ​យក ​[សព]​ មក​វះ។​ វះ​ហើយ​ ឃើញ​ថា​សព​ ២ ​[នាក់]​ វា​ស្លាប់​មុន​កើត​ហេតុ។ ​អ៊ីចឹង​ខាង​បច្ចេកទេស​គេ​កំណត់​ថា ​វា​ជា​រឿង​ឃាត​កម្ម»។​

លោក​បន្ថែម​ថា​ សមត្ថកិច្ច​បាន​ឃាត់​ខ្លួន​បុរស​ជា​ស្វាមី​ឈ្មោះ ​នន់ សារ៉េត​ អាយុ​ ៣៨ ​ឆ្នាំ​ ជា​អ្នក​ដឹក​ឆ្នាំង​ចង្រ្កាន​ដី​ឥដ្ឋ​និង​ខោ​អាវ​ជជុះ​លក់​ ហើយ​ចុង​ក្រោយ​បុរស​នោះ​បាន​សារភាព​ថា ​ពិត​ជា​បាន​សម្លាប់​ភរិយា​និង​កូន ដោយ​ប្រើ​កន្ត្រៃ​ដែល​ប្រើ​ប្រាស់​សម្រាប់​រៀបចំ​បាយសី។​ លោក​បាន​សារភាព​ថា ​ដុត​ផ្ទះ​ចោល​ ដោយ​ទាញ​ពូក​ដុត​រាំង​ខ្ទប់​ មិន​ឲ្យ​កូន​ចេញ​ក្រៅ​ផ្ទះ។​ នេះ​បើ​តាម​សមត្ថកិច្ច។​

លោក ​ខូវ លី​ បញ្ជាក់​ថា៖ ​«អត់​ព្រម​សារភាព​ទេ។​ ក្រោយ​មក​ពេល​នោះ​យប់​មួយ​ បន្ទាប់​មក​ទៀត​ គាត់​សុំ​កុំ​ឲ្យ​សួរ​គាត់។​ គាត់​សុំ​ធូប​មួយ​បាច់ ​អុជ​ហើយ​ស្អែក ​គាត់​នឹង​ឆ្លើយ។​ ដល់​ពេល​ស្អែក​ឡើង ​គាត់​សារ​ភាព។​ អ៊ីចឹង​វា​ជា​រឿង​ឃាត​កម្ម។​ គាត់​ខឹង​ប្រពន្ធ​គាត់ ​ជេរ​គាត់។​ ពេក ជេរ​អត់​ឈប់»។

លោក​បន្ថែម​ថា៖​ «សួរ​គាត់​ទៅ គាត់​ថា​ជេរ​ គាត់​ទ្រាំ​មិន​បាន ។​ ជេរ​យូរ​ហើយ។​ ចេះ​តែ​ជេរ​អ៊ីចឹង​ណា៎។​ អ៊ីចឹង​គ្នា ​វា​ទ្រាំ​អត់​បាន។​ មិន​ដឹង​ម៉េច​គ្នា ​វា​ស្លន់​ស្លោពេក​ទៅ ​ក៏​អាកូន​ហ្នឹង បែប​វា​រត់​មក​ឱប ​មិន​ដឹង​វា​ធាក់​យ៉ាង​ម៉េច​ មិន​ដឹង​ទេ។ ​វា​ថា​ពេល​ហ្នឹង​ វា​បាត់​ស្មារតី។ ​វា​និយាយ​អ៊ីចឹង។​ មិន​ដឹង​សម្លាប់​ដោយ​វិធី​ណា​ទេ ។ វា​ស្លុត​វា»។​

លោក​ ចាន់ អាន ​មេឃុំ​ខុន​រ៉ង ​ប្រាប់​ VOA ​ថា ​បុរស​នោះ​ទើប​តែ​បាន​ទិញ​ដី​ដែល​មាន​ក្បាល​ប្រមាណ​ ៧ ​ម៉ែត្រ បណ្តោយ​ ៤០​ ម៉ែត្រ​ ហើយ​សង់​ផ្ទះ ដោយ​មាន​គ្រោង​ឆ្អឹង​ដែក។​ លោក​បញ្ជាក់​ថា​ពួកគេ​ក៏​ជាប់​បំណុល​ធនាគារ​ផង​ដែរ​ ដោយ​សារ​យក​លុយ​មក​ទិញ​ដី​និង​សង់​ផ្ទះ​នេះ។​

ហើយ​មុខ​របរ​ដឹក​ឆ្នាំង​ចង្រ្កាន​លក់​តាម​រទេះ​ក៏​រង​គ្រោះ​ ដោយ​សារជំងឺ​កូវីដ១៩​ ដោយ​សារ​មិន​អាច​ធ្វើ​ដំណើរ​ទៅ​តាម​ខេត្ត​ផ្សេងៗ​ ដើម្បី​លក់។​ ចុង​ក្រោយ​នេះ​បុរស​នោះ​បាន​ប្រកប​របរ​លក់​អាវ​ជជុះ​តាម​ម៉ូតូ​ ហើយ​នៅ​ផ្ទះ​ដែល​ឆេះ​នោះ លោក​បាន​រៀប​ចំ​អាវ​ជជុះ​ពេញ​ផ្ទះ ដែល​ធ្វើ​ឲ្យ​ការ​ឆាប់​ឆេះ​នោះ​លឿន។​ នេះ​បើ​តាម​មេឃុំ​ខុន​រ៉ង។​

លោក​មាន​ប្រសាសន៍​ថា៖​ «ពិបាក​ណាស់​ ដោយ​សារ​ទីមួយ ​គាត់​ខំ​ប្រឹង​ទិញ​ដី​គេ​នៅ។​ ហើយ​ទីពីរ​គាត់​ខំ​ប្រឹង​ធ្វើ​ផ្ទះ។​ ដល់​ទើប​ធ្វើ​រួច​ ហើយ​អា​កូវីដ​ចូល​ដល់។​ ហ្នឹង​បាន​ន័យ​ថា ​មុខ​របរ​វា​ធ្លាក់​ស្រុត​ទៅ​វិញ»។​

ទោះ​ជា​យ៉ាង​ណា​ មេឃុំ​រូប​នោះ​ឲ្យ​ដឹង​ថា ​បុរស​នោះ​ហាក់​ជា​មនុស្ស​ល្អ​ មិន​មាន​អ្វី​គួរ​ឲ្យ​កត់​សម្គាល់​នៃ​ជម្លោះ​គ្រួសារ​នោះ​ទេ ​ប៉ុន្តែ​ក្រោយ​ហេតុ​ការណ៍​ឃាត​កម្ម​នេះ​ អ្នក​ជិត​ខាង​បាន​និយាយ​ថា ​គ្រួសារ​មួយ​នេះមាន​ជម្លោះ​ខ្លះ​ដែរ។​

មេ​ឃុំ​ឲ្យ​ដឹង​ថា ​ភរិយា​ដែល​ស្លាប់​នោះ​ក៏​ធ្លាប់​ធ្វើ​ការ​ជា​អ្នក​លាង​ចាន​ឲ្យ​ហាង​បាយ​នៅ​ក្នុង​ស្រុក​ផង​ដែរ។

ជនរងគ្រោះដែលមានស្ត្រីជាម្តាយនិងទារកក្នុងផ្ទៃ និងកុមារតូចៗចំនួន ៤ នាក់ បានស្លាប់ដោយសារអំពើឃាតកម្មរបស់បុរសជាស្វាមីនិងឪពុក នៅស្រុក​បរិបូណ៌ ខេត្ត​កំពង់​ឆ្នាំង។ (រូបថត៖ Child Protection Unit)
ជនរងគ្រោះដែលមានស្ត្រីជាម្តាយនិងទារកក្នុងផ្ទៃ និងកុមារតូចៗចំនួន ៤ នាក់ បានស្លាប់ដោយសារអំពើឃាតកម្មរបស់បុរសជាស្វាមីនិងឪពុក នៅស្រុក​បរិបូណ៌ ខេត្ត​កំពង់​ឆ្នាំង។ (រូបថត៖ Child Protection Unit)

លោក ​នូ ហេង​ មេ​ភូមិ​ដើម​ជ្រែ​ដែល​ជា​កន្លែង​ជន​រង​គ្រោះ​រស់​នៅ​ មាន​ប្រសាសន៍​ថា ​ក្រុម​គ្រួសារ​នេះ​បាន​ខ្ចី​លុយ​ធនាគារ​មួយ​ ហើយ​លោក​បាន​ទទួល​ដំណឹង​ថា​ ធនាគារ​នឹង​លុប​ចោល​បំណុល​នោះ។​ ប៉ុន្តែ​លោក​ថា​ ការ​ដោះ​ស្រាយ​នឹង​ធ្វើ​ឡើង​នៅ​ក្រោយ​ចប់​បុណ្យ​ ៧ ​ថ្ងៃ។​

រឿង​សោក​សង្រេង​នេះ​បាន​ឮ​ដល់​អាជ្ញាធរ​ពាក់ព័ន្ធ​រហូត​ដល់​មាន​ការ​ផ្តល់​អំណោយ​ពី​ស្ថាប័ន​មនុស្ស​ធម៌​កាកបាទ​ក្រហម ​ក៏​ដូច​ជា​អំណោយ​របស់​ព្រះ​មហា​ក្សត្រ​ផ្តល់​ដល់​បុរស​ជា​ស្វាមី ​ដែល​ត្រូវ​បាន​ឃាត់​ខ្លួន​ផង​ដែរ។​ អំណោយ​របស់​ព្រះ​មហាក្សត្រ​ត្រូវ​បាន​យក​ទៅ​ឲ្យ​ជន​រង​គ្រោះ ដោយ​រដ្ឋមន្រ្តី​ក្រសួង​ព្រះ​បរម​រាជ​វាំង​លោក គង់ សំអុល ​ដែល​ជា​តំណាង​រាស្រ្ត​ខេត្ត​កំពង់​ឆ្នាំង។​

ឪពុក​របស់​ជន​បង្ក​នោះ​ គឺលោក​ នន់ វណ្ណី​ អាយុ​ ៦៣ ​ឆ្នាំ ​មាន​ប្រសាសន៍​ថា​ លោក​មាន​ការ​ហួស​ចិត្ត​ដែល​កើត​រឿង​នេះ​ចំពោះ​កូន​ ព្រោះ​លោក​យល់​ថា ​កូន​ដូច​ជា​មិន​ដែល​មាន​ជម្លោះ​ធំ​ដុំ​គួរ​ឲ្យ​កត់​សម្គាល់​ក្នុង​គ្រួសារ​នោះ​ទេ ហើយ​កូន​ប្រុស​របស់​លោក​ក៏​មិន​មែន​ជា​អ្នក​ផឹក​ស៊ី​រក​រឿង​អ្វី​ដែរ។​

លោក នន់ វណ្ណី​ ដែល​មាន​កូន​ ៤ ​នាក់​ប្រុស​ ២​ នាក់​និង​ស្រី​ ២​ នាក់​ប្រាប់ ​VOA ​នៅ​ថ្ងៃ​ព្រហស្បតិ៍​ថា៖​« មិន​ដឹង​ថា ​កូន​មាន​គំនិត​ម៉េចៗ​ ខ្ញុំ​ក៏​អត់​បាន​ដឹង​ដែរ​ហ្នឹង!​ ឃើញ​តែ​វា​ស្រឡាញ់​គ្នា ។​ អរៗ​ដល់​ហើយ​ស្រឡាញ់​គ្នា»។

បើ​តាម​ឪពុក​ជន​សង្ស័យ​ ​លោក ​សារ៉េត​ ជា​កូន​ទី ២ ​ក្នុង​គ្រួសារ​ ហើយ​ទើប​រៀប​ការ​លើក​ដំបូង​ប្រមាណ​ ៤​ឆ្នាំ​មុន​ និង​មាន​កូន​ប្រុស​ម្នាក់​អាយុ​ ៣ ​ឆ្នាំ។​ លោក​ឲ្យ​ដឹង​ទៀត​ថា ​កូន​ប្រសារ​របស់​លោក​មាន​ស្វាមី​ ៣ ​ដង​រួច​ទៅ​ហើយ ហើយ​មាន​កូន​ម្នាក់​ជាមួយ​ស្វាមី​ដំបូង។​ ជាមួយ​ស្វាមី​ទីពីរ​មាន​កូន​ប្រុស​ភ្លោះ​ពីរ​នាក់ ​និង​ស្វាមី​ទី​បី ​ដែល​ជា​កូន​ប្រុស​របស់​លោក​មាន​កូន​ប្រុស​ម្នាក់​ទៀត​អាយុ​ ៣ ​ឆ្នាំ។​

លោក ​នន់ វណ្ណី ដែល​ជា​អ្នក​លក់​ត្រី​នៅ​ផ្សារ​ព្រៃ​ខ្មែរ​ក្នុង​ខេត្ត​កំពង់​ឆ្នាំង​ មាន​ប្រសាសន៍​ថា ​លោក​មិន​ដឹង​តវ៉ា​អំពីអ្វី​ទេ​ ដោយ​សារ​កូន​ប្រុស​បាន​សារភាព​រួច​ទៅ​ហើយ​ថា​ខ្លួន​បាន​សម្លាប់​ភរិយា​ កូន​និង​ដុត​ផ្ទះ។​ ប៉ុន្តែ​អ្វី​ដែល​លោក​និង​ភរិយា​របស់​លោក​និង​កូន​ប្រុស​ស្រី​ ៣ ​នាក់​ទៀត​ កំពុង​តែ​សោក​សង្រេង​ចំពោះ​កូន​និង​ចៅ​ដែល​បាន​ស្លាប់។

លោក​រៀបរាប់​ថា៖​ «បើ​កូន​វា​ឆ្លើយ​ថា​អ៊ីចឹងៗ​ ពូ​ទៅ​និយាយ​ម៉េច ។​ ពូ​ទៅ​លូក​ដៃ​ម៉េច​កើត។​ ម្តាយ​ឪពុក​គ្រាន់​តែ​មាន​ការ​អាណិត​ខ្លោច​ផ្សា​កូន​តែ​ប៉ុណ្ណឹង។​ ឡើង​ទន់​ដៃ​ទន់​ជើង​អស់ ។​ បាយ​ មិន​បាយ​ ទឹក​មិន​ទឹក​ដើរ​ចង់​ដួល ​ហើយ​ម៉ែ​ឪ។​ គិត​សព្វ​បែប​យ៉ាង​ទាំង​អស់ អាណិត​កូន»៕

XS
SM
MD
LG